المجد للقصص والحكايات
البارت التاني:
العشق الخطأ
اناا ليه سبتهاا...!
نزلت من بيتهم وقعدت شويه في الشارع وانا تايه افتكرت اخر مكالمه تليفون جاتلي قبل 6 سنين واحساسي وقتهاا وتفكيري في القرار دا رغم اني عارف انو صعب
افتكرت معاناتي في السنين دي وضحكت علي نفسي اني كنت فاكر اني هرجع الاقي عاصي مستنياني
عاصي: خرجت من اوضتي وقعدت في البلكونه شويه
ياتراا انا غلط
انا كدا دمرت مستقبلي واوي كمان
انا ليه انهارت كان المفروض اتجاهل واعدي
منا طول عمري بتجاهل اي شخص يحاول يضايقني
ليه حياتي وقفت من بعدو...ليه بقيت كئيبه اوي كداا
بس كدا افضل علي فكره
محدش يقدر يقرب منك...يكدب عليكي...يضايقك
والأهم من كل داا اني معنديش ثقه في مخلوق
بس حسيت اني عاوزه اتغير يمكن وهو بعيد مكنتش حاسه بالاحساس الي جواياا دا.....الضعف
ايواا ضعيفه
اني أخلي واحد يتحكم فياا وفي مستقبلي يبقا ضعف
اني أخلي علاقه حب فاشله تكسرني يبقا ضعف
اني اسيب حياتي وابقا واحده غريبه معرفهاش يبقا ضعف
اني أعيش بجسد بس بدون روح يبقاا ضعف
انا لازم اتغير وأخرج واشتغل واتفسح واغير جوو
بس بشرط
مصاحبش
محبش
مضحكش مع شاب
مهتمش بشاب
لازم يكون في حدود جاامده اوي مع الناس مش عشانهم لا عشاني اناا مش هسمح لقلبي يتحكم فيا مره تانيه لازم اناا الي اتحكم فيه ولو فكر يحب حد تاني أدوس عليه
دخلت الاوضه وجبت تليفوني فضلت أقلب كتير ادور علي شغل بس ملقتش حاجه تفدني
الي كان متداول قدامي
اعلانات ماي واي
اشتغلي من البيت وردي علي الكومنتات
ابعتيلي خاص واقولك التفاصيل
كلهم شغل مش حكومه وملوش مستقبل
وبما اني خريجه كليه تجاره يبقا ادور علي حاجه تبع الحسابات
منا مش بعد الوقت داا كلو اروح اشتغل شغلانه تجيب أجلي ومش هتأمن مستقبلي
لقيت حد بيحط ايدو علي كتفي اتنفدت للحظه وفكرتو إياس وحقيقي كنت هقطعلو ايدو الي اتمددت دي
بس لقيتو بابا
عاصي: بابا
جمال: وحشتني بنتي ياعاصي وحشتني اوي
بصيت قدامي عشان أخبي دمعه رخمه متعلقه في رموشي
جمال: رجعيلي بنتي بقاا مش حان الوقت خرجيها من جواكي وفكي قيودها خليهاا تتحرر
عاصي: عاوز تشوفها مكسوره تاني عاوزني احررها وترجعلك بحب جديد يقتلهاا تاني سيبها ميته جوايا يا بايا
بص في الارض وكان باين عليه الخساره
للمره المليون يخسر قدامي رفع راسو وبص في تليفوني وملامحو نورت من جديد
جمال: انتي بتدوري علي شغل
عاصي: ايوه
جمال: شديت كرسي وقعدت جمبهاا طيب انا شوفت اعلان مطلوب محاسبين للبنك الي في محافظتنا دا انا عارف انك ادهاا انا هنزل بكره اخودلك معاد للمقابله وهجهزلك ورقك كلو اللي هتحتاجيه وهخلي امك تختارلك اللبس الي هتلبسيه او اقولك هختارو انا ولو احتاجتي اي حاجه ننزل نجبهالك وبلاش تسمعي كلام امك وتحطي ميكاب شكلك أحلي من غيرو والجذمه البني بتاعتك بحبها اووي البسيها
فاكره الطقم الي كنتي لابساه في اول يوم جامعه كان من اختياري فاكراه جميل عليكي البسيه والبسي الطرحه الفاتحه بتخليكي حلوه بلاش الغامقه بتسمرك
انا جايب ل امك ماسك تحفه للوش تعالي نحط منو انا وانتي ونحط خيار هاا اي رائيك
عاصي: كنت متابعه كلامو ومصدومه بجد داا مصدق اني بحاول اتغير
كدااب الي قال ان المصيبه بتصيبك انت لوحدك
لا دي بتصيب عيلتك كلهاا وكل حبايبك
فضلت بصالو ودموعي نازله زي الشلال والغريب ان هو كمان دموعو كانت نازله معايا
قربت منو وحطيت راسي علي كتفو انا وحشه يا بابا هو انا استاهل الي حصلي داا
جمال: دا نصيبك يا عاصي ولازم تحمدي ربنا خليكي عارفه ان كل حاجه بتحصلنا خير ليناا يالا بقاا انتي هتنامي ولا اي تعالي ندخل نفرح امك
شدني من ايدي ورااه وكان بيعرج بسيط عدي سنين وانا مأخدتش بالي انو بيكبر في السن مكنتش واخده بالي من بياض شعرو ولا للتجاعيد الي ظهرت حوالين عيونه ولا لكرمشه وشو وخشونه ايدو
مخدتش بالي انو قصر شويه وعضمو كش وجسمو بقا اضعف من الاول
واضح اني غبت عنهم كتير ورجعت متأخر اووي
جمال: يا رحمه تعالي شوفي عاصي
رحمه: في اي خير
جمال: عاصي عاوزه تشتغل واخيرا قررت تخرج من اوضتهاا
رحمه بفرحه اخيرا ياعاصي اخيرا قررتي تدي فرصه ل إياس
عاصي بعصبيه مش عاااوزه اسمع سيرتو تااني خلاص انتهي حرام عليكي بقاا
جمال: خلاص خلاص ياحبيبتي وبيبص لرحمه ويبرقلها
عاصي: متدخلوش بيتنا تاني يا بابا لما بشوفو بتعب اووي
صوتو بيأذيني
جمال: وعد مني مش هيدخل طول ما انتي في البيت تمام اهدي ياحبيبتي
دخلت اوضتي وفكرت شويه هو انا هقدر اتخطي المرحله دي هقدر احط الحدود الي انا عاوزاهاا مع الناس
هقدر ارجع ولو جزء بسيط من حياتي القديمه علي الاقل افرح بيها بابا
نمت واتمنيت من ربناا انو يقويني وأقدر اعمل كل الي انا عاوزاه
تاني يوم
صحيت علي خبط علي الباب فتحت لقيتو بابا مدانيش فرصه اتكلم أصلا
جمال: الملف بتاعك اهو ومعادك الساعه 2
دخل علي دولابي وفتحو وطلع الطقم الي قالي عليه وفضل يلف في الاوضه لحد ما لقي الجذمه البني
الطرحه فين فين فين
وفضل يدور وانا مراقباه ومبتسمه
اهي الطرحه دي حلوه
كدا الطقم والجذمه والطرحه ناقص حاجه ااه لازم بدي عشان البلوزه دي كمها واسع وايدك هتبان رجع للدولاب تاني
البدي دا يليق ولا داا
عاصي: تحب تروح انت المقابله يا بابا
جمال بإبتسامه هاديه انا والله فرحان اوي ونفسي اجبلك قطعه من السما بس اشوفك بتضحكي زي زمان وعايشه حياتك طبيعي
عاصي: ان شاء الله
جمال: طيب انا هخرج وانتي اجهزي بقاا تمام وهعملك كام ساندوتش كداا تاكليهم قبل ما تخرجي يالا متتأخريش
خرج وقفل الباب بابا حنين اوي ومن النوع الي بيهتم بأدق تفاصيلنا بيحب ينزل يشتري معانا هدوم انا وماما وبيجبلنا هدايا كتير كنت قريبه منو اووي...كنت..
دلوقتي مش عارفه ارجع تاني
لبست وأخدت الملف بتاعي ونزلت كنت حاسه اني غريبه مش عارفه امشي ولا اتحرك مش عارفه ابص في وش حد مش عارفه اتصرف حاسه بتوتر بقالي وقت كبير منزلتش من البيت
ركبت مواصلات وروحت للبنك الي بابا وصفهولي
قعدت استنيت اسمي ينادو عليه
كنت حاطه الملف علي رجلي وبفرك ايدي بتوتر كل شويه افتح الملف واقرأ الكلمه الي جمب حالتي الاجتماعيه واقفلو بعصبيه تاني
فضلت اهز رجلي واعض في شفايفي لحد ماحسيت بطعم الدم فعرفت اني عورتهاا
سمعت اسمي قومت وحاولت أمشي بثبات دخلت اوضه كان قاعد فيها راجلين
قعدت قدام المكتب وحطيت الملف قدامي
ال Hr: اهلا وسهلا اسم حضرتك
: عاصي
ال Hr: عندك كام سنه
: 28
ال Hr: ممكن ال Cv بتاعك
عاصي: اتفضل
اخد الملف وفتح اول ورقه وقرأ شويه ورجع باصلي برفعه حاجب وبص للراجل الي جمبو
كنت عارفه هو بيبص علي اي وداا زادني توتر اكتر
فضل يقلب في الملف بعشوائيه وقال
احم حضرتك مطلقه
عاصي: ايوا
ال Hr: اشتغلتي قبل كدا او
عاصي: لا
ال Hr: تمام هنتصل عليكي ونبلغك بقرارنا
قومت من مكاني واخدت الملف وخرجت وكنت حاسه بضيق
فضلت امشي شويه لحد ما تعبت وقعدت علي استراحه في الشارع سرحت للحظه وافتكرت كام يوم كانو حلوين
عاصي: إياس النهارده كتب كتابنا انا فرحانه اووي اووي تعالا اوريك هلبس اي بابا اختارلي الفستان داا
إياس: حلو اووي هتبقي برينسيس مش عارف ليه الفرح بعد كتب الكتاب بشهر مانعملو دلوقتي
عاصي: انت عارف ان لازم عمي يبقا موجود في الفرح وهو هيجي الشهر الجاي المهم ان النهارده هبقا مراتك
والحب الي بينا هيكبر يااه بقالنا 4 سنين مخطوبين
إياس: يابنتي احنا خللنا في الخطوبه دي داا غير حب الطفوله احنا السنين كلها كنا بنحب بعض وأخيراا بقا
خرجت من اوضتي علي صوت المأذون وهو بيأكد جوازنا جريت علي باباا وحضنتو وعيطت في حضنو وانا فرحانه كنت بشكرو انو موقفش قدام حب حياتي وقال لا
بالعكس كان بيدعمني وقالي الي هتختاريه هوافق عليه
الكل كان فرحان بيناا وشوفت لمعه عيون إياس فرحت اووي وقربت منو مسك ايدي وباسهاا وقالي بحبك
استأذن من بابا وخرجنا شويه فضلنا نتصور ونهزر ونجري في الشوارع ونعمل حركات مجنونه
مفيش أحلي من انك تكمل بقيت عمرك مع شخص يفهم هبلك ويشاركو معاك
عدي 15 يوم وكل يوم أحلي من الي قبلو
كان كل يوم بيثبتلي اني اخترت صح بس للأسف
الباب بيخبط
عاصي: اكيد إياس انا هفتح ياماماا
جريت علي الباب وفتحت لقيت راجل غريب ماسك ظرف ودفتر
عاصي: افندم
الراجل: مدام عاصي موجوده
عاصي: ايواا انا
الراجل: اتفضلي دا من المحكمه ووقعي هناا
عاصي بعدم فهم تمام وقعت واخدت الظرف وقفلت الباب
فتحتو وطلعت الورقه الي فيه وقرأت
فضلت متنحه وصوت انفاسي بيعلي اكتر وحسيت بدوخه وعدم اتزان ماما قربت مني
عاصي انتي كويسه عاصي
فضلت اعيط وابصلهاا وانا مش فاهمه حاجه
انا ليه ماسكه ورقه طلاقي انا عملت اي طيب
فضلت اعيط وانا مش فاهمه حاجه رنيت كتير عليه لكن كان مغلق رنيت علي خالتي
لقيتها بتقول ان اياس سايبلها جواب فيه انو سافر
طيب ليه...حصل اي...سابني ليه...طلقني ليه
فوقت من كل التفكير داا علي صوت كلاكسات العربيات
رجعت للواقع الي انا موجوده فيه
بنت قاعده في الشارع ماسكه ملف في ايدها شايله شنطه علي كتفهاا دموعها علي خدهاا
قومت من مكاني ورجعت البيت
وقبل ما اطلع العماره كان وقفني صوتو
اياس: عاصي ممكن اتكلم معاكي
بصيتلو بجمود ااه طبعاا اتفضل
إياس: احم تسمحيلي اتكلم يعني
عاصي: اكيد
إياس: ااا انتي جايه منين
عاصي: قول انت عاوز تقولي اي
إياس: اديني فرصه افهمك
عاصي: فهمني
إياس: بصي كان غصب عني
عاصي: ايواا كمل
إياس: ااا تت اناا
فضل يتهته في الكلام
ضحكت
إياس: انتي بتضحكي
عاصي: ااه بضحك اي مش عاوزني اضحك..؟
انت مش عارف تقول اي انت بتضحك علي نفسك علفكره ومقتنع ان عندك سبب مقنع عشان تمشي
عمال تقول اديني فرصه وانا اديتك اربع فرص
الفرصه الاولي لما فتحتلك الباب وانت زي الغبي قولت وحشتيني كنت مستني اقف اسمعك
الفرصه التانيه لما جبتلي خاالتي وقعدت قدامك وانت متكلمتش
الفرصه التالته لما خبطت عليا وقولت افتحي وفتحت وبردو متكلمتش
وادي الفرصه الرابعه وبردو متكلمتش
انت عاوز اي
اياس: عاوزك تسامحيني
عاصي: لا
اياس: عاصي انا عملت دا عشانك
عاصي: امم ليه
اياس: مش هقدر اقول اكتر من كدا
عاصي: تمام عن اذنك
اياس: ياعاصي انا عاوز اتجوزك
عاصي: لا مردهاش عليك ابداا انك تتجوز واحده مطلقه
وبيني وبينك طليقي كان مش رااجل بعتلي ورقه طلاقي عن طريق المحكمه داا حتي ما جاش ادهالي في وشي ووقف كدا وقالي انتي طالق لا دا اصغر بكتير مما تتخيل
هرب عشان مش عارف يواجه
اياس: كنتي تقدري متوقعيش عليها لو فعلا بتحبيني
عاصي بتضحك بصوت عالي انت فااهم نفسك
تطلقني وتهرب وعاوزني احبك داا انا...وقعت وتفيت عليهاا كمان
اياس: افتكري الي بيناا
انت مش موجود في حياتي اصلا عشان افتكرلك حاجه
شوف هنتفق اتفاق طول ما انت مش عاوز تقولي مشيت ليه متظهرش قداامي عشان مقلش منك اكتر من كداا
قررت انك تقول تعالا اقف قدامي زي الرجاله كداا وقولي مشيت ليه ودا مش عشان اسامحك لا
دا عشان نصفي الي بيناا واقدر اشوفك رااجل يمكن اقدر احترمك تمام في اي هبل تاني عاوز تقولو مفيش طيب مع السلامه انت بقاا
طلعت البيت والنار الي جوايا كل يوم بتهدي
بعد يومين
تليفون عاصي بيرن
عاصي: ألو
معاكي ساره سعيد من البنك الي قدمتي فيه علي وظيفه يافندم تقدري تبدأي معانا من بكره
عاصي: تمام شكرا
قفلت ومكنتش فرحانه ف عادي اشتغلت عادي مشتغلتش عادي مش فارق
تاني يوم جهزت ونزلت علي الشغل بس كان عندي ثقه اكبر من المره الي فاتت
فهمت شغلي وبدأت فيه كان فيه شويه مضايقات وحجات مش حابه انها تحصل بس هتعدي
اكرم: اذيك ياعاصي
عاصي وهي باصه في الكمبيوتر الحمدالله
اكرم: ممكن نشرب القهوه النهارده سوا في الاستراحه
عاصي: لا
اكرم: ليه
عاصي: مبتسمعش قولت لا
اكرم: انا اسف
سامح: هاي عاصي
عاصي: ابتسامه مجامله
سامح: بقولك اي
عاصي: متقولش
سامح: معندكيش فضول تعرفي عاوزك في اي
عاصي: لا
سامح: ازااي يعني
عاصي بنظره جاامده عن اذنك
ماجده: اذيك ياعاصي
عاصي: الحمدالله
ماجده: تعرفي ان اكرم عينو منك
عاصي: لا معرفش
ماجده: طيب اديني قولتلك اي رائيك لو..
عاصي: لا
ماجده: لسه هقولك...
عاصي: سلام
شيماء: عاصي النهارده عيد ميلادي
عاصي: كل سنه وانتي طيبه
شيماء: وانتي طيبه هستناكي في الحفله بتاعتي هاتي رقمك عشان ابعتلك العنوان
عاصي: مش هاجي
شيماء: لا هزعل اووي
عاصي: ازعلي
شيماء: احم طيب رقم تليفونك
عاصي: لا
التعامل معاهم صعب تقريبا مش بيفهمو بس لازم كداا مينفعش نتعامل بطريقه غير كداا مش عاوزه حد ياخد علياا
نزلت من البنك اتمشيت شويه وكنت هركب وارجع البيت
لقيت واحده جايه علياا شايله طفلين من ملامحها قدرت اعرف انها صاحبتي الي كانت بعتالي مسچ زمان وانا مردتش عليها
سهام: اي داا عاصي اذيك انتي مش فكراني
عاصي بإبتسامه لامبالاه لا افتكرتك
سهام: اي عامله اي اتجوزتي ولا اي
عاصي: لا
سهام: ليه كدا بصي دول عيالي عقبالك
عاصي: ربنا يخليهوملك
سهام: انتي لسه زي مانتي انسيه ياعاصي انا عارفه ان كلمه مطلقه صعبه بس
عاصي: عن اذنك
مشيت وسبتهاا مش مضطره اسمع اي كلام يضايقني
هما مش قالو بردو اعتزل ما يؤذيك
الايام كلها شبه بعضهاا كنت مفكرا اني لما اشتغل الجو هيتغير بس هوهو بس افضل من قعده الاوضه طول الوقت الشغل بيسليني شويه
بعد شهرين من تعيني في البنك
أكرم: انا بحبك
رفعت راسي وبصتلو ورجعت دهري لوراا فضلت مركزه في عيونو بطريقه ملفته حتي هو اتكسف وفضل يتهته
عاصي: فاهم معني الكلمه دي
اكرم: ط ط طبعاا
عاصي: لو كنت فاهمها مكنتش حبتني
حبتني ليه معلش لا ببصلك ولا بضحكلك ولا بديك اهتمام ولا بحسسك ب اي لازمه حبتني ليه تعرف عني اي عشان تحبني
اخدت اذني عشان تحبني مين اداك الحق تقف قدامي وتعترفلي بصلي كويس
دي واحده محتاجه الحب
دي واحده عاوزه تتحب
انا قولتلك اني عاوزه اتحب
اتخض وسابني ومشي
دي حياتي وانا احدد همشيها ازاي
من النهارده مفيش راجل هيتحدد في قلبي ويمشيني علي هواه...
يتبع...♥️
#روقه
♕بقلم يارا غزلان♕