رواية حمل بالتراضي الفصل الاول والثاني بقلم رانيا ابو خديجه
رواية حمل بالتراضي بقلم رانيا ابو خديجه
_ اومااااااال انا اتجوززززتك ليه ... انا عااااااايزة طفل ... وانت دلووووووقتي جوزززززززي !!!!
فضل واقف يبصلي ويبص للي أنا لبساه بزهول وكانه اول مرة يشوفني ... عنده حق بصراحة انا اول مرة من وقت ما اتجوزنا البس كدة بس اعمل ايه زهقت ويأست منه كان لازم اعمل كدة .
خرجت من عيادة الدكتورة بتاعتي وانا تقريباً منهارة مش عارفه اعمل ايه ...
ايوا الحمد لله وصلت أخيرا لشقتي اللي ممكن انهار فيها براحتي
دخلت ورميت نفسي عالكنبة حيرانة مش قادرة استوعب اللي الدكتورة قالتهولي لحد دلوقتي ... دقايق بالظبط وقمت قولت اخد دش عشان افوق ... دخلت الحمام لقيت بعض المستلزمات الخاصة بيا خلصانه بسرعة رفعت سماعة التليفون وكلمت الامن اللي واقف على بوابة الكومباوند من برة ومليته الطلبات اللي انا عايزاها .
وسريعاً كان الباب بيخبط فتحت لقيته في وشي .
ايواااا ماهي نقصاك دلوقتي هتفضل تبحلق فيا ساعة قدام .
اخدت منة الحاجة وسريعا التفت اديلة الفلوس خليني اخلص من تناحته هو صحيح شاب وعسول وتحس كدة انه غير اللي واقفين عالبوابة بره بس يجرالة حاجه لو متنحش في وشي كل ما يشوفني وكانه بيتعرف عليا يا ابني لو انا شبه حد من عيلتك قولي وريحني . روايات رانيا أبو خديجة
اديتة الفلوس وكنت هقفل الباب لقيتة بدء يتحنح كدة بحرج وسالني بتردد
احم .. شوفت حضرتك من شوية داخلة الكومباوند كنتي شكلك تعبان قوي ... خير مالك يا استاذة ؟
بصتلة شويه كدة وكان نفسي اقوله اللهي يكرمك اول مرة حد يحترمني قصدي يسألني مالك
_ احم .. الحمد لله يا احمد انا كويسة شكراً لسؤالك .
بصلي لاقل من ثانية وبعدين خرج بس مش عارفه ليه بعد ما خرج جات في بالي فكرة شكلي كدة هدعي على نفسي سنة قدام بسببها .
وفضلت افكر فيها طول الليل لحد ماحسمت امري ويادوب استنيت لما النهار طلع و حطيت الروب عليا وخرجت لحد البوابة ابص على كل الامن اللي قاعدين ملمحتهوش نسيت تماماً انه ورديته بتبقى بالنهار بس يعني قدامه شوية تقريبا على ما ييجي
حسيت ان حد منهم لمحني بصيت لنفسي بمنظري دة ولقيت ان معاهم حق
دخلت بسرعة ورفعت سماعة التليفون وطلبته بالأسم انه اول ما يوصل يجيني
_ايوا يا استاذة حضرتك عايزة حاجة .
فضلت ابصلة شوية حلوين وكاني بقلبها في دماغي قبل ما اتهور .
_ يا استاذة ..خير لقيت حضرتك سيبالي رساله عالبوابه انك عايزاني.. خير كان في غلط في حساب امبارح ولا ايه؟!
_ ادخل يا احمد ... عايزاك في حاجة مهمه .
بصلي شويه
_ حضرتك متأكدة ادخل؟
_ ايوا بقولك ادخل ..
دخل وقعد بمنتهى الحرج قعدت عالكرسي اللي قدامه انا كمان وبدءت اتكلم . روايات بقلم رانيا أبو خديجة
_ شوف يا احمد ممكن يبقى اللي انا هقولهولك و اطلبة منك دلوقتي دة غريب بس طبعا انت ليك حق الاختيار في القبول او الرفض... بس صدقني انك لو وافقت على اللي هطلبة منك دة انا هكون ممنونالك جدااا بجد وهبقى تحت امرك في اي حاجة ماديه تطلبها .
_ انا مش فاهم حاجه خالص الحقيقة.
_ احم ... اا ... ينفع .. ينفع...
بص انا طالبة ايدك للجواز....
بالظبط كدة تنح زي ما توقعت لأ دة سكت كتير قوي انجز يا عم مفيش وقت للتفسير..
_ هو حضرتك قولتي ايه؟!!!
_ اسمعني بس احنا هنتجوز على سنة الله ورسولة قدام الناس كلها يعني مش هعمل حاجه غلط ودة لفترة لحد يعني ما احمل واجيب بيبي .
بصلي كدة وجمع حواجبة باندهاش وعدم فهم وغباوة .
_ انا امبارح عرفت من الدكتورة بتاعتي اني لازم اعمل عملية ضروري اشيل فيها الرحم و مقدميش اي فرصة للحمل الا لفترة محدودة جدا والا هيكون في خطر على حياتي وانا وحيدة من بعد وفاة بابا اخر حد ليا واملي الوحيد في الدنيا
مش هيبقى عندي في حياتي غير البيبي دة .. ارجوك توافق وانا والله عمري ما هنسالك الجميل دة ابدا ومستعدة اعملك اللي انت عايزة واوافق على كل شروطك وطلباتك.
خلصت كلامي وانا بحاول اتماسك و امسح دموعي اللي نزلت غصب عني .
_ والطفل دة انا هبقى ابوه وانتي امه؟!!!
بصتلة كدة بحاول استوعب الغباوة اللي طالعه من بوقه معلش اصبري ماهو معذور برضه
_ ايوا طبعا اومال يعني مين هيكون ابوة لو انا اتجوزتك .. دة لو انت وافقت يعني.
_ اسمحيلي اسأل حضرتك سؤال ... حضرتك ليه متجوزتيش لحد دلوقتي وخلفتي من زمان ؟!
كنت على وشك اقولة و وانت مالك زي ردي على باقي الغلسين اللي في حياتي بس منستش اني محتجالة بجد .
_ صدقني لحد النهاردة ملقتش حد مناسب يكون عايزني عشاني انا مش عشان عايشة لواحدها بقى وعندها كتير زي ما دايما بيتقالي .
بصلي كدة وكأنه بيتاملني وقال
_ غريبة .. مع ان حضرتك زي القمر و....تتحبي ..
بصيت بعيد وبعدت عيني عنه ...اتكسفت فعلا من كلامة
_ المهم ... انت قولت ايه ؟
سكت شوية كدة وكانة بيفكر ... ايه دة ابتسامة اللي شفتها بتنطق من عنية دي ولا انا بيتهيئلي لقيته زود في سرحانه وهو باصص لبعيد كدة ... اتنحنحت عشان ياخد بالة إنه تقريبا نام وهو بيتكلم معايا .
_ طب دلوقتي لو فعلا اتجوزنا وخلفنا زي ما حضرتك عايزة فلو.... .....
_ ياارب اللهم امين... وصدقني هنطلق بعديها علطول ومش هكلفك اي حاجه نهائي.
زعل كدة فاجاه و وشه اتقلب بعد ما كنت تقريباً حاسه انه ابتدا يوافق.
_ طب بعد كدة ... وضعي انا مع الطفل دة هيبقى ايه؟
_ عادي ...هتفضل ابوة طبعا وهتشوفة في اي وقت انا يهمني ابني يتربى تربية سليمة ومحرموش من وجودك كأبوه.
سكت كتير.. لأ كتير قوي .. ياربي عالقلق والتوتر اللي انا فيه دة ... مصيبه ليطلب وقت يفكر كدة يبقى اكيد هيرفض يارب يطلع مجنون ويوافق ...
_موافق .
_ بجدددد والله!!!! شكرا بجد ربنا يخليك ... وانا تحت امرك في اي حاجه.. كل اللي تطلبه.
_ عندي شرط واحد!
_ طبعا انا تحت امرك في اي حاجه .
_ احنا مش هينفع نتجوز هنا .
_ لي بس ... دي شقتي؟!
_ ماهي دي المشكلة .. دلوقتي لو انا وحضرتك اتجوزنا ان شاء الله هيبقى منظري قدام زمايلي برة عامل ازاي اكيد هيقولو عليا وعلى حضرتك كلام مش كويس خالص صدقيني انا مش مشكله ومش هتفرق معايا لكن انتي هيبقى وقتها صعب عليا اسمع عليكي اي كلمة مش حلوه وانتي مراتي .
_ طيب اومال هنتجوز فين ؟
_ في شقتي .
_ شقتك ... انت عندك شقة ؟
_ اومال يعني عايش في الشارع
صحيح هي على قدها كدة مش زي دي بس في الاخر شقتي وبعيد عن هنا .
_ خلاص وانا موافقة وهي كدة كدة فترة مؤقتة .
لو عجبتكوا قولوا كملي وهكملها باذن الله
على حسب التفاعل هفهم👊🥺
وياارب تعجبكوا عشان انا اصلا نفسي اكملها 🤝😂❤️
#كتابات_رانيا_أبو_خديجة
↚
حمل بالتراضي الفصل الثاني
دخلت شقتة و مش عاااااارفه لية كنت خااااااااايفة يمكن
عشان اول مرة ادخل شقة راجل غريب عني ... ايه اللي انا عملتة في نفسي دة ...
كنت ببص في كل اتجاه فيها هي اه بسيطة جدا بس اضائتها هاديه و فيها صمت غريب يديك احساس بالألفة والهدوء .... فوقت من شرودي عليه وهو بياخد من ايدي شنتطي اللي فيها حاجاتي اللي جبتها معايا من شقتي وقالي وهو بيبصلي
_ اتفضلي تعالي اوريكي اوضتك .
ابتسمت ابتسامه مهزوزة كدةودخلت وراه ... فعلا حط الشنطة على السرير
_ تحبي اساعدك تفضيها واعرفك تحطي حاجتك فين .
_ لأ تمام ... انا هتعامل متقلقش
_ طيب انا هنزل اجيب شوية طلبات للبيت و حاجة ناكلها .
نزل وسابني في شقتة لواحدي لقيت ان انا مش لازم اضيع وقت وغيرت هدومي بسرعة وحطيت حاجتي في الدولاب وكله تمام
كلها دقايق و سمعت صوت مفتاح الشقه وسمعت خطواته بتقرب من الاوضه وفعلا دخل بصلي شويه كدة ...يادي النيلة رجعنا للتناحة فيا تاني طب والله زهقت ها
بس المرادي كانت بصتة مختلفه كنت خلاص غيرت هدومي لبيجامة مريحة و كعادتي لما اجي انام فردت شعري حسيت في نظرتة انبهار شويه كمان المرادي كان بيبصلي بدون حواجز زي قبل كدة اخره يتنح في وشي شوية وبعدين يبعد عينيه بحرج.... المرادي تقريباً فصلني كلي انا عارفة ان أنا حلوة بس بصتة دي حسستني احساس غريب قوي احم بس حلو الصراحة
ايه دة في ايه هو مالة بيقربلي كدة ل...شوف مش أنا واقفه قدامك هاديه اهو وبريئه بس انا أصلا عايزة اجري من خوفي اه والله.
وقف قدامي بطولة دة لقيت نفسي برفع راسي وببصلة
_ حد قال لحضرتك قبل كدة انك حلوة قوي .
_ اه ..لأ ...مش فاكرة ...
وكان نفسي أديني بالقلم على وشي في اللحظة دي مش عارفه انا راحت فين بجاحتي وجرائتي وأنا بطلب منه الجواز وانا واقفه قدامة دلوقتي زي الفار المبلول كدة
_ تحبي نتعشى هنا ولا برة ؟
_ انا مش جعانة اصلا
لقيتة متردد كدة وشكلة مكسوف ميعرفش ان انا مكسوفة اكتر منه بس اعمل ايه انا مضطرة اتخلى عن خوفي وكسوفي دة انا اكتر واحده عارفه ان مفيش وقت
قربت انا وحطيت ايدي على دراعة
_ لو انت جعان كُل انت
_ لأ خلاص انا مش عايز .
_ طيب كويس نبقى متفقين .
قولت كدة وروحت قعدت على طرف السرير واستنيت اي اشارة او مبادرة منه وبعد لحظات صمت تقيلة بجد
اتحرك وجه قعد جنبي وبعد بصاته ونظراته اللي مبتخلصش رفع ايدة بهدوء و حط شعري ورا ودني وبراحة قربلي اكتر و لقيته بيسالني
_ لو ربنا كرمنا و حصل حمل علطول هتطلبي الطلاق وتسبيني علطول ولا هتستني اما تولدي وتتطمني بوجود الطفل معاكي ؟
_ صدقني والله اول ما يحصل حمل علطول هنطلق انا مش هبقى عايزه منك حاجه تانيه .
_ بصلي بصه ترجمتها بعدين ب" يا بجاحتك يا وقاحتك"
وبعدين بعد فاجأه وقام وقف
_ انا شايف اننا محتاجين وقت ناخد فيه على بعض شويه ولا حضرتك شايفة ايه؟
مش عارفه لية من بعد ما كتبنا الكتاب وانا مبسمعش حضرتك دي الا لما يكون متضايق او باين عليه زعلان مني.
حسيت براحه غريبة اما قالي كدة وفي نفس الوقت حيرة يقصد ايه بمحتاجين وقت دي ولحد امتى يعني... الدكتورة قالتلي مقدميش اكتر من سنة ؟!
_ عندك حق
لقتني بقولة كدة ماهو اكيد مش هعارض في حاجة زي دي يعني.
سابني وخرج برة الاوضه وفات اكتر من ساعة وبرضه مسمعتلوش صوت ... خرجت بتردد كدة اشوفه راح فين لقيتة نايم على كنبة قدام التليفزيون المقفول ...هو كمان هينام هنا ؟!!!
مشيت شوية وقربت منه وبصيت في وشة اول مرة اشوف احمد بالقرب دة كان النهاردة.... هو اصلا مجاش عندنا في الكومباوند غير من قريب قوي ... ياااه لسه دلوقتي حالا مكتشفه اني تقريبا معرفش عنة حاجة
بصيت في وشة كتير قوي حاسه اني اول مرة أشوفه .. اممم اول مرة أخد بالي انه عسول كدة مااشي ماعلينا ... اما ادخل أنام بقى احسن يصحى ويلاقيني قاعدة متنحالة كدة يتخض .
روايات رانيا أبو خديجة
مشيت؟؟!!
فتحت عيني اول ما دخلت الاوضة ... فضلت نايم عالكنبة طول الليل بس عيني مغمضتش مش عارف انا غلط اني وافقتها ولا ايه كل اللي أعرفه اني ما صدقتش ان الانسة سيرين الاستاذة اللي دايما كنت ببصلها على انها حتة من السما ممكن تبقى مراتي ... وفعلا هي دلوقتي معايا وفي شقتي ونايمة على سريري .. ومكتوبة على اسمي ... مش عارف افرح ان حلم الليالي اللي فاتت من يوم ما شوفتها اول يوم ليا شغل في الكومباوند وانا ومش قادر اتخطى التفكير فيها وعرفت بعدين من زمايلي انها عايشة لواحدها فعلا بعد وفاة والدها من اكتر من سنة وانا كل ما أشوفها داخلة وخارجه من الكومباوند ببقى عايز اكلمها واطمن عليها خصوصاً انها معظم الوقت كنت اشوفها حزينة وباين عليها الوحدة والهم ببقى هموت وأكلمها واقولها على فكرة احنا معاكي هنا انتي مش لواحدك .
ايه دة اذان الفجر دة اللى سمعتة ... الوقت خادني وانا بفكر فيها قومت صليت و حاولت انام
صحيت على مكالمة من زميلي بيقولي اني اتأخر عالشغل
قومت بسرعة ودخلت الحمام ووقفت قدام الاوضة شويه المفروض ادخل اجيب لبسي من جوا مانا كل حاجتي في الأوضة .
خبط عالباب خبطتين ومسمعتش صوت قلقت فتحت الباب ودخلت ...........
ايه دة الله !!!!! ابتسمت اول ما شفتها نايمة كدة مكاني كانت رايحة في النوم ونايمة براحتها لأ براحتها قوي يعني وشعرها الناعم الطويل دة مغرق وشها كانت زي القمر كالعادة لقيت نفسي بقرب منها وفعلا قعدت عالسرير جنبها ومديت ايدي ارفع الحرير دة عن وشها ابتسامتي زادت انا فعلا فرحان قوي حاسس ان ربنا بيحبني قوي كدة عشان يخترني ليها
ميلت عليها غصب عني و كنت لسه هاااا .... ايه دة عنيها بني فاتح
قمت بسرعه اول ما فتحت عنيها وبصتلي بعيون واسعة كدة ... يا ربي على جمالها وهي صاحية من النوم ... هو انتي علطوول حلوة كدة؟!!!
قربت من الدولاب اطلع هدومي
_ صباح الخير .... انت بتعمل ايه ؟!
_ هلبس عشان اروح الشغل .
قامت من عالسرير
_ معقولة هتنزل الشغل النهاردة.
_ انا مقدرش أغيب من الشغل انتي عارفه اني مبقليش كتير فيه .
_ ايوا بس احنا متجوزين امبارح... ازاي هتنزل الشغل النهاردة بس؟!!!
_ متقلقيش مش هتأخر عليكي.
...........................
طب و بعدين متجوزين دلوقتي بقالنا خمس ايام والأستاذ يصحى يروح الشغل و بقى متعمد يرجع متأخر وطبعاً ينام عشان يصحى بدري يروح شغلة ... انا مش فاهمه هو بيعمل كدة ليه ...
قومت وقفت قدام المرايا يمكن يكون فيا حاجه وحشه او مش عجباه ... اللي يشوفه وهو بيبصلي كل مرة يشوفني فيها ميشوفش تجاهلو دة ابدا .
اوووف طبعا والله عندة حق دة منظر عروسة اتجوزتي زي مامتجوزتيش نفس الخلقه فين التغيير اللي يجذبة ليكي ويحسسه ان اللي معاه دي مراته مش الاستاذة سيرين اللي علطول قافلة على نفسها ... انتي لازم تعملي حاجه مختلفه مش عيب ولا حرام دة دلوقتي جوزك ... يلا ....
نزلت بسرعة وروحت اشتريت حاجات كان لازم اجيبها قبل الجواز أصلا... قدامة دلوقتي ساعة تقريباً على ما ييجي لازم الحق اجهز بسرعه. روايات رانيا أبو خديجة
خلصت ولبست حاجه مناسبة لكوني عروسة جديدة وحطيت مكيب مناسب يبيني اجمل وحطيت اسبراي يدي لامعة على جسمي وعلى شعري حاسه ان بقى شكلي فعلا حلو ومختلف بصيت في المرايا على شكلي يا نهااار مش هيفوت النهاردة انا اول مرة اشوف نفسي كدة البتاع دة قصير قووي فوق الركبة بكتير ومفتوح من فوق حسيت اني مش هقدر اقابلة كدة روحت للدولاب احاول اختار حاجة تانيه ألبسها يادي النيلة كل الحاجات اللي البنت اختارتهالي نفس الهيئه تقريبا ... ايه دة صوت الباب اللي انا سمعته دة ولا ايه دورت في الدلاب بسرعة لدرجة اني كنت هقع على حاجة .... وفاجأة....
_ سلام عل....
وقفت قدامة بحاول اداري كسوفي وخجلي وبعدين شجعت نفسي مانا لازم افك من الكسوف دة مفيش وقت اضيعة فيه.
قربت منة ورديت السلام بابتسامه
_ حمدالله على سلامتك.
_ ال... الله يسلمك.
_ تحب تتعشى ولا اكلت بره كالعادة ؟
سكت كتير تقريباً مسمعنيش أصلا مفيش حاجه بتتحرك فيه غير عنيه اللي جابتني من اولي لأخري بزهول أقرب للصدمة
قربت منه ورفعت راسي وبصتلة واتكلمت بصوت هادي ما أنا جاتني نيلة معرفش اتكلم بصوت اغراء
_ احمد ... ممكن تنام هنا النهاردة.
برضه بيبصلي وهو ساكت هو تقريبا دخل في غيبوبة وهو واقف معلش عذراك اكيد اتخضيت انا برضه اتخضيت اول ما شوفتني كدة .
_ ممكن ؟.... انا اصلا مش عارفه انت بتنام ليه بره مش دي برضه اوضتك ودلوقتي بقت اوضتنا .
_ ايه ... اااا ... طبعاً هي دلوقتي اوضتك انتي .. بقلم رانيا أبو خديجة
_ لية بقى وهو انااا متجوزااااااك عشان تبقى دي اووووضتي لواحدي ؟
اومااااااال انا اتجوززززتك ليه ... انا عااااااايزة طفل ... وانت دلووووووقتي جوزززززززي !!!!
اتمنى تعملولي متابعه عالأكونت يا بنااات عشان باذن الله هنزل عليه حاجاااات قريب هتعجبوووواااا ❤️🥰
انا اول مرة اكتب باللغه العاميه كدة وكمان اول مرة الابطال هي اللي تتكلم و توصف وانا قاعدة أتفرج واكتب بس😂😂 وعشان كدة مش هتبقى كبيره خااااالص لأ هقللها عشان تبقى حلوة ومش مملة❤️🤝 اتمنى اشووف تفاعلكم عشااان انزل الباقي علطوووول
#كتابات_رانيا_ابو_خديجة
#أخر_أمل
#حمل_بالتراضي
#يتبع