رواية حمل بالتراضي الفصل التاسع والعاشر والحادي عشر بقلم رانيا ابو خديجة
رواية حمل بالتراضي الفصل التاسع والعاشر والحادي عشر
الفصل التاسع #حمل_بالتراضي
#رانيا_ابو_خديجة
كنت واقفة في الأوضة مستنياه ... مش المفروض ييجي ياخدني وننزل سوا ...اوووف هو اتاخر كدة لية ؟!!
فضلت واقفة ابص على نفسي في المرايا ... ابتسمت بفرحة .. كان شكلي اجمل ما كان نفسي اكون كمان .. كتير قوي حلمت بالفستان دة والطرحة بس الحمد لله بعد ماكنت اخدت قراري باني عمري ما هلبسة ربنا كان لية ترتيب تاني اجمل حتى ما كنت احلم ... ايه دة كشرتي لية دلوقتي ؟!!
كان نفسي قوي يارب بابا يكون معايا دلوقتي .. صدقني يارب انا مش طماعة وبجد شكرا قوي على كل حاجه.. بس انا مكنش ليا غيره هو الوحيد اللي كان هيحسسني دلوقتي اني مش لواحدي ... يلا ربنا يرحمك يا حبيبي .
مديت صوابعي ومسحت الدمعة اللي كانت مصره تبوظلي الميكب ... فستاني حلو قوي ... حاسة انه شكلة احلى دلوقتي عن ما قسته في الاتيلية كمان... والبنت اللي جت تزوقني رفعت شعري في كعكة كبيره في شكل جميل حتى الميكب اصريت عليها يبقى هادي عشان يليق عليا ..
أخيرا سمعت خبطتة اللي انا عارفاها عالباب .. دخل .. ايه دة الله ...
شكلة حلو قوي كدة ... ابتسمت اول ما شفته .. اليومين اللي فاتوا كنت كتير اشوفة لابس جلبية بيمشي بيها في البلد زي باقي الرجالة اللى شفتهم هنا... كان بيبقى شكلة فيها مختلف ... بس دلوقتي لابس واحدة بيضة وحوالين رقبتة شال كبير من اللون الاوفوايت .. . كان تحفه... ايه دة هو مالة واقف عنده كدة لية... بصيت في ساعة ايدي بملل .. انجز يا عم دة وقتة ... كالعادة طبعا وانا عارفه هيفضل واقف يبصلي كدة كتير ...
زهقت مشيت انا و روحتلة ...
_ احمد ... هو المفروض اية اللي هيحصل دلوقتي وهنروح الفرح ازاي؟
واخيرا ظهرت علية علامة تقول انه صاحي وسامعني لما لقيتة ابتسم وبصلي شوية وبعدين قال
_ ينفع مننزلش الفرح اصلا؟
_ لية؟!!
سكت شوية
_ عشان مش عارف لو الناس شافتك وانتي بالجمال دة ممكن يحصل ايه.
ابتسمت من كلامة القمر دة
_ ممكن يحصل ايه ؟!.
_ مش عارف... خايف يحسدوني عليكي ... وانا اصلا من جوايا بدعي ربنا يحفظك ليا.
ضحكت بكسوف من كلامه
_ لأ متخافش... بس يلا عشان نلحق الفرح
ابتسم
_ طيب استنيني هنا ... هنزل مريم لعريسها تحت وبعدين اجي اخدك في احلى زفة ...
…................................
اول ما نزلت من البيت وانا ايدي في دراعة لقينا زفة كبيرة وناس كتير قوي قدام البيت .. ايه دة ومريم اهي مع عريسها شكلها قمر برضه قوي .
فضلنا واقفين شوية والستات بتزغرط مع مامت احمد اللي كانت باين عليها فرحانة قوي وهي عمالة توزع شربات عالناس اللي واقفة كلها .. وريم كانت بتساعدها ... ريم شبة احمد كتير .... أوقات بحس انها توأمة في البيت ...فطبعا كانت حلوة قوي وعسولة كتير في فستانها .
بعد شوية ...الزفة كانت ورانا واحنا مشينا شوية بشويش لحد ما وصلنا لمكان واسع قدام البيت كان معمول فية مسرح حلو قوي ومتزين ... مريم وعزت طلعوا وقعدوا في الكوشة بتاعتهم ... بعدين احمد بصلي بابتسامة عمري ما هنساها ابدا وبعدين ساعدني نطلع ونقعد في الكوشة بتاعتنا
وبدء الفرح ... انا كنت مبسوطة قوي .. الناس جميلة قوي كلها فرحانة وبترقص ... بس الرجالة و شباب البلد جم اخدوا احمد وعزت علشان يرقصوا بعيد بالعصايات اللي في أيديهم دي ... ايه دة احمد شكلة بيعرف يرقص بيها حلو قوي... كنت بتفرج علية باهتمام وانا مبسوطه بيه قوي... و ريم والبنات كمان جم قوموني انا ومريم بس انا مكنتش عارفه ارقص زيها كنت بس واقفة بسقف وانا بضحك على رقصها الغريب قوي بس لطيف وكيوت جدا ... التفت كدة ابص عليه تاني لقيتة وقف رقص وبيبصلي ابتسمت لية .. سبهم وقربلي وهو بيردلي الابتسامه.. ايه دة هو جاي هنا لية ... لقيتة سحبني من ايدي وقربني منة قوي وقالي في ودني
_ مالك واقفه كدة لية ؟
قربت انا كمان عشان يسمعني
_ مش بعرف ارقص كدة
حسيت الناس اخدت بالها مننا وبتبصلنا .. اكيد هيتكسف ويروح يرقص مع صحابة تاني .
لقيتة بيسحبني من ايدي وبدء يلف حواليا بالعصايا اللي كانت معاه ويرقص مع المزيكا والاغاني ...فضل يلف حواليا وهو بيرقص ويبصلي و على وشة اجمل ضحكة ليا لواحدي قربت انا كمان منه وبدءت اتحرك بخفة معاه وهو فاتح درعاتة يحتويني وهو بيرقص .. كنت مبسووووطة قووووي حاسة كان شكلنا حلو مع بعض ... فاجأة الناس اتلمت حوالينا احنا وفضلوا يسقفوا وهما مبسوطين قوي وعلى وشهم انبهار بينا وباحمد واللي بيعملة معايا .... ايه دة اااااه
لقيت نفسي فاجاة في حضنه وبيلف بيا كتير قوي وبعدين نزلني ... حاسة اني دايخة ... سندت عليه شوية ... هو حس بيا وميل عليا يسألني اذا كنت كويسه... هزيت راسي بمعني تمام ... وبدأت اتحرك معاه تاني ... فضل يرقص حواليا ...كان رقصه يخطف النظر ... المنظر كلة كان يخطف النظر ... كنت مبسوطه كتير ... احمد جميل قوي ... لو يعرف دلوقتي هو قمر ازاي .
بعد الفرح روحنا نوصل مريم لبيتها واتزفينا معاهم لهناك... واحمد اصر يدخل ويطمن عليها لحد جوا. ... سمعتوا كتير قوي بيكلم عزت وبيوصية عليها كلامة كان حلو بأن اغلى ما عنده هما اخواتة وان لو زعلها في يوم ييجي ويكلمه هو ميستقواش عليها ابدا ... قاله كتير عن حنية مريم وازاي هي بتحب اللي حواليها وممكن تديه عنيها لو كان حنين هو كمان معاها ..
وقفت كتير عند كلامة ... ياترى لو كان بابا موجود كان ممكن يقول لأحمد ايه ؟
طب ينفع انا أقوله الكلام دة بدل بابا ... فكرت فيها كتير بس لأ ... اكيد لو كان من بابا كان هيبقى احلى .
اخيرا وصلنا بتنا تاني ... مامتة لقيتها وقفتنا عند السلم قبل ما نطلع
_ استنى يا احمد يا ابني...
دخلت جوا دقايق وبعدين خرجت تقول ايات قرانية و معاها بخور
_ صدق الله العظيم... بسم الله ارقيقوا والله يحميكوا من كل ما يؤذيكوا ... من شر حاسد اذا حسد ... حصوة كبيرة في عين اللي شافكوا الليلادي ومصلاش عالنبي .
احمد لقاني بكح كتير من الدخان
_ كفاية يا امي كفايه ... واية لازمتة اصلا دة كله .
ردت وهي لسة بتلف حوالينا بالبخور
_ ايه لازمتة دة ايه .... انتوا مشوفتوش الناس كانت بتبصلكوا ازاي ... ربنا يحميك يا حبيبي انت ومراتك .
وبعدين قربت مننا وحضنت احمد
_ مبروك يا حبيبي... يجعلها زيجة العمر والسعد والهنا يارب .
وحضنتني انا كمان ... طيبة قوي مامتة دي حبيتها قوي
_ مبروك يا نور عيني... يجعلك زوجة العمر ويجعلة ليكي سندك يارب .
بصيت لاحمد .. زوجة العمر دي يعني نفضل مع بعض علطول.... كان نفسي اسأله؟!
طلعنا اوضتنا واول ما دخلنا سبتوا وروحت عالمرايا ابص تاني على شكلي ... انا حاسه ان انا حلوة في الفستان قوي ...فضلت ابص على نفسي من كل الزوايا وانا مبتسمه ... التفت لقيتة لسة واقف مكانه بيبصلي وفي عنيه نظرة عمري ما شفتها ابدا قبل كدة... روحتلة وانا مبسوطه قوي ولفيت حوالين نفسي
_ احمد .. شكلي حلو ؟؟
سكت شوية وبعدين همس
_ شكلك اجمل من أحلى حاجة ممكن أشوفها في حياتي.
_ بجد يا احمد... شايفني حلوة قوي كدة؟!
فضل يبصلي شويه وبعدين لقيتة فك الشال اللي حوالين رقبتة وحطه على طرف السرير وقرب مني وسحبني براحه وقفني قدامه
_ مكنتش عارف ان الفستان الابيض والطرحة معمولين عشانك انتي.
فرحت قوي من كلامة
_ احمد ... انت جميل قوي ... انا عايزه اقولك شكرا على كل حاجه
لقيتة بصلي كتير قوي وبعدين همس بصوت تقريباً مسمعتوش
_ ...سيرين ....
_ ......نعم !!
مش عارفه لية قلقت من نظرتة ... معقولة اللي انا فهمتة صح ؟!!
..................………
_ اطلعي يا ريم .. نادي اخوكي ومراتة عشان العشا
_ يا أما طلعطلهم ... احمد قالي من ورا الباب اطلعله الأكل فوق .
_ يوووو ... هما عاملين فيها عرسان بجد ولا ايه .. دول لا نزلوا فطروا ولا اتغدوا !!!
_ بتقولي ايه يا أما ؟!
_ ايه ... لا ولا حاجه.. اسمعي كلام أخوكي وطلعيلة الاكل فوق.. يلا .
_ حاااضر... اووف ما انا برضة طلعت الغدا .
……………………............
مش عارفه لية من وقت ما صحي من النوم وهو سرحان .. شكلة بيفكر في حاجة مضيقاه قوي ... لو اقدر ادخل جوا عقلة واعرف اية شاغلة ومضايقة كدة ..
بس انا والله مزعلتوش في حاجة أبدا بالعكس دة من ليلة الفرح وهو مختلف معايا و حسيت قد ايه هو مبسوط وفرحان بجد زي اي عريس فرحان بجوازة .. بس مش عارفه لية فاجأة بيقلب كدة ؟!!!
قربت منه وحطيت ايدي على دراعة وقولت بصوت هادي
_ احمد !!!
بصلي وبعدين ابتسم بحنية
_ نعم ..
_ هو انا زعلتك في حاجة ؟!
_ لية بتقولي كده ؟!
_ سرحان كتير وشكلك متضايق و مهموم
برضة سكت شوية و بصلي وبعدين لقيتة بيفتحلي دراعة علامة اني أقرب ... قربت فعلا وحطيت راسى على صدره ضمني لية جامد قوي... هو ماله غريب دلوقتي حتى في حضنة كده ليه
_ سيرين ..
_ نعم ..
سكت تاني .. رفعت وشي ابصلة
_ مالك يا احمد... فيه ايه؟!!
اقدر اعمل ايه عشان أضمن وجودك معايا... خايف اصرحك واقولك على مخاوفي اللي جوايا تفهميني غلط ... نفسي اقولك اني نفسي نكمل مع بعض مش بس لحد ما تبقي أم... بس عارف انك هتفهمي اني طمعان فيكي زي تفكيرك قبل حتى ما اعرفك .
_ احمد ... مالك .. بتبصلي كدة ليه؟!
_ مفيش يا سيرين... مفيش .
بعدين لقيتة ضمني بدراعة اكتر ... انا بجد بحب حضنة قوي حضنة اللي انا لسة مكتشفاه من ليلة الفرح... دة طلع في حضن حلو قوي غير حضن الاب اللي افتقدتة ... مفيش حاجه تعوض احساس حضنة... بس حضن احمد مختلف .. ومريح قوي .... في سعادة عمري ما حسيتها قبل كدة .
……........................
النهاردة روحنا نزور مريم في بيتها ... أحمد قالي انه المفروض كان يروح مع والدته تاني يوم جوازها بس طبعا مروحناش ولا نزلنا من البيت أصلا... مريم قاعدة في بيت فيه ناس كتير ... بيت عيلة جوزها ... دخلنا كلنا الشقة اللي هي قاعدة فيها كانت جميلة قوي ...
.. اول ما دخلنا احمد اول واحد حضنها ... حضنها جامد قوي .. شفتة وهو مغمض عينية وبيتنفس براحة وهو حاضنها وبعدين خرج من حضنها وهمس
_ الحمد لله
وباس راسها ... بعدين انا سلمت عليها وحضنتها برضة .. كان باين عليها مبسوطة مع جوزها ... انا اصلا من وقت ما كلمتني وحاكتلي عنة وانا عارفه انها بتحبة ... قعدنا كلنا مع بعض ... بس كان في ناس كتير انا معرفهاش يمكن شوفتهم في الفرح بس مركزتش ... اوووف طب وبعدين انا كنت لابسة فستان اخضر ورافعة شعري في ديل فرس خليت احمد اللي يعملهولي عشان بيعملة حلو ويرفعة لفوق ... هما بقى بيبصولي لية كدة دلوقتي ... انا لبسي والله محترم ... ولو مكنش كدة احمد مكنش خلاني لبستة أصلا... احمد لاحظ نظرات الموجودين ليا وخصوصا قرايب العريس الرجالة قام واخدني من ايدي ودخلنا جوا
_ ايه يا احمد... في ايه؟!
_ انتي ايه اللي مقعدك معانا بره .. ادخلي ساعدي امي وريم في الغدا جوا مع باقي الستات.
_ يا احمد ماهي مريم قاعدة اهي وبنات كتير .. خليني قاعدة معاكوا عشان خاطري .
_ سيرين.. اسمعي الكلام.
_ ايوا .. بس انا مبعرفش اعمل الاكل اللي هما بيعملوا دة .
_ خلاص روحي اقعدي في الاوضة لحد ما ريم تخلص هبعتهالك تقعد معاكي .
_ انت لية مش عايزني اقعد معاكوا وخلاص ... ايه دة ؟!
_ انا كدة مش حابك تقعدي بره وسط الناس دي كلها ... طب اقولك انتي بتحبي تقفي في الهوا اللي هنا .. روحي اقفي في البلكونة اللي جوا شويه وانا شويه وهبعتلك ريم تسليكي .
زعلت من طريقتة بأنه عايز يخبيني كدة ... كل دة عشان لقاهم بيبصولي ... ياريتني كنت لبست عباية وطرحة اكيد مكنوش هيبصولي كدة .. روحت فعلا ووقفت في البلكونة ابص عالزرع والخضرا اللي باينه من بعيد وكانها خط على طول النظر ... ابتسمت و غمضت عيني وانا بستمتع بالهوا وفاجأة
_ عندك حق.. ما الجو دة مايتسابش برضه عشان اجتماع مع شوية فلاحين
التفت اشوف مين دة
_ انا حبيب ... ابن عم عزت .... وحضرتك ؟
_ انا سيرين مرات احمد اخو مريم .
_ عارفك .. شوفتك يوم الفرح كنتي مختلفة وجميله بس اقولك على حاجه بصراحه انا وصحابي كنا عمالين نتكلم قد اية انتوا مش لايقين على بعض
_ هما مين دول اللي مش لايقين على بعض ؟!
_ انتي والفلاح دة ... انا سالت عليكي وعرفت انك مش من هنا ولا من الوسط دة زيي بالظبط انا كمان عايش في القاهرة ومش باجي هنا غير في المناسبات بس.
_ ايوا وحضرتك يعني عايز ايه دلوقتي ؟!
لقيتة قرب شويه وهمس
_ تسيبك من الفلاح دةوتخليكي مع اللي شبهك ومن وسطك.
انا مش قادرة استوعب... هو انا بتشقط بجد ولا انا اللي فهمت غلط ... يعني احمد وقفني هنا عشان دة ييجي يقولي كدة ؟!
_ متفكريش كتير انا اصلا مش عارف واحدة في جمالك ورقيك دة اية اللي رماها على واحد زي دة فلاح ..بيئه ... صدقيني انا وانتي هنكون لايقين على بعض أكتر.
_ ؟؟؟؟!!!!!!
_ طيب انا هسيبك تفكري وتردي عليا وبعدين نشووف هنعمل ايه وهنتخلص من جوزك دة ازاي ... انا اخري هنا كمان يومين واكيد هاجي هنا تاني وهشوفك .
سابني في زهولي وخرج...
_ ايه دة ... ومين دة.... وايه إللي بيحصل هنا .. ويعني ايه نتخلص من جوزك ... هو الواد دة بيشوف افلام عربي كتير ولا ايه؟!
................................
_ احمد ... احمد
قربت منه وهمستله في ودنه
_ ايه يا سيرين... عايزة ايه؟!
_ كنت .. كنت عايزة ..
بصلي باستغراب وبعدين استاذن من الموجودين وقام واخدني من ايدي وخرجنا من الاوضه ..
_ ايه .. مالك ؟!
_ كنت عايزه اسألك ... هو .. هو جوز مريم لية قرايب من القاهره ؟
بصلي باستغراب كدة
_ ايه السؤال دة... اشمعني كدة؟!
_ لأ عادي انا بطمن عليها بس .
_ يعني ... اه اللي اعرفه انه والده لية أخ مدرس عايش في مصر هو وولادة ...
_ اهااا ... طيب هو احنا ينفع نمشي بقى؟!
_ معقولة يعني يا سيرين هنسيب الناس قاعدة ونمشي ... انا عارف انك مليتي وزهقتي ... بس دي مريم و انا لو سافرت مش هعرف انزل البلد تاني دلوقتي خالص عشان كدة لازم اديها حقها من وقتي قبل ما امشي.
هزيت راسي بمعنى تماام لقيته بصلي شوية... شكلي صعبت علية وانا واقفة لواحدي .. اوماال لو عرف اللي حصل... قرب ومسك ايدي وقال
_ بقولك ايه تيجي على ما يحضروا هما الغدا جوا.. استأذن انا وانتي و انزل امشيكي شويه حوالين البيت ونرجع .
_ ماااشي .. يااااريت .
قولت كدة بحماس.. ابتسملي.. وفعلا دخل استأذن من الرجالة اللي كان بيتكلم معاهم ونزلنا نتمشى في البلد وجمالها ... جمالها دايما مختلف وهو معايا.
............................................
صحيت الصبح بدري .. بصيت حواليا لقتني نايمة في حضنة وهو كالعادة ضممني لية قوي ... بعدت ايده عني بالعافيه وقومت فتحت الشباك.. الله الجو كان حلو قوي الصبح وريحة الزرع مليا الدنيا كدة ...قربت ابص من الشباك.. لقيت الطريق تقريباً فاضي ما يدوب لسه النهار طالع .
قربت منه اصحيه
_ احمد .. احمد
_ هممم ..
_ احمد .. اصحى .. ممكن تصحى وننزل نتمشى تحت شويه
احمد .. انا بكلمك .. انت سامعني .
_ همممم ...نامي دلوقتي يا سيرين.... واول ما نصحى هعملك اللي انتي عايزاه.
_ يا احمد أول ما نصحى ايه بس .. الجو دلوقتي جميل قوي وانا عايزة انزل ..
اووف نايم ولا هو هنا.. روحت بصيت تاني من الشباك.. الجو تحفه دلوقتي وانا حرفياً محتاجه احس بالهوى دة واشم ريحتة في وقت زي دة
اخدت قراري وغيرت هدومي و نزلت فعلا ... كان البيت هادي واضح انهم لسه نايمين برضه .. فتحت الباب وخرجت
وقفلته ورايا.. الله ريحة الهوى تجنن فضلت اتمشى كتير قوي لحد ما وصلت للترعة اللي وقعت فيها قبل كدة.... بصيت عليها وعلى الاشجار اللي حواليها من بعيد خوفت أقرب الصراحة من بعد اللي حصل... بس عديت للبر التاني ومشيت كتير .. بقيت المس الزرع طول ما أنا ماشيه ...ملمسه و قطرات الندى علية شئ في غاية الراحة والجمال كنت ماشية ومبتسمة كنت فعلا مبسوطة قوي .. قابلتني المكنة الصغيرة اللي بتطلع ميا اللي مريم قالتلي عليها طرمبة .. بصيت حواليا ملقتش حد الا واحد بعيد ماشي بالحمار بتاعة .. كان نفسي قوي اشغلها زي ما مريم كانت بتعمل .. مسكت الايد بتاعتها و بقيت احركها لفوق ولتحت زيها .. الله بقت تنزل ميا انا مبسوطة بجد .. مديت ايدي وشربت منها زي ما شوفت واحدة بتعمل قبل كدة .. طعم ميتها مختلف بس حلو قوي... مشيت تاني كتير.. ايه دة انا بعدت عن البيت قوي ... وكمان اتاخرت لأ لازم أرجع احسن احمد يصحى ويقلق عليا ..بس حسيت اني مش عارفه ارجع هو انا عديت الترعة يبقى المفروض ارجع كل دة واعديها و لا اكمل في وشي ولا ادخل هنا ولا اعمل ايه ؟!!.
ناديت عالراجل اللي بيتمشى هناك دة
_ بقولك لو سمحت ... هو انا لو عايزة اعدي الترعة زي ما جيت المفروض امشي ازاي ؟!
التفت بصلي ... ايه دة هو انت ؟!!!
سيرين دلوقتي: ايه دة في مصيبة الله انا بحب المصيبه😂😂
يا ترى ايه اللي هيجرا للحجة اللي مش عايزة تتهد دي ؟!
واحمد هيعمل ايه ومين الغتت اللي مش عاجبة الفلاحين دة!
استنوا فصل كلة احدااااث هتعجبكوا باذن الله...كمان هندخل عالجد بقى ونشوف احمد مصيره معاها ايه ؟؟
و هي كدة خلاص بقت مراتة فعلا فهتعمل معاه ايه ؟؟
توقعاتكوا معايا كدة وتفاااااااعل بقااااا ❤️❤️❤️ قراءة ممتعة يا اجمل قرااااااااء ..... رانيا ابو خديجة 🥰❤️
#حمل_بالتراضي
#اخر_امل
#رانيا_ابو_خديجة
↚
رواية حمل بالتراضي الفصل العاشر
الفصل العاشر
#حمل_بالتراضي
#رانيا_ابو_خديجة
حسيت بفراغ رهيب من وقت ما سابت حضني .. مديت ايدي اشدها كالعادة كل مرة تبعد فيها .. انا عارف نومها غبي ومش بتبطل تبعد وتفرك وهي نايمة... بس لقيت فراغ تحت ايدي...فتحت عيني بالعافيه لقيتها مش جنبي ... ايه دة دي مش في الأوضة كلها .. من ليلة الفرح وهي مش بتطلع من غيري و كمان بتتكسف تنزل من غيري .. اشمعنى النهاردة نزلت تحت وسابتني نايم
قومت وجهزت وغيرت هدومي ونزلت تحت اكيد مع امي وريم .. بس البيت هادي .. يبقى امي و ريم لسه نايمين .. اومال هي راحت فين ... بصيت بخضة في كل مكان وانا واقف مكاني وبعدين جريت على اوضة ريم وخبط مسمعتش صوت فتحت الباب ودخلت
_ ريم ... ريم ...
_ هممممم
_ ريم اصحي ... وقوليلي ..فين سيرين ؟!
قامت واتعدلت
_ سيرين!!!! ... معرفش ... مش هي معاك فوق
رديت وانا بخرج من الاوضه
_ لأ... صحيت من النوم ملقتهااش
فتحت اوضة امي ودخلت .. لقيتها بتصلي
_ السلام عليكم ورحمه الله وبركاته... السلام عليكم ورحمه الله وبركاته.
_ تقبل الله يا امي .. بقولك مشوفتيش سيرين النهاردة ؟
_ لا يا احمد ... دة انا لسه صاحيه اهو كنت نايمة سطيحة يا ابني حتى محستش بالفجر.
_ مش عارف صحيت ملقتهاش ... خايف عليها تكون خرجت لواحدها يجرالها حاجة تاني
_ طب استنى يا احمد رايح فين ... خلينا نيجي معاك.
_ لأ لا خليكوا انتوا وانا هشوفها ... اكيد لو خرجت مبعدتش عن هنا .
…................................
_ اية دة ..انت؟!
_ يا احلى صباح واحلى صدفة من غير معاد ... دة احنا لو كنا متفقين مكناش هنعرف نظبطها كدة .
سبتة يهرتل بكلامة دة والتفت امشي زي ما كنت ماشية وخلاص.
_ استني بس انتي رايحه فين.... دة انا ما صدقت شوفتك تاااني والله.
_ اية دة ابعد ايدك عني ومتلمسنيش ... وياريت تسيبني امشي احسنلك.
_ طب خلاص اسف ... بس قوليلي بتعملي اية لواحدك هنا كدة في وقت زي دة ... وشكلك تايهة كمان .. ولا الفلاح دة زعلك في حاجة عالصبح كدة ..
لأ كدة كتير قوي.. فعلا اتنرفزت من كلامه مش اول مرة يتكلم عن أحمد بالشكل دة
_ المهم خلينا نكمل كلامنا بتاع امبارح .. رايك ايه في اللي قولتهولك؟
_ بص يااا مش فاكره اسمك ايه... انت لو اتكلمت نص كلمة تاني عن احمد جوزي بالشكل دة انا هزعلك .. ومسمحلكش تتكلم معايا تاني أصلا ..
لقيتة سكت كدة وبصلي و هو مكشر وكأنة اتفاجأ من كلامي وعصبيتي
_ ايه دة يا ابن الاية عرفت تثبتها وتديها معاد هنا .. انا برضه قولت انك حريف .
_ لأ واية عرف يخليها تخلع من جوزها في وقت زي دة ازاي؟!! .. متعرفش!!!
اية دة ايه الاشكال اللي معاه دي
_ حازم !!! وليد !!! يلا بينا نرجع ... هي مش جيالي هي كانت بتتمشى عادي .
_ ياااارااااجل انت كمان بتغزي العين ... ماااشي يا سيدي ..مش هنقوول لحد.
_ قولتلك اخرس ...
وبعدين التفت لي وقال بتناكة
_ انا مكنتش اعرف ان الوضع مع الفلاح كدة ... عموماً يا بخته .. فرصة سعيدة يا جميله.
قال كدة و أخد صحابة ومشي ... احسن... انا غلطت اصلا اني خرجت لواحدي.
_ انت عبيط يا ابني بقى بعد ما سمعت كلامك وجت تقابلك هنا تقولها فرصة سعيدة ونسيبها ونمشي !
_ يا أبني افهم انا قابلتها هنا صدفة وبعدين شكلها يا عم بتحب الفلاح دة وهتتعبنا .
_ تحب ايه يا اخويا ! انت عبيط يا حبيب .. اوعى كدة وانا اللي هروحلها ... وتراهني ان هرجع مصر والقمر دة معايا.
_ ولا .. وليد ... رايح فين يا متخلف دي واحدة متجوزة ؟!!
_ اصلة رفع چونت اول ما صحي فتلاقية عامل دماغ مش هتيجي معاك سكه .
_ ايه .. شااااررب ... الله يخربيتك انت وهو على عمايلكوا السوده دي انا غلطان ان انا جبتكوا معايا هنا اصلا .
_ طب يلا نروح وراه نلحقة يا عم ليودينا في داهيه.. احنا هنا في ارياف ومش هنخلص .
كنت لسه بتلفت حواليا بحاول اشوف اقدر ارجع ازاي .. اوووف المشكلة دلوقتي ان احمد والبيت كلة زمانه صحي هما بيصحوا بدري اصلا ..
_ لو حبيب مش عاجب .. معاكي وليد
التفت على الصوت الضايع اللي ورايا دة
_ انتوا تاااني ... انتوا عايزين مني ايه ... مش عيب عليكوا اللي بتعملوا دة
لقيت الزفت التاني دة جاي هو كمان ومعاه صاحبهم التالت
_ وانت يا استاذ انت كمان مش عيب عليك التصرفات دي هنا في بلدك ..قدام اهلك ؟!
لقيتة اتعدل كدة في وقفته وبرضه اتكلم بتناكة
_ أولا انا مش من هنا .. انا اتولدت واتربيت بعيد عن الفلاحين دول و حياتي وبلدي مش هنا ... عشان بس تكوني فاهمة انتي بتتكلمي ازاي وبتقولي ايه .
_ وكمان بتستعر من اصلك... انا عمري ما عاشرت الفلاحين زي مابتقول عليهم.... اخري كنت اشوفهم في التليفزيون... بس حقيقي من أنضف واحسن الناس اللي اتعاملت معاهم في حياتي . .. كفاية ان احمد انضف راجل قابلته في حياتي كان منهم هو و مامته واخواته .
...............................
_ ازيك يا خاله ... بقولك مشوفتيش سيرين مراتي و ... و واختي ريم معاها خرجوا سوا بجيبوا طلبات .. بس غابوا شوية وانا قلقت عليهم .
_ لا والله يا احمد يا ابني .. ده أنا لسه يدوب خارجة من الدار انا وعمك سعيد عشان نروح الغيط اهو ومشفناش حد لسه.
هتكون راحت فين بس لفيت عليها حوالين البيت والبيوت اللي جنبنا كمان ..
ايه دة معقولة يكون......
مشيت بسرعة في اتجاه الترعة معقولة تكون راحت عندها تاني وحصلها حاجة ؟!!!!!!
وقفت قصاد نفس المكان اللي وقعت فيه ودورت عليها بعنيا وانا قلبي بيدعي ان يكون مجرالهاش حاجة... بس برضه ملهاش وجود ... الحمد لله
طب هتكون راحت فين بس.... قلبي مش مطمن .. قلبي علطول بيخاف وهي مش قدام عنيا .
............................
الكلام مع العيال دي طول ... حسيت ان الناس بدءت تكتر في الطريق وبدأوا ياخدوا بالهم من وقفتنا دي
_ بقولك ايه انت وهو ... انا مش عايزة اشوفكوا تاني وياريت محدش منكوا يحاول يوجهلي كلام بعد كدة حتى لو شافني صدفة .
قولت كدة والتفت عشان اسيبهم وامشي لقيت اللي بيشدني من ايدي
_ ايه دة انت اتجننت ... سيب ايدي يا متخلف انت .
_ وليد!!! قولتلك يلا نمشي وبلاش فضايح .
_ مش دي مرات الاستاذ احمد... هي مالها واقفه كدة لية ومين اللي معاها دول؟!
_ اه هي ... بس بقولك ايه يا ابو سماح ملناش دعوة يا اخويا هي مصراوية مش من هنا وتلاقي دول جايين معاها .
_ استني يا وليه .. دي باينها بتتخانق معاهم
_ انت متخلف يا ابني .. بقولك سيب ايدي والا والله اقطعهالك .
_ طب اقطعيها وانا راضي
_ وليد لو مجتش معانا دلوقتي.. انا هسيبك وامشي .
_ في حاجة يا بنتي ... حد بيضايقك هنا .
_ عم متولي!!!!... حضرتك عم متولي والد سماح صح؟!
_ ايوا انا ...في حاجة مع الجماعة دول ولا حاجه ؟!
_ سيرين !!!!!!
ايه دة مش دة صوت احمد .. التفت ابص... ايوا هو وجاي على هنا اهو... يا نهااااار مش هيفوت دلوقتي
_ سيرين!!! في ايه ومالك واقفه هنا كدة لية ؟!
_ احمد !!!.. مفيش والله انا كنت بتمشى عادي .. وبعدين.. وبعدين....
سكت معرفتش اكمل اقول ايه ... فضل يبصلي مستنيني اكمل كلامي وافهمه إيه الوقفه المهببه دي .. وبعدين بص للواقفين باستغراب حسيته مش فاهم حاجه.. صعب عليا بجد اني حطيتة في الموقف دة.
_ مفيش حاجه يا استاذ انت ... انا واصحابي كنا بنتمشى عادي ... وهنمشي اهو.
_ يلا يا وليد .. يلا يا حازم .
اخيرااا اخدهم وماشيين الحمد لله...
_ خلي بالك مراتك بتدي مواعيد في السر من وراك يا رجولة.
يا لهوووووووي .. بيقول ايه المجنون دة
_ وليد!!!! انت اتهبلت يلا بقولك!!
لقيت احمد راح ومسك فيه
_ بتقول ايه يا روح امك ؟!
_ الله الله الله.. هو انت مش قادر عالمدام .. هتيجي تتشطر علينا احنا ... دة احنا حتى ملحقناش نعمل حاجه من اللي كنا متفقين عليها .
_ انت بتقول ايه يا متخلف انت... متصدقوش يا احمد دة بني ادم مجنون.
_ لا يا احمد يا ابني.. انا واقف هنا بالحمار بتاعي من بدري ومتابعهم ... مراتك كانت ماشية في حالها .. بعدين لقيت الاخ اللي بيتكلم دي وعايز يوقعكوا في بعض وقف وكان باين كدة انه بيتشاكل معاها
_ إيوا يا استاذ احمد .. عمك متولي معاه حق اني كمان كنت معاه وشوفنا الافنديا دول بيتخانقوا معاها
_ شكرا بجد يا طنط .. شكراً يا عمو متولي .. صدقهم يا احمد والله البني ادم دة مختل وكداب ... والله هو دة اللي حصل.
_ لقيت احمد بصلي بطريقة عمره ما بصلي بيها قبل كدة ... وبعدين بص للحيوان التاني اللي اسمه حبيب دة
_ مش انت برضه ابن اخو والد عزت جوز اختي مريم ؟
_ ايوا انا ... فيها ايه يعني!
_ اه .. طب بقولك ايه انا من وقت مشوفتك انت و العيال دي في الفرح وانا قولت انكوا مش مظبوطين فاحسنلك كدة تاخدهم وترجع تاني مكان ما جيت.
_ ليه يعني هو احنا كنا قاعدين في بلاد ابوك.. احنا قاعدين في بلد صاحبنا عند اهله .. انت بقى مال اهلك
_ لااااا يا احمد ... بلاااااش
.......................
_ خلاص يا استاذ احمد.. حقك عليا انا .
_ انت بتتحقلوا يا بابا بعد اللي عملوا في اصحااابي وانا واقف .
_ انت تخرس خاالص .. قدامك نص ساعة وتكون خارج من البلد وتسبقني عالقاهرة انت وشوية الصيع اللي جايبهم معاك دول ... واحسنلك متخطيش البلد دي تاني طول ما انت جاررهم معاك في كل حتة كدة ...وانا ليا حساب تاني معاك اما ارجع .
بصلنا انا واحمد.. يا حيوان وليك عين كمان .. وبعدين سابنا وطلع
_ استاذ احمد.. ممكن افهم مرات حضرتك كانت بتعمل ايه لواحدها كدة عالترعة في وقت زي دة وبالبس دة ؟!
لقيت احمد التفت يبصلي وكانة اخد بالة دلوقتي ... انا والله كان لبسي محترم بس نسيت البس العباية والطرحة كالعادة.
_ مراتي مش من هنا ومتعرفش اصول الارياف .... وبعدين مفتكرش ان افعالها تخص حد غيري .
_ يا سيدي ماشي مقولناش حاجة ... بس انا بتكلم في الأصول زي ما قولت.
التفت بصلي بصتة الغضبانة دي ... اول مرة اشوفها منه كان النهاردة... واضح اني غلط قوي ... بعدين بصلة واخدني من ايدي ومشينا .
...............................
_ انا والله صحيتك بس انت مرضتش تقوم .. وكنت رايح في النوم خالص.
_ برضة مكنتيش تنزلي من اوضتك أصلا الا لما اعرف رايحة فين .. افرضي كان جرالك حاجة زي ما وقعتي في الترعه قبل كدة وكنتي هتموتي .
_ الف بعد الشر عليها يا ابني ... خلاص بقى لم الدور محصلش يعني حاجة لدى كله .
_ يااااا امي محصلش حاجه ازاي بس .... ما انتي مسمعتيش الواد دة والصيع اللي معاه قالوا عنها ايه ؟!
_ خلاص بقى يا احمد عشان خاطري وبعدين يعني هي مكنش قصدها ومغلطتش لدة كله .
_ ريييييييم..... يعني ايه مغلطتش !!!!!!!!
_ ايوااا مكنش قصدي ... وانا معملتش حاجة غلط لدة كلة يا احمد !!
_ وايه بقى الغلط اللي حضرتك كنتي مستنياه يحصل... وايه الزفت اللي انتي كنتي خارجة بيه دة اصلااا؟
_ انا نسيت البس العباية والطرحة بتوع مريم .
_ نسيت ..نسيت ... مبتفتكريش حاجة الا اللي يضايقني وبس .
_ انا يا احمد !!!!
_ ايوا انتي وانا حقيقي زهقت ... زهقت ومليت.
وبعدين سابني وخرج ... متحملتش بصات اختة ومامتة وطلعت اوضتي اعيط فيها براحتي .
.................................
فضلت قاعدة فوق في الأوضة لفترة طويلة مستنياه ييجي عشان أعتذرلة انا عارفه ان أنا غلط وحقيقي مكنش قصدي احطة في الموقف دة او ازعلة كدة ... انا من يوم ما عرفت احمد وانا مشفتش منه غير كل خير ، مينفعش بعد كل دة ازعلة كدة.
نزلت تحت اشوفه يكون جه
لقيت مامتة قاعدة قدام الفرن ومعاها ريم بتساعدها
_ تعالي يا سيرين واقفة عندك كدة لية يا بنتي !
نزلت فعلا وقربت منهم
_ هو احمد مجاش يا ماما ؟!
سابت اللي في ايديها والتفتت تبصلي
_ لأ لسة مجاش من وقت ما خرج.
بصتلي شويه وبعدين قالتلي
_ تعالي اقعدي ولا مش عايزة تساعديني انا وريم
_ هو انتوا بتعملوا ايه يا ماما ؟
_ بخبز رغيفين سخنين عشان ابقى ادي احمد وهو مسافر دة يا حبة عيني علطول يقولي مبياكلش العيش الفلاحي الا لما ينزل هنا .. بيصعب عليا
اتنهدت اول ما جت سيرتة ... يا ترى راح فين واتاخر كدة لية ؟!
مامتة بصتلي وسكتت شكلها عايزه تتكلم بس واضح انها شايفة ان كفاية اللي احمد قاله .
_ هو احمد بيحب العيش دة قوي كدة يا ماما ؟
ردت وهي بتطلع العيش السخن من الفرن
_ احمد بيحب كل حاجه هنا... العيش الفلاحي والجبنة القديمة والزرع والحصاد بس اكل العيش بقى يا بنتي وكونه عايز يفضل في مصر علطول يمكن يلاقي وظيفة حلوة غير اللي كان فيها .
_ خصوصاً دلوقتي يا أما بعد ما فتح بيت تاني وبقى عنده زوجة مسؤلة منه.
_ قصدك انا يا ريم؟!
_ وهو يعني أخويا متجوز غيرك يا سيرين ؟!
ضحكت هي ومامتة .. ابتسمت انا كمان رغم الضيقة اللي حاسة بيها من بعد ماخرج وهو متضايق
_ قومي يا ريم هاتي حطب من فوق... اللي قدامي قرب يخلص
_ طب ومين هيديكي عجين يا أما .
_ مرات اخوكي هتقعد مكانك على ماتنزلي ...
قعدت فعلا مكانها وانا متحمسة اساعدهم .. انا بجد بحب اعمل الحاجات دي قوي ... وبدءت فعلا احطلها العجين في البتاعة اللي بتخبز بيها دي ...
_ ايوا كدة ... متحطيش كتير .. زي ما ريم قالتلك قبل ما تقوم .
فضلت العب في العجين بايدي كتير قوي .. احطلها شويه وعلى ماتعملهم عيش العب في العجين ... الله ...متعة .
ريم نزلت حطب كتير قوي وبعدين جت قعدت جنبنا
_ انا خلصت خليني بقى اقعد مكانك عشان متتعبيش
قولت وانا لسه بلعب في العجين وبرسم فيه بايدي
_ لأ يا ريم سبيني انا بعمل .
وقعدنا فعلا نخبز عيش كتير قوي طول اليوم .. واضح ان احمد مش هياخد معاه حاجة غير العيش وانا ..
_ لما ييجي احمد يا سيرين هقوله انك خبزتي معانا العيش كله عشان اما ياخد منه يبقى عارف انك عملاه معانا زي البسكويت.
ابتسمت .. انا بجد ببقى مبسوطة قوي لما اعمل حاجه وهو ياكل منها خصوصا لما تعجبة .. بس يا ترى دلوقتي هتعجبة برضه ولا هيفضل زعلان كدة
لقيتة فاجأة بيدخل من باب البيت المفتوح ..
_ سلام عليكم
ردينا كلنا السلام ومن غير ولا كلمة بصلي وبعدين بعد عينيه وسبنا وطلع فوق .
_ قومي يا سيرين ... قومي اطلعي وراه وطيبي خاطره بكلمتين .. احمد طيب ومبيزعلش من حد .
اترددت شوية وبعدين قومت طلعت فعلا ... انا نفسي ميزعلش مني ابدا ... يارب يرضى يتصالح .. يااارب يرضى يتصالح .
......................
خبط على الاوضة خبطة صغيرة وبعدين فتحت ودخلت لقيتة بيغير هدومة وفعلا غير هدومه لتيشرت بنص كم وبنطلون قطن كان جايبهم معاه من هناك وبعدين راح للسرير ونام
ايه دة هو هينام كدة .. من غير ولا كلمة.. طب مش هياكل دة طول النهار بره!!
قربت انا منه وقعدت عالجهه بتاعتي من السرير وميلت عليه وحطيت ايدي على دراعة واتكلمت بصوت هادي
_ احمد.... انت هتنام دلوقتي ؟!!
مردش عليا وفضل ساكت
_ احمد.... انا أسفه... مش هعمل كدة تاني .
برضه مش بيرد عليا
_ احمد ممكن تتصالح لو سمحت ... انا مش عايزة نبقى متخاصمين كدة ... انت عارف اني معرفش حد غيرك هنا ... انت كمان هتخاصمني ؟!
برضه مردش عليا ... لقيت نفسي عيوني دمعت وصعبت عليا نفسي .. فكرت انزل تاني بس مش حابه مامته واختة يشوفوني كدة .
قومت وانا الدموع بدءت تنزل على خدي وغيرت هدومي للبيجامة اللي بنام فيها و هديت نور الاوضة وروحت نمت جنبه ... وفضلت افكر ازاي هنام دلوقتي بعد ما اتعودت على حضنة .. خصوصاً من بعد ما تممنا جوازنا وهو مبقاش يبعد عني ابدا واحنا نايمين ... كان عنده حق لما قال نستنى لما ناخد على بعض .. حقيقي احساسي كان مختلف .. قد ايه انا كنت خايفه اول يوم اتجوزنا فيه وفعلا كنت حاسة اني مع راجل غريب عني واتحاملت على نفسي كتير قوي عشان اقدر اتخطى كل الاحاسيس المخيفة دي ... لكن لما قربلي يوم فرحنا وقرر فعلا يخلي جوازنا حقيقي وقتها كان شعوري واحساسي مختلف حسيت باللهفة لحضنة وقتها وعشان كدة مش هعرف انام دلوقتي وهو مديني ضهره كدة وزعلان مني .. ياااه لية بجد كل حاجه حلوة في حياتي بتروح بسرعة كدة ... حتى احمد زعلان مني وشكلة مش هيرضى يصالحني .
غصب عني صوت دموعي طلع بعد ما كانت بتنزل بصمت ... حطيت ايدي على بوقي اكتم صوت عياطي .. بس حقيقي انا صعبان عليا نفسي قوي . ..
لقيت فاجأة اللي بيشدني جامد لحضنة ... ضهري بقى لازق لصدره.. فاجأة التفت لية..
_ احمد ....
لقيتة شدني اكتر وبعدين اتعدل لحد ما بقى فوقي وشة لوشي
_ بتعيطي ليه ... هو مين دلوقتي اللي مزعل مين ؟
وشة كان قريب من وشى قوي
_ عشان انت مش راضي تصالحني .
لقيتة ابتسم فاجأة
_ هو مين اللي المفروض يصالح مين دلوقتي!
_ انا اسفه .
سكت شويه و عينيه بتمر على كل تفصيلة في وشي وانا قريبة منة قوي كدة وبعدين لقيتة انحنى وباس خدي
_ انتي عارفه انا كنت قلقان عليكي ازاي النهاردة اول ما صحيت وملقتكيش جنبي ؟
وبعدين انحنى وباسني على خدي التاني
_ وعارفه كان هيجرالي اية لما سمعت الكلام اللي اتقال دة ؟
_ والله كداب يا احمد .. انا والله...
لقيتة قاطعني وحط بوسه خاطفة على شفايفي وقال
_ متحلفيش عشاان انا مصدقك من قبل حتى ما اسمع اي كلام ... بس انا عايزك طول ما احنا هنا متروحيش مكان الا وانا معاكي .. وانا بالذات حتى مش ريم .. ممكن ؟
هزيت راسي بمعني حاضر وانا ببتسم من خوفه عليا اللي خطف قلبي دة .
_ عايزاني بقى اتصالح زي ما قولتي ؟
_ ايواا .. ياريت تتصالح .
سكت شوية وهو بيبصلي بابتسامتة القمر دي الي زادت جمال وهو قريب كدة وبعدين قرب من ودني وقال
_ فاكرة البتاع اللي كنتي لبساه هناك لما كنا في الشقة اللي في القاهرة... لما ساعتها اتعصبتي وقولتيلي اوماااال انا اتجوززززتك ليييه !!!!!
ابتسمت بكسوف من اليوم دة كلة ..وبعدين قولت بدلع
_ لأ مش فاكرة .. انهو دة ؟
_ هنستهبل مش هتصالح وهفضل زعلان.
_ لأ خلاص افتكرتة افتكرته ... بس دة مش هنا دة هناك في القاهره.
_ كدااااابة ... انا شفتة في شنطتك .
_ ايوا يعني عايز ايه دلوقتي ؟!!
_ تقومي تلبسيه بدل البيجامة اللي انا زهقت منها دي .
ضحكت بكسوف لقيتة هو كمان ضحك وقربلي اكتر
_ بس على شرط .. فاكرة شكلك كان عامل ازاي يومها .. اهو انا عايزك كدة بقى .. بالظبط.
_ يا سلاااااام .. اومااال وقتها سبتني وخرجت ليه وكأني مش عجباك !!!
_ مين دي اللي مكنتش عجباني هو انا عرفت انام الليلة دي اصلا .
_ يعني انا لو عملت كدة هتتصالح ؟؟
_ هتصاااالح جداااا .. قوووي يعني.
ضحكت برضه بكسوف
........................
بعد شويه ...
_ ايه... مطلعتيش لاخوكي ومراتة العشا ليه ؟
_ فضلت اخبط عالباب ييجي ساعة ولا حد عبرني ... باينهم ناموا .
_ يووو هيناموا من غير عشا ... طب خلاص حطي الاكل دى عندك والصباح رباح .
.……...........……...............
صحيت على لمسات غريبة على وشي وبعدين حسيت بيها على دراعي ... فتحت عيني
_ صباح الخير..
اية الابتسامه القمر دي ياريت كل يوم اصحى وانت في وشي كدة
_ صباح النور .. بتعمل ايه ..
_ بحاول اقرا التاتو اللي على دراعك دة ؟
اتعدلت وابتسمت وانا بكلمة عن بابا
_ دي ...بابا وحشتني بس بالألماني... ودة تاريخ ميلادة وميلادي ..ما احنا عيد ميلادنا كان بيوافق نفس اليوم... وانا عشان بحب الصدفة دي حطيتة على دراعي برضه.
فضل يبص للتاتو كتير قوي وبعدين وكالعادة من وقت ما قربنا ... قرب من دراعي وباسه
_ انا بحب التاتو دة قوي على فكرة ... بس دلوقتي حبيتة اكتر.
_ بجد يا احمد ... اصل انا كمان بحبة قوي .
_ دة انا اللي بحبة قوي والله.
قالي كدة وهو باصص في عيني وبعدين قال
_ بقولك ايه الساعة دلوقتي ٧ مش كان نفسك تتمشي في الوقت دة ... يلا ننزل وانا هوديكي الارض بتاعتنا وهفرجك على حاجات كتير هناك هتعجبك.
_ إيه دة .. هو انتوا عندكوا ارض ؟!!
_ يعني قطعة أرض صغيرة كدة على قدها وعشان كدة أديناها لعم متولي يزرعها مع ارضه .كاايجار يعني .
_ ماشي.... هقوم أجهز علطول و ننزل .
ايه رايكوااا ...فصل طووووويل اهوووو تعويض عن تأخيري ...يااارب بس يعجبكواااا ❤️🥰
وياريت تقولولي توقعاتكوا ايه للي جااااي .. عشااان عندنا احداااث مهمة قوووي البارت الجاااااي ... احداااث هتحدد مصيرهم مع بعض وهل هيكملوا ولا مش كل الحكايات الحلوة بتنتهي نهاية سعيدة ؟!
شاركوني كدة رأيكواااا و متنسونيش في التفاعل عشااان دة الحاجة الوحيدة اللي بتشجعني اكمل وتحسسني ان في ناااس مستنياني ... يلااا قراءة ممتعة يا احلى قرااااااااء واحلى قمرااات❤️❤️❤️🥰...رانيا أبو خديجة 💖
#حمل_بالتراضي
#اخر_امل
#كتابات_رانيا_أبو_خديجة
↚
روايه حمل بالتراضي الفصل الحادي عشر
الفصل الحادي عشر
#حمل_بالتراضي
#رانيا_ابو_خديجة
خرجت من الحمام ودخلت الاوضة وانا بنشف شعري لقيتها واقفة قدام الدولاب
_ مالك محتاره كدة لية ؟!
_ هو انا لازم البس العباية يا احمد ؟
_ انتي شايفة ايه!! ... هينفع يعني تنزلي من غيرها تاني.
لقيتها بتخرج من الدولاب فستان وقالت وهي بترفعة في وشي بحماس
_ دة ... والله جميل ومحترم اهووو .. ومحدش هيقول حاجه .
ياربي يعني اعمل فيكي ايه انا لو عليا عايز اعملك اللي انتي عايزاه .. قربت منها وحاوطها بايدي
_ هو انتي فاكره اني مش عايزك تلبسي كدة عشان خاطر اللي بيتكلموا
_ اومال عشان ايه بس ؟
قالت كدة وهي مقموصة قمصتها اللي انا بحبها دي كالعادة مديت ايدي ومسكت دقنها احاول ارفع وشها الجميل دة ليا
_ لأ غلطانه .. انا قصاد انك تكوني مبسوطة ميهمنيش حد .. بس انتي لو تلاحظي اول ما بتخرجي من باب البيت بتلاقي كل العيون بصالك ....عارفه ليه ؟
_ ليه بقى؟!
_لانهم مشفوش واحدة جميلة كدة وبتلبس كدة الا انتي.
_ يا سلااااام... لأ في بنات هنا كتير حلوة قوي .
قربت منها زيادة وقولتلها بابتسامة مبتخرجش غير ليها لواحدها
_ كلهم حلوين يا ستي ... بس مش سيرين.
لقيتها ابتسمت
_ بجد يا احمد شايفني حلوة قوي كدة؟
اتنهدت وبعدين بصتلها
_ ممكن تسمعي الكلام بقى وتلبسي العبايه
_ طب بص بص دة والله جميل ومحترم وبعدين انا معاك محدش هيبصلي بصة وانت معايا .
اخدت الفستان من ايدها وفضلت ابص فيه فستان وردي اول مره اشوفة عندها .. بس فعلا شكلة جميل .. خلتني نفسي اشوفه عليها
_ طيب البسيه على ما أصلي واجي اشوفه ولو ينفع مش هزعلك .
وقفت قدام المرايا ارفعلها شعرها زي ما بتحب .. النهاردة بالذات عايزها تبقى مبسوطه تعويضا عن امبارح...كمان احنا خلاص هنسافر وانا عايز ذكرياتها بالمكان هنا تبقى كويسه .
بصتلها في المرايا بعد ما خلصت .. شكلها القمر دة مع الفستان الوردي دة خلاها احلى ما هي حلوة اصلا .. هو انا عملت ايه عشان يكون ربنا بيحبني كدة ويرزقني بيها!!
_ اكيد بيحبني .
_ بتقول ايه ؟
ابتسمت
_ لأ مفيش يلا عشان نلحق الجو وهو حلو كدة قبل الشمس ما تطلع وتحرقنا.
....................................
_ صباح الخير يا أمي .
_ صباح الفل يا حبيب امك ... رايحين فين كدة عالصبح ؟!
لقيتها جريت على امي بحماس
_ احنا يا ماما رايحين الغيط .
_ غيط !! غيط ايه يا احمد دلوقتي.
ضحكت على حماسها دة
_ همشيها يا امي شويه في ارضنا وافرجها عليها ... بقولك ايه ما تيجي معانا انتي وريم واهو نفطر هناك في الهوى.
_ حق يا احمد من وقت ماعمك متولي اجر الارض وانا معتبتهاش ... بس لا يا حبيبي روح انت ومراتك قضوا يومكوا هناك وامبسطوا
لقيت ريم خارجة من اوضتها شكلها لسة صاحيه من النوم
_ وفيها ايه يا أما انا بقالي كتير مروحتش الغيط .. وعايزة أشم هوا .
_ طيب يا ريم اجهزي يلا وانا وسيرين هنستناكوا
_ خلاص يا حبيبي اسبقنا انت وانا وريم هنجهز الفطار ونحصلكوا .
...............................
الله الغيط دة تحححفه ... من وقت ما جيت وانا بمشي في الطريق جنب الشجر والزرع لكن منزلتش ارض خضرا كدة لواحدي ابدا زي دلوقتي
_ ازاي يا احمد سايبين الجمال دة كله ومديينوا لعمو متولي
لقيته ضحك وقرب وقالي
_ عشاان محدش فاضيلها يا سيرين.. الارض محتاجة اهتمام ورعاية والزرع محتاج فلاح
بصتله بابتسامه
_ وانت يعني مش فلاح ؟
_ لأ انا فلاح وافتخر والله... بس الارض دي لو مكانتش راحت لعم متولي كانت اتظلمت قوي في ظروفي وظروف شغلي.
_ هو انت يا احمد لو مكنتش موظف في الكومباوند دلوقتي.. كنت هتشتغل ايه؟
رد عليا وهو بيبص عالنخل العالي دة
_ تعرفي اني قبل ما اشتغل في الشركة اللي كنت فيها كنت بشتغل طباخ في مطعم ؟
_ ايه دة بجد .
_ اه... لما كانت تزنق قوي يعني ... لحد ما اتخرجت واتعينت في الشركة دي وقتها بقى قلنا الدنيا هتظبط... وهما سنتين بالظبط ولقيناها بتمشينا واحد ورا التاني... واضطريت بعدها ادور على شغل تاني اي شغل... لحد ما جيت الكومباوند
وبعدين ابتسم وكمل
_ وحظي حلو عشان شفتك و عرفتك.
وبعدين لقيتة اتنهد وقال
_ الحمد لله كان نصيبي انها متقفله شويه بس انا صابر وعارف ان ربنا كريم واديني بسعى واكيد في وقت هلاقي وظيفة زي اللي كنت فيها وافضل كمان .. ربنا كريم وانا ثقتي في كرمه كبيره قوي .
_ احمد .. انا واثقه ان ربنا هيكرمك عشان انت راضي كدة.
_ يعني انتي مش متضايقه من وضعي دة؟
_ بالعكس ... انا مبسوطة قوي لما بتتكلم معايا عن نفسك وبعدين انا أوقات بحس اني فخورة بيك وباخواتك كمان .. عارف... انا أوقات بحسدهم انهم عندهم أخ زيك.
بصتلها
_ طب ما انا جوزك دلوقتي.. يعني انتي بقيتي حتة مني كمان زيهم .
ابتسمت كالعادة بكسوف او بحيرة معرفش
_ احمد هي الشجرة دي فيها بلح
_ اه دي نخلة ... استني اطلع اجيبلك .
_ بلاش احسن توقعك.
_ متخافيش عليا.. انا بطلع النخل دة من وانا صغير.
طلع فعلا وهز النخلة من فوق والبلح نزل كلة عليا كتير قوي كنت مبسوطه كالعادة وانا معاه ...
اخدت كل البلح في طرف فستاني
_ انا عايزة اكله ... يا ريتني كنت جبت معايا ازازة ميا اغسله بيها .
لقيتة ضحك وبعدين اخد البلح من فستاني وقالي تعالي
اخدت انا كمان باقي البلح في ايدي وروحت معاه
مشينا كتير مع بعض لحد ما وصلنا عند مكنة بتسقي الارض اللي جنبنا لقيته مد ايدة بالبلح تحت الميا بصتله
_ متخافيش الميا دي نضيفة ولازم تكون نضيفة والا تبقى مشكلة.
هي الميا فعلا كان شكلها نضيف وشفافة قوي مديت ايدي انا كمان اغسل باقي البلح بتاعي بس ايه دة الميا شديدة قوي ... لااااااا ... الميا اخدت كل البلح اللي في ايدي وقعته !!
_ لاااااا ... البلح بتاااااعي !!!!
احمد لقاني ميلت بجزئي الفوقاني على الحوض الكبير الواسع اللي مية المكنه بتنزل فيه يمكن الحق البلح قبل ما يجري في الترعة تاني ... لقيته لف دراعة حوالين وسطي وشدني
_ يا مجنونة هتقعي ..
لقاني لسه بدور عالبلح لدرجة ان باقي جسمي نزل قام شدني بالعافيه بدراعة
_ عجبك كدة اديكي غرقتي نفسك اهو !
_ شوفت .. معرفتش الحق غير دول
لقيتة بيبصلي وبيضحك جامد قوي
_ بتضحك على ايه دلوقتي... عجبك منظري دة وانا شعري كلة مبلول كدة وبرضه ملحقتوش .
لقيتة قرب مني وهو بيحاول يكتم ضحكة
_ لأ مش بضحك عليكي.... انا بضحك عالبلح.
وبعدين ضحك تاني بشكل اول مره اشوفه
_ اصلك مشوفتيش نفسك وانتي هترمي نفسك ورا البلح بالاصرار دة .
هو اه ضحكته قمر و والله بحبها بس برضه ميضحكش عليا
وقفت وزعلت وكتفت ايدي بزعل وقمص .. ايوا قرب بقى وتعالي كدة ..
_ خلاص بلاش البوز دة .. رغم انه حلو وبحب اشوفه بس مش بحبك زعلانه.... ايه دة !!! يااا مجنونه !!!!
رشيته بالميا انا كمان
_ احسن عشان يبقى احنا الاتنين مبلولين ومتبقاش تضحك عليا تاني
فضل ينفض في التيشرت اللي لابسه والبنطلون الچينز من الميا
_ بقى كدة يا سيرين بترشيني وتضحكي عليا
ضحكت برضه على نرفزته دي
_ احسن عشان تبقى تضحك عليا وانا مبلولة تاني .
_ كدة طب تعالي بقى والله ما هسيبك... ومفيش بلح بقى.
فضلت اجري في الارض الواسعة عالزرع لحد ما حصلني بصيت عليه وانا مش قادرة اوقف ضحك وياريتني ما عملت كدة... روحت واقعة على ضهري وبرضه مش عارفه اوقف ضحك
_ خلاص والله... مش هعمل كدة تاني ..
لقيتة بابتسامتة دي راح مقرب عليا وانحنى لحد ما بقى وشه في وشي
_ كدة تبهدليني ميا بالمنظر دة .. امي تيجي دلوقتي اقولها ايه ها ..
_ قولت من بين ضحكي
_ متقولش انت .. انا اللي هقولها
وانفجرت ضحك مرة تانية .
لقيتة انحنى عليا اكتر ... ايه دة هو عايز يعمل ايه.. احنا في الغيط الزرع يشوفنا.
_ سيرين...حد قالك قبل كدة ان ضحكتك دي مشكلة ؟
مفهمتش قصده قوي يعني...
_ احمد انت بتعمل ايه ؟!
_ هعمل ايه يعني... انتي مراتي ... محدش لية حاجه عندنا
قال كدة وهو بيقرب من وشي زيادة وعلى وشه ابتسامة بنية كدة مرتحتلهاش
_ لأ يا احمد... حد يشوفنا مينفعش ..
_ انتوا بتعملواااا ايه هناااا ان شااااء الله ؟!!!
انا و احمد رفعنا وشنا في نفس اللحظة .. ايه دة ... سمااااح !!
لقيت احمد انحنى بوشه وحط بوسه على خدي فعلا .. ايه دة ياربي عالكسفه .. وبعدين قام واتعدل وساعدني اقوم وساعدني انفض فستاني كمان
_ صباح الخير يا سماح ... في حاجة ؟
_ ايوااا في ... بتعملوااا ايه في ارضنااا يا محترم انت وهي ؟!!!
_ اية ارضنا وارضكوا يا بنتي ..و بعدين خليني افكرك دي تبقى مراتي يعني بنعمل ايه دة شئ ميخصكيش .
بصتله وكأنها بتلومة انه يكلمها كدة قدامي
لقيته قرب عليها وكلمها المرادي بطريقه اهدى لما لقاها سكتت واتكسفت كدة
_ سماح ... خليكي فاكرة اني لسة بعزك زي اخواتي البنات .. فلو سمحتي بلاش تزوديها كدة ... انتي من وقت ما مديتي ايدك على سيرين وانا مش طايقك مكدبش عليكي بس برضه بفكر نفسي انك اختي برضه فياريت متزوديهاش .
بصتلنا بدموع في عنيها وبعدين سابتنا ومشيت
_ ليه يا احمد تزعلها كدة ... بجد بتصعب عليا .
_ لازم افوقها يا سيرين عشان متفضلش رابطة نفسها بوهم .. سماح انا بعزها وبخاف عليها ولو واحدة من اخواتي مكانها هقسى عليها كدة برضه من خوفي عليها .
_ صحيح يا احمد.. هي فعلا مامتك كانت عايزة تجوزك سماح قبل جوازنا.
لقيتة بصلي كدة وابتسم
_ انا عايز اقولك لو مكناش اتجوزنا .. انا كان زماني عندي عيلين من سماح دي .
_ ايه... نعم !!!
لأ اتخضيت بجد من كلامة.. يعني فعلا ممكن يفكر و سماح تبقى دورتي .
لقيته فاجأة ضحك تاني
_ احمد قول انك بتكذب ..صح ..بتكذب .
_ اصلك مش عارفه امي بتعز سماح ازاي .. لانها كانت طول الوقت معاها في البيت وبتساعدها في كل حاجة على أساس مرات ابنها بقى وكدة .... ومش قادرة تقتنع اني صعب اشوفها مراتي.
_ طب خلاص .. مش عايزة اعرف ... بقولك ايه هو احنا المفروض هنمشي من هنا امتى ؟
_ يعني خلاص المفروض انزل الشغل من الاسبوع الجاي... بس ليه السؤال .. ايه زهقتي من هنا.
بصيت حواليا بقهر زهقت من هنا ايه بس انا نفسي نعيش هنا سوا... بس لأ احنا لازم نمشي ونبعد عن سماح دي اووف .
......................................
بعد شوية مامته جت ومعاها ريم شايله صنيه كبيره متغطية بطرحة كبيره عليها الفطار
قعدنا كلنا في الارض عالزرع الاخضر مع الهوا اللي ريحتة كلها خضره مع اصوات الميا والمكن من حوالينا... حاجة كدة فوق الوصف .... لو فضلت اوصف في جمال الجو كدة مش هعرف اوصل الجمال دة كلة
وقعدنا ناكل كلنا مع بعض .. احمد لاحظ عمو متولي ومراته بيشتغلو في الأرض.. بياخدوا الزرع اللي زرعينه في ارضهم عشان ياخدوا على الحمار و يمشوا بعد كدة
_ ايه يااااا حااااج.. اتفضل الفطار معانا انت وخالتي ام سماااح .
_ تشكر يا حبيبي... نسيبك براحتك مع الجماعة.
ردت مامته
_ يا اخويا جماعة مين ... وانت غريب يا متولي .. تعالى يا اخويا تعالى ..قرب الفطار موجود اهو وخير ربنا كتير.
وبعد كلام ما بينهم حلو قوي... حاسسني قد ايه هما جيران من زمان ويعرفوا بعض كويس قوي ... أخيراً جه هو ومراته و نادى على بنتة سماح كمان اللي كانت بتظبط البتاعة اللي عالحمار عشاان يحطوا فيها الزرع
وقعدنا كلنا مع بعض عالأرض الخضرا دي ومرات عمو متولي اخدت جرجير من زرعهم وغسلتة زي ما انا واحمد غسلنا البلح و بعدين جابتوا واكلنا كلنا مع بعض.
_ امممم ... حلو قوي يا احمد الجبنه القديمه دي .. ينفع ناخد منها معانا القاهره؟
لقيتة بيحط في بقى بيضه مسلوقه بحالها
_ لأ مش هينفع عشان انتي اول ما بتشوفيها عالاكل بتسيبي كل الاكل ومبتكليش غيرها .
_ طب وفيها ايه دي .. طعمها حلو قوي.
اخد جرجير من قدام خالتو ام سماح وبرضه حطة في بقي بالعافيه ، وبعدين لقيتة قرب من ودني ووشوشني
_ فيها الحساسية اللي بتطلع في كل جسمك دي وبتزيد كل يوم .
بصتلة بمعنى اخدت بالك امتى
وبعدين حسيت بعيون هتحرقني التفت اشوف ايه دة لقيت سماح بتبصلنا بطريقة صعبة قوي .. انا مش زعلانه من سماح بالعكس انا متعاطفة معاها جدا هي معملتش اي حاجه غير انها حبت احمد وصرااحة عذراها هي معاها حق تحبة بس المشكلة دلوقتي انها بتحب حد هو مبيحبهاش .. دة واضح قوي .. بجد ربنا معاها ويعوضها باللي يفرحها .... حسيت اني شبعت .. قربت من احمد
_ احمد .. انا اكلت... ينفع نقوم نتمشى شويه ؟
بصلي بابتسامتة دي وبعدين قام اخد ايدي واستأذن منهم ...
رايكواااا بقى معاياااا كدة في الاحداااث وتوقعاتكواا في اللي جاااي وتفاااعل كتيييير بقااااااا عشااان احس انه عجبكواااا .. وعارفة انهم طولوا في البلد .. واني بقالي بارتين بوعدكم بالاحداث اللي هتحدد مصيرهم .... بس خلاص كل اللي انا كنت عايزة احطة عملته .... وهنبدء فعلاا في الجد ...بس مش عايزاكوا تخافواا متخافوش مش هنكد😂😂 لأ اوعدكوا انها هتفضل خفيفة عالقلب كدة ....قرأة ممتعة يا قمراااات 🥰❤️❤️
#حمل_بالتراضي
#اخر_امل
#رانيا_ابو_خديجة
