رواية حمل بالتراضي الفصل الثاني عشر والثالث عشر بقلم رانيا ابو خديجه
رواية حمل بالتراضي بقلم رانيا ابو خديجة
الفصل الثاني عشر #حمل_بالتراضي
#رانيا_أبو_خديجة
_ طب بعد اذنكم يا جماعة هنتمشى شويه حواليكوا هنا
واخدني من ايدي فعلا وبعدنا عنهم ...
_ قومي يا سماح ... هاتي كوزين درة خضر لخالتك ام أحمد نسينا يا بنتي نبعتلهم السنادي .
_ ملوش لازمة يا ام سماح وبعدين مين هياكل هو عاد سنان للدرة
_ يا اختي احنا لا بناكل ولا نعمل ... اهو العيال يبقوا يتسلوا فيهم اما يرواحوا .
_ حق يا خالتي والله ما دوقتة السنادي ... من وقت ما عم متولي خد الأرض وانا بستنى الدرة بتاعكوا كل سنة.
_ وماله يا أما ألف هنا وشفا... يووو ما تقومي يا بت يا سماح مالك متنحة كدة ليه يا به
_ حاضر يا أما حاضر... ربنا ياخد سماح ويريحها اووف .
_ مالها سماح يا ولية ... مش عجباني كدة ؟
_ يا اختي اهو دلع بنات مرق
..................................
_ تعالي يا سماح خدي الحمار دي روحية الدار وبعدين اطلعي بالخضار دى اديه لخالتك ام وجدي هتلاقيها قاعدة بالخضار جنب دارها
_ يا ابا انى مبعرفش اسوقها بتجري مني .
_ ما انتي اللي بتتعاركي معاها ... قولتلك براحة عليها مبتسمعيش الكلام .
_ حاضر.. اوووف
_......
_ يا بت مش كدة .. كدة الحمارة هتجري منك ...
_ يووو اني زهقت بقى ومش عارفه اني مرواحه الدار هى
كنا بنتمشى انا واحمد واحمد لاحظ ان عمو متولي واقف بيزعق في بنتة سماح .. لاحظ شويه من بعيد وبعدين اخدني من ايدي وقربنا منهم
_ خلاص خلاص يا عم متولي انا هراوح الحمارة وهوديهالك لحد الدار ... وخلي سماح تراوح هي .
هي تقريباً ما صدقت بصتلنا وسبتنا ومشيت بنرفزة .
_ هتعبك يا احمد يا ابني معلش
احمد قرب من الحمار ومسك الحبل بتاعه
_ متقولش كدة يا غالي .. روح انت كمل شغلك في الارض .. مش عايزني اساعدك في حاجة وانا هنا قبل ما اسافر؟
_ تشكر يا حبيبي هو ساعتين اهو واني وخالتك ام سماح هنرا وح اها.
عمو متولي رجع ارضة فعلا يكمل شغله فيها ومامت احمد فضلت قاعدة تتكلم مع ام سماح وريم كانت معاهم
_ الله.. انت بتعرف تسوق حمار
لقيته ضحك وهو بيجهز الحمار قبل ما نمشي بيه
_ بعرف اسوق الحمار !! هو عربية يا سيرين...دة حمار غلبان مجرد ما تحركيه هييجي معاكي ..
_ خليني اجرب كدة
واخدت فعلا منة الحبل بتاع الحمار ومشيت بية شويه وانا بصاله بابتسامة وحماس... ايه دة!!!! اااااه
لقيت احمد مسكني في حضنة قبل ما اقع
_ حصلك حاجة ؟؟
_ لأ انا بس اتكعبلت في الطوبة دي ..
لقيتة رفعني فاجأة من حضنة لفوق وبعدين قعدني عالحمار
_ يا احمد....خايفة أقع .
_ لأ متخافيش انا مسكك اهو .
بصتله ... قد ايه شكله حلو ومختلف كدة و هو بيبص على طول الأراضي اللي حوالينا ومضيق عينة من الشمس كدة .. ايه دة عندة تجاعيد تحت عنية .... مخليه شكله احلى... شكلة فعلا شقي كتير وتعب قوي .. بجد نفسي اشوفة علطول مبسوط وبيضحك .. بحب اشوفه كدة قوي .. وبضايق اما القيه سرحان ولا مهموم
_ تعرف يا احمد ان أنا اول مرة اركب حمار.
بصلي واخيرا شفت ابتسامتة اللي بقيت بحبها دي
_ وايه رايك بقى ... مبسوطة؟
_ اه ... انا ببقى مبسوطة وانا بعمل اي حاجه جديده وانا معاك .
لقيتة وقف وبصلي .. وفاجأة سند عالحمار و رفع نفسه وركب ورايا وميل على ودني
_ اهو انا بقيت معاكي اهو ...
التفت ليه ... لقيتة ابتسم اكتر اما شاف ابتسامتي.. حاوطني بايديه الاتنين عشان يقدر يمسك الحبل ويسوق .. لقيت نفسي تلقائي بريح ضهري على صدره ... اماان رهيب وراااحة بحسها في قربة .. لية الشعور دة محستش بيه كدة الا لما بقى في حياتي من بعد ما بقيت لواحدي...ايه دة حسيت بشفايفه على رقبتي فاجاه في بوسه خفيفه وبعدين بعد .. ابتسمت والتفت ابصلة .. لقيتة مد ايده و عدل وشي وقالي في ودني بابتسامة سمعتها في صوته
_ بصي قدامك لتقعي .
_ حاضر
رديت علية وانا مبسوطة قوي انة مهتم بيا كدة.. وفعلا فضلت بصا قدامي امتع عيني بكل الخضرا اللي مليا الدنيا من حواليا دي
_ احمد..
لقيته رد وهو بيحط دقنة على كتفي
_ نعم
ابتسمت
_ هو احنا ينفع نيجي هنا تاني؟!
_ هنا فين ... الغيط؟
_ لأ قصدي البلد كلها ... اصلها هتوحشني قوي بعد ما نسافر
لقيته سكت... هو مردش ليه ولا انا سالت حاجه غلط .. اهااا دة انا نسيت احنا فعلا متجوزين فترة مؤقتة لحد بس ما نجيب بيبي .. صح دة كان الاتفاق ما بينا .. يو عليكي يا سيرين هو انتي علطول كدة تتعشمي قوي وتنسي نفسك ..طب والناس ذنبها ايه معاكي في نسيانك دة ... لقيت نفسي بعد ما كشرت وزعلت فعلا اما بدءت افكر في اليوم اللي المفروض نسيب بعض فيه وهرجع لواحدي تاني من غيره في حياتي
_ انتي عايزه نيجي هنا تاني ؟؟
_ يعني لو ربنا أراد..
قولت كدة وانا حطة ايدي على قلبي من رد فعله على تقلي وسخافتي دي ... بتلزقي نفسك في الناس ليه يا متخلفه ... الراجل مش ناقص تدبيس وحضرتك عايزة تستهبلي وتدبسيه فيكي اكتر من كدة!
لقيته فاجأة ضمني بدراعاته قوي لدرجة ان ضهري بقى لازق في صدرة
_ ان شاء الله... ربنا يعمل اللي فيه الخير.
………………………
اخيرا وصلنا عند بيت عمو متولي .. احمد نزل وبعدين شالني من وسطي ونزلني
_ استنيني ثانية هدخل الخضار دة جوا لحظة وخارجلك .
_ ماشي بس متتاخرش
_ حااضر
_ احمددددد ... استناااااا!!!
_ ايه ... في ايه؟!
_ هي سماح جوا ... ولواحداها صح ؟
بص حواليه وقالي
_ وطي صوتك احنا في الشارع ... ومن غير عصبيه اه فيها ايه بقى .. بقولك هدخله من عالباب و اجي عشان نمشي وانا يعني هدخل وهي جوا لواحدها؟
_ لأ هاجي معاااك ...
_ هي هتعوضني جوا ... في ايه مااالك؟
_ لأ مفيش بس خليني اجي معاك بدل ما استنى هنا في الشارع لواحدي .
هز راسه بيأس مني ومن حشريتي في حياته انا عارفه
دخلنا فعلا جوا وخبطنا عالباب الخشبي واستنينا شويه لقيناها فتحت الباب واول ما شافت احمد ابتسمت ابتسامه اول مره اشوفها على وشها من يوم ما عرفتها
_ احمد ...
_ خدي يا سماح الخضار اللي ابوكي بعته عالحمار اهو .. والحمارة انا ربطها بره ياريت بقى تطلعلها برسيم وشويه ميا على ابوكي ما ييجي
_ حاضر عنيا .. بس اتفضل ادخل طيب استناه دة هو وامي هيخلصوا علطول النهاردة
ايه السهوكة اللي بتتكلم بيها دي وانا ايه صبارة واقفه ولا شفافة..
_ الله يخليكي يا سماح ... خدي بس مني عشان امشي
_ ياخد عدوينك يارب .. صحيح انت هتسافر امتى ان شاء الله ؟
يا بنتي دة الحمارة المربوطة بره دي بتحترمني عنك مش كدة ... لازم اتدخل والا وشويه وهلاقي الباب دة مقفول في وشي و احمد جوة
_ ان شاء الله يا سماح عل....
_ ايه يا احمد... هنتاخر كتير؟؟ انا رجلي وجعتني من الوقفه .
_ ايه دة .. هو انتي هنا .. مشوفتكيش
اخدت الحاجات من ايد احمد وحطتها جنبها بنرفزة من طريقتها دي
_ ليه شفافة قدامك ما انا واقفه من الصبح بس كنت ورا الباب دة مستنيه تبصي يمين شمال عشان تشوفيني ... لكن لأ انتي متنحة هنا بس
قولت كدة بكل الغضب اللي كتمته طول الوقفه دي وانا بشاور على احمد الواقف يبصلنا احنا الاتنين
_ انتي قصدك ايه بكلامك دة ؟!
_ انتي فاهمه قصدي كويس
_ لا يا حبيبتي واضحي كدة ك....
_ بااااااس خلاااص .. في ايه ... سماح ادخلي واقفلي لحد ما ابوكي ييجي الله يرضى عليك ... ويلا احنا يا سيرين.
وبرضه شبك ايده في ايدي بالطريقه اللي بحبها دي وشدني وراه ومشينا
سمعنا الباب بيتقفل ورانا بشكل فزعنا
لقيت احمد بيقول في سره
_ لا حول ولا قوه الا بالله.
وبعدين مشينا ساكتين
_ مالك ... ساكته كدة ليه
وقفت فاجأة وقولتله بعصبية
_ بقولك ايه ... انا عايزه اسافر ومش عايزة اجي هنا تاني .. خلاص .
و سبته وسبقته عالبيت
................................
خرجت من الحمام ودخلت الاوضة بعد ما اخدت دش يهدي العصبية اللي بتحرقني دي ... مش عارفه ليه حاسه اني مش مرتاحة ... احساس رخم مش عارفه ايه دة كل دة بسبب سماح... انا ليه بكرها كدة وبتضايق واحس اني مهمومة لما اشوفها بتقرب من احمد .. وانا مالي اصلا ما هي دي جارته وهو قالي انها اخته من زمان .. يبقى ليه بقى الخنقه اللي انا فيها دي من وقت اللي حصل وشفتها وهي بتبصلة بالشكل دة .. اوووف وبعدين بقى انا حاسه اني عايزة اعيط
خرجت لقيتة قاعد عالسرير... ايه دة شكلة كان مستنيني اخلص واخرج ... بجد مش قادرة اتكلم معاه وزعلانة قوي من وقت ما كلمها كدة و وقف كل دة معاها
وفعلا تجاهلته وسبته وروحت قعدت قدام المرايا عشان احط الروتين بتاعي بعد الدش
فضل يتفرج عليا ييجي ربع ساعة لحد ما خلصت وبدءت اسرح شعري... وبعد ما خلصت حاولت اعمل الضفيرة اللي بيعملهالي دي .. هو عارف اني بقيت بحب اعملها وانا في البيت عشان بتريحلي شعري ... بس لأ انا مقموصه منه ومش هكلمه وهعملها لواحدي ومش هحتاجلة هااا .
عينة جت في عيني غصب عني في المرايا لقيتة بدء يضحك لما لقاني مش عارفه اعملها و بتتكعبل مني
_ اوووف .. خلاص مش عامله حاجة و هقوم انام شالله يتقطع وانا نايمه ها.
وقومت فعلا بزعل وقربت من السرير لقيته قرب مني ومسك ايدي قبل حتى ما اروح للجهه بتاعتي
_ مالك ... في ايه حصل لدة كله ؟
_ معرفش.. اهو انا مخنوقه وخلاص
شدني من ايدي وقربني منه وفعلا سندني على رجله بقيت شبه قاعدة ورفع ايدة رتب شعري اللي انا بهدلته دة وهمسلي بصوته الهادي دة
_ مالك يا سيرين... انا زعلتك في حاجة ؟
لقتني عايزة اعيط غصب عني وفعلاً خبيت وشي في كتفه
_ معرفش حاسه اني مخنوقه من وقت ما قولتلي الكلام دة عن سماح
رد وهو بيمرر ايده على شعري يرتبه
_ كلام ايه ... هو أنا اتكلمت عنها أصلا ؟!!
_ انك كان زمانك عندك منها بيبي دلوقتي... و وقفتك معاها تكلمها كل دة وانا واقفه.. شكلك بتفكر تتجوزها فعلا .. صح
ايده وقفت بعد ما كان بيمررها علي شعري.. رفعت وشي انا كمان اللي متغرق دموع
_ على فكرة انا مش هحاسبك انا بس مقبلش بدة يحصل واحنا متجوزين
_ سيرين... انتي بتعيطي!!
وياريته ما سأل لقيتني فجرت كل الضيقه اللي جوايا على هيئة عياط
حاول يرفع وشي ليه
_ سيرين في ايه ... ايه بس اللي حصل لدة كله ؟!!
خبيت وشي في كتفه ورفعت ايدي حوالين رقبته وقولت من بين عياطي دة
_ مش عارفه مخنوقه ... وبتضايق قوي لما تيجي سيرتها انا مش بحبها سماح دي!!!
لقيتة اخدني في حضنة اكتر وفضل يطبطب عليا شويه لحد ما هديت وبعدين خرجني من حضنة ومسح وشي براحة
_ طب خلاص طلعتي كل الخنقة اللي جواكي دي .. اهدي بقى واسمعيني ...
لقيته قام وجاب المشط وقعد يسرحلي شعري المتبهدل دة
_ أولا انا مش عارف ايه سبب كل دة ... لو كل دة بسبب سماح وخوفك لاتجوزها عليكي فانا مش عارف احلفلك ولا ايه اني عمري ما اقدر اتجوزها ولا حتى اتخيلها زوجة .. دي اختي والله... طيب قوليلي اعمل ايه عشان تصدقي وانا هعمله .
سكت شويه اتنهد بعد العياط وانا حاسه بايده بتعمل في الضفيرة.. يااه اخيرااا عملتها انا لازم اتعلمها منه
_ نسافر ونبعد عنها ... ولو سمحت متجيش هنا طول ما احنا متجوزين .
سكت شوية وبعدين كمل اللي بيعمله
_ طب لو حبيت انزل اشوف اخواتي و امي واحنا برضه متجوزين... اعمل ايه ؟!!
_ هما ييجوا يعيشوا معانا احسن .
_ مينفعش ... على الاقل حاليا
التفت ليه
_ خلاص يبقى امري الي الله واجي معاك و بشرط منقعدش كتير ومتكلمش سماح دي نهائي .. موافق ولا لأ ؟!
استنيت ردة وانا قلقانة... ايه دة هو بيبصلي كدة ليه ... ثواني انا عارفه البصه دي .. لأ مش وقتها خالص انا دلوقتي متضايقه بجد
رد عليا وهو بيقرب
_ عارفه اي حد مكاني وشافك بتعملي كدة هيقول ايه
رديت عليه وانا ببعد لحد ما وصلت مكاني
_ هيقول ايه يعني
_ هيقول ان دي واحدة ست و بتغير على جوزها .
سكت ... مش عارفه ارد اقول ايه... بس اكيد لأ طبعا بلاش هبل
_ انتي ايه رأيك في الموضوع دة ؟!
.................................
نزلنا من فوق على بالليل كدة .. ماحنا من وقت ما جينا وطلعنا واحنا منزلناش نطمن حتى هم جم امتى .. اتعشينا مع بعض كالعادة .. عيش من اللي انا خبزاه معاهم وجبنه بيضه فلاحي طعمها حلو قوي وقشطة وبيض واحمد لقاني طلبت طبق الجبنة القديمة قام اخدة مني تاني وقال لريم تشيله من البيت لحد ما اسافر ... ديكتاتور عليا حتى في الجبنه ؟!
على ما دخلت الاكل معاهم جوا لقيت احمد خرج و لع خشب وبعدين حط الدرة ... روحتله
_ احمد... بتعمل ايه
_ امي طلبت مني اشوي الدرة دة عشانك وعشان ريم .. ادخلي وانا هخلصه وادخل
ابتسمت وانا بقعد جنبه
_ لأ انا عايزه اقعد معاااك .
شويه ولقينا ريم جابت سجادة كبيرة وفرشتها وقعدنا عليها .. وثواني ولقينا مامت احمد جت وقعدت معانا قدام الباب في الهوا
احمد كمان بعد ما خلص حط كنكنه فيها ميا وشاي وقال هيشربني شاي طعمة مختلف
_ صدق يا احمد ... الواحد كان محتاج شوية الهوى بتوع الصبح دول ..
وبعدين شربت من كوباية الشاي اللي في ايديها وكملت
_ وقعدة زي دي والله يا ابني.
_ هتوحشوني والله يا امي .
_ ربنا يحفظك يا حبيبي ويرزقك برزق اخواتك ومراتك يارب .. هتعمل ايه بالقعدة جنبنا .. روح شوف شغلك ودور على رزقك .
_ هو انتوا هتسافروا امتى يا احمد ؟
_ خلاص يا ريم يدوب نسافر عشان انا كمان اجازتي قربت تخلص والمفروض انزل الشغل.
_ والله هتوحشني قوي انت وسيرين.
_ وانتوا قوي والله يا ريم ... ابقوا تعالوا زورونا انا واحمد.
_ سيرين خلي بالك من احمد حطيه في عنيكي انتي يا بنتي لو لفيتي الدنيا مش هتلاقي احن منه على اخواته وعليا وانا متاكدة انه هيكون كدة معاكي واكتر كمان .
بصيت لاحمد وبعدين بصتلها
_ حاضر يا ماما.
بعديها بشوية قامت مامته عشان تنام وبعديها قامت ريم
لقيت احمد قرب ومدد وحط ايدة تحت دماغه وبص للسما
_ احمد هو لية دلوقتي مفيش حد في الشارع..
_ الناس هنا يا سيرين بتنام من بدري عشان برضه يصحوا بدري.
_ يعني كدة كله نايم ومفيش حد في الشارع غيرنا؟
لقيته بصلي وبعدين هز راسه بمعنى اه
ابتسمت وبعدين قربت منه وعملت زيه ومددت انا كمان وايدي تحت راسي وبصيت للسما
الله.. السما والهوا والريحة دي اللي كلها ليل وخضرا مع ريحة الدرة المشوي اللي لسه موجوده دي تحفه.. احلى حاجه في الدنيا.
_ احمد ...
_ همممم
_ تفتكر انا هخلف امتى ؟!!
لقيته سكت فالتفت ابص عليه
_ انا خايفه قوي لميحصلش بسرعة... ادعي معايا يارب نخلف قريب... واطمن بوجود الطفل دة معايا قبل الوقت ما يعدي
لقيتة التفت يبصلي انا كمان وبعدين فتح دراعة علامة اني اقرب .. قربت فعلا وحطيت راسى على صدره ضمني لية بدراعة وبعدين لقيتة بيسألني
_ ممكن تنسي اي حاجه ممكن تضايقك وتضايقني وتكلميني عنك شويه.
_ عايز تعرف ايه عني ؟.
_ كل حاجه وأولها قريبك الوحيد دة ليه مش موجود في حياتك
لقيتها دفنت وشها في صدري اكتر وسكتت شويه
_ مش عايزة اقول يا احمد
_ لأ انا عايز اعرف عنك كل حاجه... زي ما انتي عرفتي حياتي كمان
اتنهدت شويه وفركت وشها تاني
_ دول اكتر ناس مش بحبهم ابدا
رديت وانا بملس عليها بايدي واشجعها تحكي
_ ليه .. عملوا معاكي ايه لدة كله ؟!
اتنهدت تاني
_ بعد وفاة بابا حبيبي بأيام لقيتهم جايين كلهم عندي البيت .. كان وقتها بيت كبير مش شقتي دي دلوقتي.. والغريب انهم مكنش ليهم وجود في حياتنا قبل كدة و لما كنت اسال بابا عنهم لما اقابلهم في اي مناسبه مكنش يقولي حاجه ابداً ... ويقولي انهم بس عشان علطول مشغولين .. والحقيقة ان بابا كان غلطان انه مش فهمني حاجه.. كان غلطان قوي
_ ليه .. ايه اللي حصل بعد كدة ؟!
_ لما جم تالت يوم العزا كانوا لطاف قوي و بيحتووني جدا.. وكانوا حنينين معايا قوي قوي .. وقتها قولتلهم ياريتكم كنتوا معايا من زمان وحبيت وجودهم في الوقت دة جداا لاني وقتها فعلا كنت لاول مرة في حياتي ابقى لواحدي وخايفه .
ضمتها بعد الجمله دي قوي وكملت امرر ايدي عليها تاني بحنان
_ وبعدين يا حبيبي.. كملي.
لقيتها ضمت نفسها اكتر ليا
_ وبعدين بدأوا يجولي كتير لدرجة ان طنط مرات عمو دي كانت بتيجي تبات معايا هي وبنتها اللي مكنتش بتطقني دي وكله كوم بقى وشريف دة كوم تاني !
رفعت راسي ابصلها
_ شريف مين؟!
_ شريف ابن عمي.
_ اهااا .. طب كملي وبعدين..
رجعت تاني حضنتني وريحت رأسها
_ شريف دة بقى انا عمري ما هسامحة ابدا لا هو لا عمي
_عمل ايه دة كمان؟!
_ لقيته فاجأة قربلي قوي وبدء يسأل عني طول الوقت والوضع اتطور وبقى حابب يخرجني عشان اطلع من الحالة اللي انا فيها دي .. وفعلا اتعلقت بيهم كلهم الحقيقة وصراحة.. بيه هو بالذات..
ايه دة في ايه!!! لقيته رفع رأسه فاجأه وقالي بطريقة وحشه
_ وبعدين
_ احمد.. نام زي ما كنت عشان انا كنت مرتاحة كدة
_لا انا كدة مرتاح ... كملي بس وبعدين!!
_ وبعدين عمي طلب ايدي لابنه فعلا واتخطبنا وبعد الخطوبة بيوم شريف فاتحني انه عايز يعمل بيزنس يضم فيه شغل بابا بشغل جديد ..
_..... ....
لقيتها سكتت فاجأة وبعدين كملت بصوت مكسور
_ وانا بعبطي وافقت وضيعت كل اللي بابا عمله .. بابا بدء بمكتب صغير انا فاكرة وانا صغيره كان بيتعب قد ايه عشان يكبر شغله دة ويخلية استثمار كبير كدة...
_ وافقت وفعلا مضوني على اوراق كتير تقول انهم شركا معايا في كل حاجة...
_ وبعدين
كملت بسرحان وكانها مش معايا وبتكلم نفسها
_ اكتشفت بعد شويه صغيرين من الخطوبه ان شريف بيخوني ولما واجهتة وقولت لعمي
قالي وفيها ايه دة شاب و لية متطلبات مش شرط يلاقيها معاكي ... وطبعاً مكنش ممكن يلاقيها معايا لاني مكنتش بسمحله يقربلي زي ما كان دايما بيحاول في فترة الخطوبه
_ وبعدين... كملي
_ احمد .. براحة.. بتوجعني
بعد ايدة عن دراعي اللي كان ماسكة بغباء بدون وعي منه
_ اسف ... كملي
_ وفاجأة كلهم اتغيروا معايا وبقوا وحشين قوي .. مقدرتش اتحمل واصريت على فسخ الخطوبه و فسخ الشراكة عشان ابعد وارتاح منهم ... وكلمت المحامي بتاعي لقيته هو كمان استضعفني ولقاني لواحدي قدامهم كلهم فجابلي اوراق معرفش ازاي كانت معاه بتقول انهم المسؤولين عن كل حاجه خاصه بالشغل واني مليش اي حاجه.
_ ازاي كدة... اكيد تزوير.
_ معرفش ... وقتها هما اخدوا كل حاجه و لما هدتهم اني مش هسكت وهرفع قواضي عليهم .. هددوني انهم هياذوني وانا لواحدي ... مش قادرة انسى شكل طنط دي وهي واقفه وبتهددني انها هتخلي شريف ي... ي. .. واني مش هيبقالي اي حق اتكلم .
_ وقتها اضطريت ابيع بيتي عشان يبقى معايا باقي فلوس اعيش منها ... واخدت الشقه اللي في الكومباوند و بقى اللي يسألني عايشه لواحدي ليه وازاي.... اعرفهم اني كنت مع بابا وانه توفى من سنة .
اتنهدت و اخدتها في حضني تاني بعد ما حسيت بضعف في صوتها
_ انا لواحدي يا احمد .. وكنت كتير بسافر انا وماما يعني عايشه نص عمري برة مصر حتى دراستي كانت هناك فماكنتش عارفه ولا ليه حد هنا ومن وقت ما عملوا فيا كدة وانا قررت معرفش حد ومدخلش حد حياتي تاني ابدا... عشان بجد الناس بقت تخوف ..
حتى انت انا عملت كدة لما حسيت اني هغرق وانت القشايه اللي اتعلق بيها واعرف اجيب بيبي قبل فوات الاوان لكن غير كدة انا عمري ما كنت دخلت حد حياتي تاني بعد اللي حصلي .
خلصت كلامها ولقيتها سكتت خالص بحزن و سرحان حتى معيطتش ... كلمتها يمكن اخليها تفك بعد الحاله دي لقيتها برضه مش بترد عليا وسرحانه .. واضح اني غلطان اني فتحت معايا الموضوع دة
لما لقيت حالتها كدة وبترد عليا بالعافيه .. قومت وشيلتها وطلعت بيها فوق .. كانت متضايقه لدرجة العصبية لكن اول ما وصلنا اوضتنا رمت نفسها في حضني ونامت
...............................
كنت في اوضتي انا واحمد بنحاول نظبط الشنط عشاان خلاص هنسافر بكرة ونبعد بقى عن سماح دي اوووف
سمعنا فاجأة الباب بيخبت .. احمد قام رميلي التيشريت اللي كان بيطبقه وقالي
_ استني اشوف ريم عايزة ايه ؟
هزيت راسي بمعنى ماشي وانا مشغولة بترتيب الشنطة وترتيب هدومنا فيها
_ احمد .. انزل بسرعه
دة صوت ريم ... و مالها موطيه صوتها كدة ليه .. قربت منهم غصب عني احاول اسمع في ايه
_ سماح عايزاك تحت وقالتلي انها جايه دلوقتي من ورا أمها وابوها
_ ايه الجنان اللي هي في دة وانتي ازاي توافقيها يا ريم وجايه تقوليلي ؟!
_ هي شكلها غريب كدة وكأنها معيطة وقالتلي مش همشي من هنا الا لما اقابله .
سماااااح عااايزاااه في ايه؟!!!!!
وسيرين هتسكت لهاااا ؟!!! والله اشك😂👊
وياترى ايه هيحصل وهيسافروا ولا ايه ؟!!!
باااارت طووووووويل اهووو والله اتاخرت عشااان كدة فصلين في بعض المهم يعجبكوااااا وتحبواااا 🥰❤️ورايكم وتوقعاتكم معاياااا كدة للي جاااي .... وتفاعلكم بقاااا للسهر والتعب دة .. قراءه ممتعة يا قمرااااتي🥰❤️❤️❤️
#حمل_بالتراضي
#اخر_امل
#رانيا_أبو_خديجة
↚
الفصل الثالث عشر
#حمل_بالتراضي
#رانيا_أبو_خديجة
_ هي شكلها غريب كدة وكأنها معيطة وقالتلي مش همشي من هنا الا لما اقابله .
_ ريم ... انزلي قوليلها تراوح عشان منزلش انا اراوحها بمعرفتي ....المجنونة دي لو ابوها عرف عن عمايلها دي هيزعلها وهيبقى عندة حق.
_ لأ ما ابوها وامها زمانهم ناموا من زمااان.... وهي مستنياك يلا احسن سيرين تحس ان فيه حاجه.
_ سيرين حالها بيتقلب اول ما بتسمع سيرتها .... والحكاية مش ناقصة.
_ يا احمد حرام والله صعبت عليا.. انا اول مرة اشوف سماح كدة ... كفاية جوازك المفاجئ دة وكلنا عارفين انها كانت حاطة عينها عليك .
_ ريييييييم!!!!!
_ وطي صوتك مراتك تسمع... وبعدين شوفها عايزة ايه واطلع علطول.. هي يعني هتبات هنا .
_ انزلي يا ريم ... انزززززلي!!!
قفلت الباب ودخلت لقيتها واقفة ورايا ومكتفة دراعتها.. اممممم واضح انها سمعت .. يا دي الليلة اللي مش فايتة .
_ هتنزلها؟؟
قربت منها وفكيت دراعتها وحواطها بايدي
_ هشوفها عايزة ايه واطلع علطول ... ريم بتقول انها شكلها مش مظبوط .. وأنا مش عايز اسافر وابقى قلقان على حد.
شالت ايدي من على وسطها واتكلمت بعصبيه .. انا عارف هي ليلة مش هتعدي
_ والله.!!!.. مش عايز تمشي وحضرتك قلقان عليها وبتفكر فيها؟!
قربتها مني تاني
_ سيرين... متنسيش ان سماح تعتبر من اهل بيتي برضه.. ومتربيه وسط اخواتي .. هشوف مالها واطلعلك علطول.
_ انا عارفه هي جاية ليه.. اكيد مش عايزاك تسافر... وتفضل هنا عشان تفضل هي قدامك وتفكر تتجوزها عليا ... والله لنزل اضربها البجحة دي .
مسكتها من ايديها قبل ما تنزل
_ ممكن تهدي وتهدي صوتك .. امي لو سمعتك هتفتكرنا بنتخانق .
_ ما احنا فعلا هنتخانق بسبب سماح بتاعتك دي .
_ سماح بتااااعتي!!!
بصتلي وبعدين كتفت ايديها تاني وفضلت تتهز بعصبية
فضلت ابصلها شوية وهي تبصلي .. معقولة تكون بتغير من سماح بسببي... بس كون انها بتغير عليا من واحدة دة معناه اني فارقلها مش مجرد زوج هتجيب منه طفل وخلاص .. يارب اكون فعلا فارق معاها زي مأنا شايف كدة والا هيجرالي حاجه لو كان كل دة وهم .. انا حبيت وجودها معايا.. حبيتها اكتر ومش عارف ممكن يجرالي ايه لو سابتني فعلا بعد كل دة .
_ لو عايز تنزل .. أنزل انا كمان معاك .
فوقت من سرحاني فيها على اقتراحها دة ... لقيت نفسي بقرب منها وبجد في اللحظة دي عايز أخدها في حضني شديتها من ايديها ورفعت ايدي ارفع شعرها من على وشها من عصبيتها دي
_ عايزة تنزلي معايا عشان تتخانقوا زي ما حصل امبارح عند بيتهم .
_ خلاص يبقى لا انا ولا انت ننزل .. ويلا عشان نكمل الشنط وننام عشان عندنا سفر الصبح .
لقيتها سابتني فعلا وراحت للشنط و بدءت تكمل اللي كنا بنعمله ... قربت اساعدها فعلا
_ حاضر ... دقايق بس هقول لريم تراوحها عشان لو ابوها او امها ملاقوهاش في البيت ولاقوها هنا هتبقى مشكلة خصوصا بعد اللي حصل منها قبل كدة ... واطلعلك علطول.. ماشي.
_ دقايق وتروح طالع والا والله انزلها الغلسه دي .
_ حاضر.. كملي انتي بقى الشنط على ما أطلع
_ لأ انا مش عاملة حاجه الا لما تيجي ها.
.................................
_ احمد ...
قالتها بلهفه اول ما شافتني نازل .. كانت قاعدةمع ريم ... شكلها معيطة بجد وشكلها مش مظبوط فعلا.
_ اومال فين امي يا ريم ؟!
_ امك صلت العشا ودخلت نامت من بدري ..طيب انا كمان هروح اذاكر شويه قبل ما انام .
ريم سابتنا فعلا ومشيت
قعدت عالاخر الكنبة الوحيدة اللي في وسط البيت واللي هي قاعدة عليها
_ خير يا سماح ... عايزاني في ايه؟
لقيتها دمعت كدة وكانها هتعيط تاني وقربت شويه في القاعدة مني
_ احمد ... انا بحبك ونفسي اكون من نصيبك انت .. عشان خاطر اغلى حاجه عندك .. وحياة خالتي ام احمد عندك ما تسيبني لابويا يجوزني حد غيرك .
مش عارف في ايه... ليه حد ممكن يعمل في نفسة كدة عشان خاطر حد ... انا عارف ان سماح شايلالي حاجة جواها من زمان بس حقيقي مكنتش اعرف كل دة الا بعد ما اتجوزت سيرين .. مكنتش اعرف انها ممكن تتحول كدة من واحدة علطول بشوفها جميلة وبتهتم بنفسها خصوصا قدامي للمسكينة المطفية اللي قدامي دلوقتي دي ... معقولة الحب والمشاعر الجميلة دي ممكن تعمل كدة في بني ادم .. وانا ممكن حالي يوصل لكدة بسبب حبي لسيرين.. مش عارف ليه دلوقتي بالذات فكرة باليوم اللي ممكن تكتشف فيه انها حامل .. اكيد هو نفس اليوم اللي هتسيبني فيه ويبقى الوجع اللي انا شايفه قدامي دة مصيري ... الله يخربيت الحب اللي ممكن يعمل في حد كدة .
قربت منها وقعدت جنبها ولاول مره في حياتي من بعد ما كبرت كدة وبقت عروسه مديت ايدي ومسحت دموعها وكلمتها بنبره هاديه
_ سماح ... والله العظيم انتي غالية عندي قوي ويصعب عليا أشوفك عاملة في نفسك كدة عشان خاطر حد حتى لو الحد دة انا ... انتي جميله و عروسة اي شاب يتمناكي بس مش عشان شاب من دول لقى نصيبه بعيد عنك يبقى خلاص الدنيا هتقف ... انا بكلمك دلوقتي وانا حاسس اني شايف ريم اختي قدامي.. بكلمك كاحمد اخوكي اللي مش راضي عن حالتك دي ... وليه دة كله اصلا .. صدقيني ربنا هيعوضك بحد هتقولي بعديها ربنا بعد عني احمد عشان كان شايلي حاجة احسن .
لقيتها فاجأة انفجرت في عياط
_ يا احمد .. ابويا هيجوزني غصب عني ... كان مستني نتيجة السنادي تطلع عشان ابقى في بيتي واكمل هناك .
_ وعم متولي هيجوزك غصب عنك ليه وازاي ... عم متولي صعب يعمل كدة .. مش طريقته يعني .. وفي حد يقبل يتجوز واحدة مغصوبه عليه؟!
_ لأ ما هو ميعرفش اني مش عايزاه.... اني قعدت معاه مرة واحدة بس وابويا شكله بيحبه قوي وبيقول هو دي يعني هو دي.
_ مين دة يا سماح.. حد من البلد
مسحت دموعها و ردت بتنهيدة
_ مصطفى ابن خاله سعديه
_ مصطفى ابن خاله سعديه مين!!!! ايوا ابوة اسمه اي ولا من عيلة مين ؟!!!
_ منتاش عارف مصطفى ابن عم فتحي البنا.
_ اها .. مصطفي البنا ... طب دة يا سماح حد يرفضه.. مصطفى دة كان صاحبي في معهد الازهر زمان وابن حلال وطيب ... اللي فرقنا بس الجامعه انا تجارة وهو كمل ازهر و فقه ... بس بشوفه دة راجل بجد وابن حلال.
_ ميفرقش معايا كل دة ... انى عايزاك انت.
رجعنا للعياط تااااني
_ يا سماح والله مصطفى ابن حلال دة لو كان جة لاختي ريم والله ما كنت هفكر حتي .. عم متولي عنده حق يتمسك بيه ليكي .
لقيتها عيطت زيادة
_ ربنا يسامحك يا احمد على كسرت قلبي دي ...يارب يوريهالك عشاان تعرف هي بتوجع ازاي .
_ سماااااح ... يا بنتي اسمعي...
ايه دة ليه الدعوة دي بالذات.. منك لله عرفتي منين اني بفكر في كدة اصلا ... لقيتها سابتني ومشيت وهي لسة بتعيط
قعدت على الكنبة لواحدي شوية افكر ... لأ سيرين مش هتسيبني مش هسمح انها تعمل فيا كدة .. يارب انت عالم انا والله مقصدش اوجع حد ولا اتسبب في كسرة قلب حد ... متوجعنيش كدة ... ياارب.
_ هي راحت فين ؟!
لقيتها واقفة عالسلم وبتبص في كل مكان .. هتكون يعني مستخبيه تحت الكنبه !!! بتبص فين دي؟!
_ مشيت ..
نزلت وجت قعدت جنبي و اخيرا سمعت صوتها هادي بعد العصبية اللي جابتلي صداع دي
_ ولما هي مشيت .. قاعد لواحدك كدة ليه ومطلعتش ليه .. لما اتاخرت افتكرتها لسه قاعدة معاك.
_ لأ مفيش .. يلا عشان نلحق نظبط الشنط قبل ما ننام
اخدتها من ايديها وطلعنا
_ مش هتقولي كانت عايزاك في ايه؟!!
_ هتتجوز .
_ بجد !!!
لقيتها وقفت عالسلم فأجاه وسألت بفرحة
_ اه بجد والله... في ايه ؟!
مسكت ايدي وطلعت تاني تتمختر كدة بطريقه خلتني عايز اضحك والله
_ لأ خلاص مفيش.. فرحتلها بس .
............................
_ هتوحشيني يا امي والله... خالوا بالكوا من نفسكم ولو اي حاجة خلي ريم تكلمني علطول.. مسافة السكة وهكون عندكوا .
حضنتني تاني ... والله اكتر حاجه بتوحشني هنا حضن الست دي
_ خلي بالك من نفسك يا ضنايا.. ربنا يا ابني يكتبلك في كل خطوة رزق و سلامة وسعاده يارب .
وبعدين خرجت من حضني و سلمت على سيرين اللي كانت بتودع ريم وحضنتها برضة
_ مع السلامه يا حبيبتي.. خلي بالك من احمد يا سيرين .. حطي في عنيكي ... خلوا بالكوا من بعض يا بنتي.
_ خلاص بقى يا امي .. كدة هنتاخر متنسيش لسه هنعدي على مريم .
_ مع السلامة يا ضنايا... ربنا يكتبلكم في كل خطوة سلامه يا نور عيني.
.............................
مشينا وسبنا البلد ... كنت في العربية جنب احمد وببص على كل مكان فيها .. هتوحشني كل حاجه هنا.. الزرع والشجر والهوا وصوت الميا اللي مبيفارقش الودان ... وريحة المكان كله ... انا لازم اجي هنا تاني مع احمد ... ابتسمت براحة لما افتكرت اني ممكن اجي معاه عادي بعد ما سماح خلاص هتتجوز .. يااه راااحه.
_ احمد ... مامتك مديانا حاجات كتير قوي .. وعيش كتير.
لقيتة ابتسم وقالي
_ امي عارفه اني بحب العيش الفلاحي و بشتاق للاكل بتاع هنا ...عشان كدة دايما تديني من كل حاجة في البلد.
_, احمد انا بجد حبيت مامتك قوي واخواتك والبلد كلها .. ممكن نيجي هنا تاني قريب.
ابتسملي ابتسامتة الجميلة دي وقالي
_ وهما كمان حابوكي جداا ... وعموما كل ما انزل هخدك معايا
مش عارفه ليه فرحت قوي من كلامة القمر دة ... قربت منه و ريحت راسي على كتفه ... غمضت عيني براحة وانا دايما معاه كدة.
..................……
النهاردة احمد نزل الشغل من بدري و كالعادة قبل ما نسافر صحيت بدري معاه على عكس حياتي قبل ما يبقى فيها بس خلاص انا طبعت روتيني عليه وبقيت اصحى بدري معاه وانام وقت نومة كمان ... اول ما نزل على الشغل.. روقت الشقة من بعد ما سبناها الفترة دي كلها ... شقتة صغننة قوي مش متعبة ابدا .. انا بجد بحب كل حاجه فيها ... و غسلت هدومنا...شغلت الغساله وبعدين روحت علقت عالاكل .. النهاردة عايزة اعمله اكل كويس عشان ما يقولش ان اكل مامته وريم كان احلى ... وقفت لحظة اتأمل الشقة بعد ما روقتها ونظمتها وانا شامة ريحة الاكل عالنار وصوت الغساله في ودني .. ايه دة انا بقيت ست بيت شاطرة ... زي اي واحدة بتقوم بمهامها على ما جوزها يبجي من الشغل ... انا بجد حبيت حياتي البسيطة دي اللي انا متاكدة اني عمري ما كنت هعيشها لو مكنتش قابلت احمد واتجوزته ... حلو قوي احساسي دلوقتي بمسىؤليتى كزوجة ومسؤولة عن بيت وزوج ..حطيت ايدي على بطني واتنهدت .. ويارب عن طفل كمان قريب.. يااارب.
بعد ما خلصت كل حاجه دخلت اخدت الدش بتاعي و سرحت شعري... وقفت محتارة شويه قدام الدولاب .. يا ترى البس ايه ..
ابتسمت اول ما شفته ... احمد بيحب دة عليا.. خلاص هلبسه
وبعد ما جهزت وجهزت كل الاكل وقاعدة مستنياه .. قعدت قدام التليفزيون ... اووف هو ماله اتأخر كدة ليه ... لأ بجد اتاخر قوي عن معادة
مسكت تليفوني وكلمته... ايه دة ليه مش بيرد عليا...هو في ايه .. قلقت قوي بجد ... فكرت أقوم البس واروح اسأل عليه في الكومباوند ... وفعلا لما عدى الوقت والليل دخل ولسه ما رجعش قلقت اكتر .. قومت غيرت هدومي ونزلت .
....………………….
قربت من بوابة الكومباوند وانا عيني بتبص على كل أفراد الأمن الموجودين... هو مش فيهم!!!!! اومال فين بس ... يكون جوا.
_ سلام عليكم...
لقيتهم بصولي .. انا عرفاهم وهما عرفيني كلهم طبعا ...بس اعتقد في ناس جديده...قرب مني عم خيري ... موجود في الكومباوند من اول يوم جيت فيه وانا بشوفه
_ حمدالله عالسلامه يا استاذه سيرين... رجعتي امتى ؟
_ الله يسلمك يا عم خيري .
بصلي باستغراب
_ اومال فين الشنط بتاعتك اطلعها لك الشقه ؟!
_ بقولك يا عم خيري ... اومال فين احمد مش هو برضه نزل الشغل النهاردة ؟!
_ احمد !!! فرد الأمن اللي معانا هنا ... خير يا ست الناس بتسالي عليه ليه ؟!!!
_ قولي بس الله يخليك هو مش المفروض نزل النهاردة؟
_ اسكتي يا بنتي عاللي جرا ... الغلبان كان واخد اجازة عشان فرح اخته رجع الشغل النهاردة لقى المشرف اللي الله يسامحة جاب واحد من معارفه مكانه بحجة انه اتاخر في الاجازة والبوابه محتاجه افراد امن ... رفدوا منهم لله.
_ ايه!!!!! احمد اترفد من الشغل !!!
_ جة الصبح لقاه قاعد مكانه المحروس دة دب خناقه مع المشرف ومشي
_ حصل امتى كل دة؟
_ النهاردة الصبح .
الصبح .... اومال راح فين طول النهار.. و هو فين كل دة ... وايه إللي حصل بعد كدة!!!
_ لكن مقولتليش يا بنتي .. بتسالي عنه ليه ؟!!
تقريبا مسمعتش عم خيري كان بيقولي ايه.. مشيت حيرانه وبفكر يا ترى راح فين وهو فين دلوقتي
_ طب انتي راحة فين يا استاذة ... مش طالعه شقتك ؟!
....................................
كنت ماشية في الشارع تايهه مش عارفه المفروض اسأل عليه فين ... وياترى راح فين و سابني قلقانه عليه كدة ... من يوم ما شوفت احمد في الكومباوند اول ما جة كفرد أمن وهو كان يبان غيرهم ... كان دايما قاعد لواحدة... أوقات لما كنت اعدي داخله او خارجة كنت الاحظ وانا صعب اني الاحظ حاجة مليش دخل بيها.. كلة قاعد بيرغي مع بعضة و أوقات يتسامرواويضحكوا ... لكن هو كان دايما واخد جنب...هادي ... لما كنت اقفشه وهو بيبصلي ... كان يتنحنح بحرج و يبعد عينة علطول... ويمكن دة اللى خلاني اخد بالي منه.. والاحظه.... كنت لما اقرب من البوابة عشان اقولهم حاجة كنت اوقات الاقيه سرحان وكأنه بيقول للي حواليه ان مكانة مش هنا ... يا ترى يا احمد انت فين دلوقتي... احسن حاجه اعملها اني أروح استناه في البيت ... عشان ما يرجعش ويقلق عليا لما ميلاقنيش.
……………………….
فتحت باب الشقه وانا مش شايف قدامي من التعب ... ياااه اخيرا اليوم خلص ووصلت هنا ... يا ترى عملت ايه لما اتأخرت عليها ... مردتش اكلمها عشان متقلقش لما تسمع الخنقة اللي انا فيها من صوتي .. .. حاسس انها عماله بتضيق اكتر ... افرجها من عندك يا رب.
_ سيرين... سيرين!!!
ايه دة دي مش في الشقه .. دخلت اوضة النوم .. برضه مش موجوده... طب وبعدين انا اصلا جاي ومش طايق نفسي... مش معقول كمان يكون جرالها حاجه..
مسكت تليفوني بقلق وقولت اكلمها ... ضغط الشاشه بسرعه ..
سمعت صوت باب الشقه بيتفتح ... اهي .. الحمد لله
_ كنتي فين؟!!!
_احمد ...
جريت عليه اول ما شفته... بجد كنت هموت من القلق واتكلمت وانا في حضنة
_ كنت فين كل دة ... حرام عليك قلقتني.
_ انتي اللي كنتي فين... وازاي تخرجي من غير ما تعرفيني .
خرجت من حضنة ابص عالارهاق اللي على وشه دة
_ كنت بدور عليك ... روحت الكومباوند سالت عليك هناك ...قالولي....
لقيتة فتح زراير قميصة بضيقه وعصبيه وقلعة ورماه عالكنبه
_ قالولك اني اترفدت .. وبقيت عاطل.
بعدين دخل الحمام وقفل الباب وراه بعصبية وقفت ورا الباب وحاولت اتكلم بصوت يهديه شويه
_ متقولش على نفسك عاطل دي ... وبعدين الشغل كتير ...صدقني واكيد ربنا هيكرمك بالوظيفة اللي كان نفسك فيها انا متاكدة من كدة.
سمعت صوت الدش بيتقفل ولحظة وفتح الباب وهو لابس بنطلون قطني كان في الحمام .. وسابني ودخل اوضة النوم ... دخلت وراه
لقيتة فتح الدولاب دور على تيشرت ملقاش قام قفله بعصبيه
_فين الزفت الهدوم اللي هنا
_ انا غسلت كل الهدوم النهاردة.. ثانيه واحده اجيبلك حاجة من عالحبل .
لقيتة سبقني و راح جاب تيشرت و دخل الاوضة وهو بيلبسه وبعدين راح ناحية السرير وفرد جسمة عليه بتعب
_ اااااه ... تعبت.
قلعت الجاكت اللي كنت لبساه ورميتة على طرف السرير وروحت قعدت جنبه وفضلت امرر ايدي على دراعة براحة
_ هتنام من غير عشا كدة ... طب حتى اجبلك حاجة خفيفه تاكلها .
فضل باصص للسقف وبعدين غمض عينه بتعب
_ مش عايز.
اول مره بعد ما اتجوزنا اشوفه كدة... ايه هم الدنيا إللي على وشه دة .. بتضايق وبتهم معاه اول ما اشوفة زعلان ومهموم كدة ... بس اول مره اشوفه بالتعب دة و باليأس دة ... لو اطول اديله عيوني بس يبقى مبسوط هعمل كدة بس مشوفوش في الحالة دي....
قربت منه اكتر ومديت ايدي و حطيتها على خدة امرر صباعي عليه بحنان وايدي التانيه على دراعة
_ احمد ... والله هتتحل ... ربنا اكيد هيفرجها بوظيفة كويسه افضل من دي كمان.. بس ممكن مشوفكش كدة .. انا قلقانة عليك ... والله هتتحل .
لقيتة مسك ايدي اللي على وشه .. وشدني اكتر ليه وحط راسه على صدري وغمض عينة .. حطيت ايدي على شعرة احاول اخفف تعبة ولو شويه.
_ طب ممكن تكلمني وترد عليا ... كنت فين طول النهار ؟
سكت شويه وبعدين ضمني اكتر بدراعة واتكلم بهمس تعبان
_ كنت بدور على شغل ... لفيت تقريباً القاهره كلها في كل الوظايف حتى ساعي بتاع قهوة في المكاتب ملقتش .
غمضت عيني بأسى ...
_ هما ليه مشوك وازاي يمشوك فاجأه كدة من غير ما يبلغوك عشاان تتصرف وتشوف شغل تاني ؟!!
_ المشرف بتاعي عين قريبه مكاني ... استغل غيابي و بلغ إدارة الكومباوند اني مش ملتزم وبغيب كتير رغم اني اخر يوم في اجازتي كانت امبارح ... ولما سالت عن باقي حسابي قالولي اني واخد سلفه واني انا اللي عليا ليهم فلوس كمان .
_ يعني انا مش فاهمه من جمال الشغلانه قوي مستكترينها عليك ... دي اصلا مش شغلك ومش مكانك.
_ مش عارف اعمل ايه ... حاسس اني تايه .. لما سبت وظيفة الشركة قبل كدة قعدت مدة كبيره لحد ما لقيت وظيفة الامن دي .
مشيت ايدي في شعرة بحنان احاول اخفف عنه
_ متشلش هم حاجه... انا واثقه انها هتتحل والله.. ربنا كريم .
لقيتة رفع وشه وبصلي شويه وهو ساكت وبعدين بعد واتعدل
_ سيرين انا عارف ان الوضع دة هيطول ... وهتمر عليا ايام صعبه انا عارفها وعشتها قبل كدة ... بس كنت وقتها لواحدي مكنتيش معايا... ومينفعش الايام دي تتكرر تاني وانتي معايا.... عشان كدة......
سكت تاني وفضل باصص تحت كتير ... مش فاهمه.. هو بيفكر في ايه... وعايز يقول ايه صعب كدة ؟!!
_ عشان كدة... عشان كدة انتي لازم ترجعي شقتك.. اعتقد دة وقته.
بعدت عنه وقومت وقفت .. حسيت ان في حاجة قرصتني وانا قاعدة ... هو قال ايه .. ان اوان انفصالنا .. بس.. لأ... ازاي .. لسه... مش فاهمه...!!!
_ قصدك ... قصدك نطلق دلوقتي يعني!!
رفع وشه وبصلي بحزن الدنيا
_ مش هينفع تكوني معايا في الايام اللي جايه... هتكون صعبه... مينفعش .
لفيت حوالين نفسي بتوهه في الاوضه .. وبعدين رجعت وقعدت جنبه تاني
_ ايوا بس.... بس احنا لسه مش عندنا بيبي وانا .. انا كنت متجوزة عشان كدة... ودة محصلش ... يبقى ازاي هطلق.
بصلي شويه بمعنى انا عارف انك هتقولي كدة ... ان اللي انتي متجوزة عشانه لسه محصلش
_ يا سيرين دي ارادة ربنا وبعدين احنا ملحقناش اصلا ... معداش على جوازنا شهر .. قصدي جوازنا الفعلي ... انتي فهماني.
_ لأ مش فاهمه حاجه... خالص
لقيتها بدءت عينيها تدمع وتتكلم بخنقه في صوتها
اخر حاجه كنت ممكن اعملها اني افكرها ان جوازنا وقته خلص زي اتفقنا... بس دة غصب عني هي ملهاش ذنب في مرمطة الايام وممكن شهور اللي جايه .. اجي على نفسي واتحمل بعدها زي ما باجي على نفسي وبتحمل اي حاجه...بس مش هقدر اشوفها بتتمرمط معايا وتشوف اللي انا شفته.. هي انسانه مرفهه جدا ودة واضح في كل شئ .. الحمد لله من يوم ما بقت مراتي وانا متكفل بيها كأي زوج بزوجته ... ومش هينفع الوضع يبقى غير كدة.
فضلت ساكته وبعدين لاحظت دمعه نازلة من عينيها ... طب اعمل ايه هي مش واخدة بالها ان الخلفه دي بايد ربنا وكمان مش حطة في بالها عامل الوقت ابدا
شدتها من دراعها واخدتها في حضني
_ سيرين... الخلفة دي بامر ربنا وبعدين احنا فعلا لسه معداش وقت يخلينا نقلق
سمعت صوت عياطها ... ضمت نفسها ليا اكتر وبعدين اتكلمت بخنقه
_ بس انا مش عايزة اطلق دلوقتي... انا لسه مبقتش أم ... انا مش عايزة دلوقتي... لسه مفيش بيبي.
_ مش هتقدري تتحملي ظروفي الفترة دي.
لقيتها رفعت وشها واتكلمت بحماس
_ لو قصدك فلوس... انا معايا فلوس ممكن نصرف منها سوا لحد ما ربنا يفرجها.ونلاقي وظيفة.
_ مينفعش .
_ خلاص وانا مش هطلق ومش هسيبك ... الا يعني يعني قصدي اما يبقى عندي بيبي و هتحمل معاك كل الظروف والله.
لقيته بصلي شويه وكأنه بيفكر
_ كدة معنديش غير حل واحد ... لو الوضع طول تنزلي تقعدي مع امي وريم في البلد وابقى اجيلكم كل فترة لحد ما تفرج .
يعني برضه هتبقى هنا لواحدك وانا هناك من غيرك
_ بس لو دة حصل اكيد هضطر انزلكوا كل اسبوع اطمن عليكي وعليهم .
مردتش عليه ... ايه الحل دة ... يعني كدة كدة هنتفرق ومش هبقى معاك .. سبته وروحت للدولاب بتوهان وغيرت هدومي وبعدين قربت من السرير ونمت مكاني من سكات ...
_ سيرين ... موافقه عالحل دة ؟
بعد شوية توهه هزيت راسي بمعنى أيوا... وانا مش عارفه ايوا على ايه بالظبط .. بس واضح انها حاجة وحشه
_ مؤقتاً لحد ما .. ما.. ربنا يقدم اللي فيه الخير.
هو نفسه مش عارف لحد امتى ... طب لحد امتى هنفضل مع بعض ... متجوزين... يعني يوم طلاقنا اللي فكرني بيه النهاردة هييجي امتى كدة!!
قربت منه وحطيت راسي على صدرة انا المرادي بهم .. لقيته ريح ضهرة وضمني ليه اكتر وحسيت بشفايفه على جبهتي وبعدين ضمني بدراعة اكتر ودقايق وحسيت ان نفسه انتظم عرفت انه نام فعلا من التعب واللف طول النهار.
قومت براحة من جنبه واخدت تليفوني وخرجت من الاوضة... فضلت اتمشى في الشقه بحيره .. اعصر دماغي ممكن اكلم مين يساعدة ... ازاي القيله شغل بسرعة
كلمت واحد صاحب بابا من زمان واكيد هيساعدني
_ الو ... ازي حضرتك يا انكل معتز .. انا سيرين بهجت.
_ الله يسلم حضرتك.. شكرا ... من فضلك يا انكل كنت قاصدة حضرتك في ... في شغل ..وظيفة .
_ لأ مش ليا ل..ل ..لجوزي .
_ ايه ... وهو ماله دة .. وهيزعل من حضرتك ليه .. هما قايلين عني ليك ايه بالظبط!!
_ عايزني الجأله ليه هو عايز مني ايه بعد اللي عمله .. ما حضرتك عارف هما اخدوا مني الشركة ازاي وعملوا معايا ايه
_ خلاص يا انكل .. شكرا .. وانا بعتذر عالمكالمه دي .
فضلت اعيط بعد المكالمة دي كتير قوي .. هو انا عملتلهم ايه عشان يعملوا معايا كدة .
بعد لحظه افتكرت احمد ... كلمت كذا حد تاني... منهم كتير مردش عليا ومنهم كان كلامة اقسى من كلام انكل معتز .
طب اعمل ايه يا ربي .. انا كان نفسي اساعده قوي واحاول اعملة حاجة .
_ سيرين!!!
بصيت ورايا لقيته واقف عند الاوضة وبيبصلي باستغراب
وبعدين قرب مني وبص للتليفون في ايدي
_ كنتي بتكلمي مين دلوقتي ؟
_ دي..دي الدكتورة بتاعتي.. كنت باخد منها معاد عشان هاروحلها بكرة ان شاء الله.
_ عشاان موضوع الخلفة برضه.
_ ايوا يا احمد ... هو يعني في موضوع غيره.
لقيته قربني منه وبعدين قالي بحنان
_ هتروحي بكرة امتي.
_ يعني على نص اليوم كدة .
_ هاجي معاكي ... عشان اطمن عليكي وعلى حالتك .
بصتله وبعدين هزيت راسي بابتسامه مهزوزة لقيته قرب مني
_ يلا ندخل اوضتنا ... وياريت متقوميش من جنبي تاني .
ابتسمت ليه وفعلا دخلنا اوضتنا ... وفعلا ما نمش الا لما حط راسه في حضني وفضل ضاممني بدراعة جامد .. حسيت انه خايف يصحى تاني ميلقنيش جنبه .. فضلت احرك ايدي في شعره وانا محتارة وبفكر ... واضح ان مفيش حل غير دة يا اما نطلق زي ما قال يا اما نفترق واروح اعيش في البلد وهو هنا.
رانيا أبو خديجة 💖
يا ترااااا فعلااا هيسبها ولا هتعيش في البلد من غيره؟
ولا هو كمان مش هيلاقي حل وهيرجع البلد معاهاااا ويا تراا مصيرهم مع بعض ايه؟؟!!
_ ولما تروح للدكتورة معاه هتقولهم ايه؟!!
عايزة اقولكم ان خلاص مصيرهم مع بعض بدء عالنهاية وهنشوف هينتهي ولا هيكمل ولو هيكمل هيكمل ازاي وسط كل دة ....
تنويه اخير عايزة اقول لكل اللي استغرب ان الروايه اتحذفت من الجروبات وفاكر ان انا اللي حذفتها ... طبعا يا جماااعه مستحييل اكون انا اللي حذفتها .. الفكرة اني اخدت حظر من النشر في اي جروب حتى جروبي فكل اللي نزلته اختفى...ومش عارفه بعد الحظر دة ما يتفك هيرجع تاني ولا هضطر انزله من الاول... الروايه مش هتقف عشان عارفه انكم هتدخلوا تقتلوني عالخاااص 😂زي ما بيحصل حاليااا 👊بس الادمن هتنزلها بدالي عالجروب بتاااعي ... يعني كدة موجودة عالجروب برضه.
يلااااا قرأة ممتعة وتفاااااااعل كتيييير بقااااا ❤️❤️❤️ شجعوووني انتوا بدل ماااارك المحبط دة🙂❤️❤️
#حمل_بالتراضي
#أخر_أمل
#رانيا_أبو_خديجة