رواية حمل بالتراضي بقلم رانيا ابو خديجة
رواية حمل بالتراضي الفصل السابع والثامن بقلم رانيا ابو خديجة
الفصل السابع #حمل_بالتراضي
_ ااااااااه ... رجلي وجعتنييييييي قوووووي .
قولت كدة بألم وانا بنحني ابص على رجلي اللي فعلا اللمتني بسبب طريقتة في مشيتنا .
_ حقك عليا أسف .... وريني كدة مالها .
قعد على ركبتة عشان يشوفهالي
_ متخااافيش هي بس عشان لسه في الاول بعد ما فكيتي الرباط.. لكن مفيهاش حاجه اهي .
_ وايدي كمان وجعتني على فكرة ... انت كنت بتعصرها في ايدك .
قام وقف وبصلي شويه وفاجأة ابتسم ومسك ايدي وباسها
_ حقك عليا... أنا أسف بس مش عارف ايه اللي ضايقني لما لقيت الناس بتبصلك كدة ..
_ انت مش عارف.. وانا كمان مش عارفه.. اوووف .
لقيتة بصلي شويه كمان وبعدين ضحك ضحكتة الحلوة دي .
_ بتضحك على ايه دلوقتي ؟!!!
_ ما انتي لو جيتي مكاني وشوفتي شكلك لما بتبقي مقموصة كدة بتبقي عامله ازاي هتضحكي .
ابتسمت انا كمان غصب عني ...
_ طب ايه هنفضل واقفين كدة .
خبط عالباب خبطتين واستنينا لحد ما سمعنا صوت بنت بتقول
_ ميييييين !!!
لقيتة ابتسم فاجأة أول ما سمع صوتها
_ انا احمد يا مريومة .. افتحي.
_ اااااحمممد..
فتحت الباب بنت جميلة تشبة احمد كتير قوي ... لقيتها حضنته وهو كمان حضنها جامد قوي .. بجد يا بختهم ببعض
_ احمد ... وحشتني قوووي ... اخيرا افتكرتنا وجيت .
رد احمدوهو حاضنها هو كمان
_ والله وانتي يا مريومة.. عاملة اي يا حبيبتي.
_ الحمد لله كويسه ... وهتجووززز
قالتها بدلع لقيت احمد كشر بهزار وقالها وهو بيخبطها بإيده على دماغها
_ خليكي كدة فكريني وعاندي فيا كل ما تشوفيني لحد ما الغي الجوازة دي خااالص
ضحكت وبصتلي ... ايه ده اخيرااا شفتني واخدت بالها مني
_ احم ... اومال مين الاستاذة يا احمد.
_ هي امي ما قالتلكوش ولا ايه... دي سيرين مرااتي .
برقت وهي بتبصلي
_ هي دي مراتك اللي امي بتقول عليها ؟!!!!
فضلت تبصلي شويه وبعدين قربت وحضنتني و بقت تبوسني من خدودي ...
_ اهلا بيكي ... نورتي البلد
_ شكرا.. ربنا يخليكي.
قربت من اخوها وقالتلة حاجة في السر بس انا سمعتها
_ هي دي مراتك.... يا خربيتك دخلت بيها البلد دي ازاي ؟!!
ليه هو انا مخدرات... كان نفسي اسألها ؟!!!
_ لية .... مالها ؟!!!
_ شبة الممثلين اللي بيطلعوا في التليفزيون ... وحلوة قوي .
بجد انا حلوة كدة... ربنا يخليكي انتي واخوكي بتدوني ثقة في نفسي.
_ طيب عن اذنك يا سيرين.. هروح اقول لماما وريم انكوا جيتوا.
سبتنا فعلا و طلعت سلم جري واضح ان بيتهم من دورين زي باقي البيوت إللي هنا تقريبا
_ احمد ... هي مامتك لسة زعلانة من جوازنا... يعني ممكن تزعل ان انا جيت معاك .
_ امي ست طيبة يا سيرين ومبتشلش في قلبها كتير .. هي بس زعلت اني عملت كده من وراها .
………………………………………
_ يا أماااا .. يا أمااا ... الحقيييي .
_ اية يا بت في ايه مالك مسروعة كدة .
_ احمد جة تحت ومعاااه مرااااتة .
_ ......... هي جت معاه ؟
_ ايوا ... موجودين تحت .
_ طب امسكي حطي بقيت الاكل دة للفراخ ومتنسيش تحطولهم ميا واني نازلالهم .
_ حاضر يا أما.
_ بت يا مريم .. مريم .
_رييم .... انتي هنا بتعملي ايه ... انزلي شوفي يا اختي مرات اخوكي .
_ امك يا اختي مدبساني معاها في اكل البط ... المهم قوليلي مرات اخوكي عاملة ازاي .. حلوة يا مريم ؟
_ يالهووي يا بت يا ريم حلوة حلاوة .. شبة الممثلة الحلوة دي اللي بتطلع مع محمد رمضان في المسلسل.
_ايه دة بجد ... شبة مين... روجينا ... اللي بتقول يا عمرررري ؟؟
_ روجينا مين انتي كمان ... التانية دي الحلويايه أبصر اسمها ايه ... مش فاكرة...
_ لأ استني مش مهم البط دلوقتي.. انا نازلة معاكي أشوفها .
.............................
_ حمدالله على السلامه يا احمد يا ابني.
قرب احمد منها وباس ايديها .
_ الله يسلمك يا ست الكل... عاملة ايه يا حبيبتي.
مردتش علية فضلت بس تبصلي وكأنها زعلانة مني انا .. اتوترت من بصتها قومت بصيت لاحمد باستنجاد ... قرب مني واخدني من ايدي
_ مش هتسلمي على سيرين.. مراتي .
_ مين المفروض يسلم على مين يا ابن بطني .. يا متعلم ياللي بتفهم .
_ عندك حق يا ست الكل.. قربي يا سيرين سلمي على امي .
بصتله وانا فعلا كنت خايفة منها ماهي بتبصلي بصات تخوف والله!!!
_ أهلا.. ازي حضرتك يا طنط ؟!
_ طنط !!! مسسم .
_ هي مالها عملت كدة لية .. هو انا شتمتها !!!
احمد قرب مني وهمسلي في ودني .
_ قوليلها يا امي احسن يا سيرين.
_ أمي !!!!
هز راسة بمعنى ايوا مالك مستغربة ليه
_ ازي حضرتك يا أمي .
_ احمد .. تعالى ورايا .. عايزاك يا ابني .
قالت كدة وسبتنا ومشيت دخلت اوضة وقفلت الباب جامد
_ استنيني هنا يا سيرين.. دقايق و راجعلك.
هزيت راسي بمعنى ماشي .. وانا فعلا زعلانة هما مالهم هنا مش طايقني كدة ليه .. يا ريتني ما كنت جيت .
روحت قعدت على كنبة من الخشب محطوطة في وسط البيت وحطيت ايدي على خدي بزعل ... مش كان زمانك دلوقتي قاعدة في بيتك بكرامتك احسن؟!!
سمعت صوت جاي من ناحية السلم .. اه دي مريم نازلة ومعاها واحدة تانيه شبة احمد ومامتة قوي اكتر من مريم.. هما كلهم شبة بعض كدة لية!!!
قربوا عليا وكالعادة من وقت ما جيت ...بصتلي برضه شويه .
_ مش تقولي ياسمين صبري ياللي مبتفهميش.
قالت كدة لمريم وهي بتضربها في كتفها ... هي تقصد ايه ؟!!
_ أيييي ... ايدك تقيلة ياللي تنشلي .
اللة... دول بيشتموا بعض عاااادي ...
_ أهلا وسهلا.. يا أهلا يا أهلااااا ... انا ريم اخت احمد المفروض الصغيرة... بس خلي بالك مش صغيرة قوي يعني انا في اولى كلية اعلام .... يعني بعون الله صحفية قد الدنيا.
ابتسمت ... شكلها لذيذه قوي هي ومريم كمان حساها طيبه
_ أهلا بيكي وانا سيرين مرات احمد .
قربت مني هي كمان وحضنتني بسعادة غريبه و باستني زي مريم.... الله اخيراااا حد انبسط بوجودي هنا .
_ انا كنت عارفه ان احمد اخويا هيقع واقف برضه .. اصل احمد اخويا دة في نظري يستاهل ست البنات
لقيتها بصت حواليها كدة وبعدين قربت مني وقالت في السر
_ كلام بيني وبينك أمي كانت عايزة تجوزة البت سماح جارتنا اللزقة دي..
وبعدين علت صوتها بفرحة
_ بس الحمد لله.. ربنا نجدها نوسه ...
وضحكت
_ اه.. يعني مامتك كانت عايزة تجوزة سمااااااح ..امممم .
_ اشششش ... بقولك كلام في سرك .
قالت كدة وشورتلي على بوقها بمعني صمت..
_ عشاان كدة مامتك زعلانة من جوازي انا وأحمد؟!!
_ لاااا انا مامتشي زعلانه من حاجااااات كتييي..... ايه يا زفتة بتزغديني لية ؟!!
_ متصدقيش البت دي يا سيرين.. أمي والله طيبة وانتي هتحبيها لو عرفتيها .
................................
_ خلاص بقى قولتلك ظروف وكان غصب عني والله... حقك عليا يارب اموووت لو خبيت عليكي حاجة تانية
_ اخرس .. ومتدعيش على نفسك تاني .....
_ طب خلاص بقى والله ما قصدي ازعلك .. خلاص بقى يا امي زعلك غالي عليا والله.
انا عارف ان أمي طيبة ... بس هي ليها حق تزعل أنا عارف والله... انا تقريباً عمري ما خبيت عنها حاجه.. فاكيد حاجة زي الجواز مش هتكون سهلة عليها .
_ عايزني أرضى عنك وعن المحروسة اللي جايبها معاك دي .
_ ياااريت يا ست الكل ... وعلى فكرة المحروسة دي طيبة قوي .. أول ما تعرفيها والله هتحبيها ... هي كمان هت....
_ تتجوزوا هنااا .
سكت ... هي قالت ايه ... هما مين دول اللي يتجوزوا هنا .
_ لو عايز ترضيني وتراضي اخواتك تعمل فرح كبير وسط اهلنا وناسنا و متحرمنيش من فرحتي بيك .. ابني الوحيد ... واخواتك حقهم يفرحوا بيك و مريم تتشرف بيك وبالمحروسة بتاعتك قدام نسايبها ... ولا لما يقولولها ويسألوها اخوكي اتجوز امتي هترد الغلبانة تقولهم ايه ...دي اللي عندي قولتهولك .. قولت ايه .
_ ايوا يا امي بس هنلحق نعمل دة امتى بس وازاي .. فرح مريم هياخد كل الوقت وكمان .....
_ مليش دعوة اتصرف ...نفرح وسط اهلنا وناسنا زي ما قولت ... ان شاء الله حتى تعمل فرحك مع فرح اختك .
_ ازاي يعني يا أمي دة كلام!!
_ وفيها ايه يعني ... الفرح فرحنا واحنا حرين فيه ... قولت ايه .
_ طب سبيني اقول لسيرين وارد عليكي.
_ انت لسة هتشور المحروسة... اوعى كدة وأني اللي هقولها وتبقى تعترض بقى.
_ يا امي استني بس ... يا امي ...
........................
_ وبعدين ؟
_ بس يا ستي... هو شافني بقى رمضان قبل اللي فات و انا بملى ميا من الطرمبة اللي جنب الترعة اللي هناك دهي .. ولقيته جاي ورايا كان وقتها المغرب أذن وقاعدين وهنفطر .. ولحسن الحظ احمد اخويا كان اجازة معانا هنا .
_ وبعدين... كملي .
_ استني اكملك انا بقى ... جة يا ستي واحنا بناكل واحمد اخويا اللي قام فتحله .. احنا لقينا احمد اخويا غاب شوية قدام الباب وبعدين دخلة عالمنضره بتاعت الضيوف وجة قال لمريم ...
_ قالي حضري صنية عليها فطار كويس عشان فيه ضيف هيفطر معايا و قالي ابقي نادي عليا متدخليش انتي ...
_ كل دة واحنا مش فاهمين حاجة .
_ اه مكنتش عارفة حاجة اصلا ... لحد بقى بعد ما مشي واحمد اخويا قالي وقالي انة هيسأل عليهم جيرانهم ولو طلعوا كويسين ها يديه معاد عشان ييجي واشوفه واقعد معاه .
_ و اكيد جه وقعدتي معاه؟!
_ اه ... عرفتي منين ؟!!!
_ يا بنتي مش هتتجوزوا اهو .
_ اه صح. ..وصراحة يعني لقيتة شاب محترم كدة و.. و..
_ و اية يا مريم .. كملي حبيت قصتك .
_ عايزة تقولك لقتة عسول وحليوة زي ما قالتلي بس مكسوفة.
_ كدة يا ريم ... طب مش هقولك حاجه تاني .
سمعت صوتها جاي من بعيد
_ اسمعي يا مرات ابني... فرحك انتي واحمد لازم يتعمل هنا في البلد واهله وناسه يحضروا .. قولتي ايه .
_ بجد يا ماما .. احمد هيعمل فرحة هنا في البلد.
_ ايوا .. هيعملة مع فرحك يا مريم .
_ احمد ... وحشتني قوووي .
_ ازيك يا ريم يا حبيبتي.
وبعدين بعد عن حضن ريم وبصلي شوية بتردد وبعد كدة بص لوالدته .
_ خليها مرة تانية يا امي ... خلينا بس نركز في فرح مريم دلوقتي و نبقى نشوف موضوعي دة بعدين .
_ أني قولت فرحك يتعمل مع فرح مريم يا احمد .. وعنيدني بقى و قول لأ عشان يفضل قلبي قافل منك كدة .
بص لوالدته بحيرة وبعدين بصلي تاني ..
_ وفيها اية يا احمد .. مانعمل فرحنا هنا عشان مامتك متزعلش .
ميل عليا و سألني
_ يعني انتي موافقة.
رديت بحماااااس
_ جدااااا .. موافقة جداااا ...نعمل فرح لينا مع فرح مريم .
_ ياريت يا احمد والله ويبقى الفرح فرحين فرحي انا وعزت وفرحك انت و ياسمين قصدي سيرين.
_ وافق يا احمد عشان خاطري.. دة انا كان نفسي احضر فرحك قوي .. مابالك بقى هيبقى فرحك انت ومريم في يوم واحد .
بصلهم ولحماسهم بسعادة وبعدين لقيتة باصصلي وهو مبتسم لابتسامتي
_ خلاص باذن الله هقعد مع عزت النهاردة واحدد معاد لكتب الكتاب والفرح .
لقيت مريم فرحت قوي و حضنت اختها بفرحة وحماااس كبير .. وانا كمان احمد كان بيبصلي بنظرة في عنية غريبة بس حسيتها حلوة .. نظرة حد فرحان بجد وعلى وشة ابتسامة جميلة قوي .
…………………………
النهاردة المفروض نزلنا عشان نجيب فستان مريم وطبعاً احمد قالي ان انا كمان لازم أجيب فستان عشان الفرح
_ شوف دة جميييل ازاي.
بصلة شويه كدة وفضل يمسكة بايدة
_ انتي عايزه تلبسي دة عندنا في البلد ؟!!
_ وفيها ايه دة شكلة جميل قوي .
اخدني من ايدي وقالي
_ لأ دة مينفعش .. تعالي بس معايا في حاجات جوا أحلى.
فضلنا نتفرج على حاجات كتير .. .
_ ايه يا أحمد لسة ملقتوش حاجه عجباكوا ... احنا عجبنا دة .
حلو قوي فستان مريم ... بس انا مش عارفه ليه كل ما اختار حاجة مش بتعجبوا وهو كل ما يختار حاجة بحس انها مش هتبقى حلوة
_ وانتي يا ريم لقيتي فستان يناسبك .
ردت ريم بفرحة
_ اه يا احمد اخترت فستان موڤ جميل .. بس تعالي معايا يا سيرين شوفية معايا قبل ما اختارة
رحت معاها كانت مختارة فستان سوارية شكلة حلو قوي .. خلصوا هما كدة ومريم خطيبها قرر ياخدها يرواحها هي وريم عشاان عندة شغل اما انا واحمد فلقاني زعلانة عشان مفيش حاجه عجباه اخدني بالعربية وروحنا مكان بعيد شويه عن البلد في أتيليهات كتير قوي فيها حاجات حلوة
_ اية رأيك في دة .. والله جميل .
بصلي شوية وبعدين قال
_ بصي يا سيرين انتي بتختاري حاجات متنفعش تتلبس عندنا في البلد وصراحه متنفعش تتلبس عموماً عشان كدة خليني انا اختار .
_ ماأنت بتختار حاجات مش حلوة .
_ انااا !!! طب تعالي بس.
فضلنا كتير قوي لحد ما أخيرا اتفقنا على فستان .. زي ما كنت بحلم ابيض طويل وعلية طرحة اطول منة انا متاكدة اني هبقى عروسة حلوة ... لبستة في المحل عشان اشوفة هيبقى حلو عليا ولا لأ.... بس البنت اللي في المحل لما عرفت ان أحمد هو جوزي قالتلي مينفعش يشوفني بيه
_ ايه دة... ملبستيش الفستان عشان اشوفة عليكي لية؟!
_ لأ ما انا شوفتة انا وطلع حلو قوووي.
سكت شوية وبعدين قال بصوت هادي
_ طب وانا ... كنت عايز أشوفه عليكي .
……………...................
_ يلا يا مريم ... خودي مرات اخوكي وروحوا ادعوا الجيران كلهم للفرح ... مش اخوكي وعزت حددوا المعاد امبارح .. يبقى يدوب يا بنتي .
_ يا سلااااام ... وهو في عروسة بتدعي لنفسها ... روحي انتي وريم .
_ اه عااادي ... و بعدين انا واختك مش فاضيين خدي مرات اخوكي ولفي هنا عالجيران وانا هبقى اخد اختك ونروح ندعي الجيران اللي في الناحية التانيه.
_ طيب هطلع انادي سيرين .
...................................
_ يعني هنعمل ايه ... مش فاهمة ؟!!
_ ياربي الصبر من عندك ... بصي يا سيرين هنروح نقول للناس والجيران على ميعاد الفرح وندعيهم عشان يعبرونا ويجولنا الفرح فهمتي .
_ اهااا ... نودلهم دعاوي يعني ... طب فين الدعاوي اللي هندهالهم .
_ يالهوووووي .... اشق هدومي منك دلووووووقتي!!
_ ليه وانا بس عملت ايه ؟!!
_ اية ... مالكوااا .. في ايه .
_ امك قالتلي نروح ندعي الجيران للفرح بما انكوا حدتوا امبارح ... وقالتلي اخد سيرين معايا .. بس هي مش فاهمه وزهقتني .
_ كدة يا مريم... طب مش هاجي معاكي .
_ خلاص يا سيرين متزعليش ... بس احمد بقى يفهمك انا هستناكي تحت .
لقيتها واقفة وكالعادة مقموصة ومكتفة ايديها بزعل .. قربت منها وانا ببصلها وهي زعلانه كدة
_ في اية مالك ... مريم زعلتك في ايه ؟!!
_ انا مش زعلانه من مريم ... انا زعلانة عشان مش عارفه افهم انتوا بتعملوا ايه .... حاسة اني غريبة ومش فاهمه حاجه .
لقيتة قرب مني و كلمني بنبرة حنونة
_ اوعي تقولي كدة وانا معاكي... وبعدين غريبة ازاي دة اخواتي بقوا بيحبوكي قوي وامي كمان لاحظت انها بقت صافية من ناحيتك اهي .
_ وانا كمان والله حبيتهم قوي ... بس انا مش فاهمه دلوقتي انتوا اتفاقتوا على معاد الفرح بعد كدة مش المفروض نختار دعاوي الفرح ونبعتها لكل الناس .
اخدني من ايدي وقعدنا عالسرير
_ طب تعالي وانا هفهمك ... احنا هنا في البلد جيران في بعض عارفين بعض والبيوت جنب بعضها عشان البلد صغيرة اصلا فلما يكون عندنا مناسبه بنروح لكل واحد بيتة اللي هو أصلا جنب بيتنا هنا وبنقولهم مثلا عقبال عندكوا فرح كذا يوم كذا وهما عشان جيرانا اللي بيحبونا وبيحبولنا الخير بيفرحوا وبييجوا من غير بقى دعاوي رسمية ولا غيره .
_ اه .. انا كدة فهمت .. مريم هي اللي مكنتش عارفه تفهمني .
_ معلش مريم عروسة ودماغها مش فيها دلوقتي.
_ طب ما انا كمان عروسة على فكرة .
سكت شوية وبصلي وبعدين قالي بحنينة دي
_ وأحلى عروسة يا سيرين... احلى عروسة .
مش عارفه لية اتكسفت ... احم
_ طيب انا هنزل بقى عشان مريم زمانها مستنياني تحت .
وسبتة فعلا وكنت نازله .. لقيتة نادى عليا بسرعة
_ استني ... انتي هتروحي تلفي عالجيران بالبادي والجينز دة ؟!!
_وفيها ايه ... ما كويس اهو .
_ لأ مش كويس خااالص .
_ تعالي وانا أخلي مريم تديكي عباية وطرحة من عندها .
_ عباية وطرحة !!!!!!
يا ترااااا ايه اللي هيحصل مع سيرين في البلد ؟!!
وايه اللي هيحصل في الفرح ؟!!!
#حمل_بالتراضي
#أخر_أمل
#كتابات_رانيا_أبوخديجة
↚
الفصل الثامن #حمل_بالتراضي
_ عقباااال عندك يا خالتي فرررحي وفررح اخويااا احمد يوم الخميس الجااااي قدااام الداااار باذن الله
_ الف مبروووك يا مريَم ... ربنا يتم عليكوااا بخير يا ضنايااا .
_ طيبة قووي الست دي يا مريم
_ اشمعنى ؟!!
_ قالتلك الف مبروك وربنا يتم عليكي بخير يا ضنايا .
_ اومااال هتقولي ايه يعني يا سيرين.. ماهي لازم تقوولي كدة .
وقفت فاجأة وقولتلها بترجي
_ طب ممكن انا اللي اقول المرة الجايه ... عشان خاطري يا مريم ... عشان خاطررري .
_ طب هتقولي ايه ؟!
_ زي ماانتي قولتي .
_طب يلا ... ربنا يسترر .
وروحنا فعلااا وخبطنااا على باب البيت اللي بعده وانا كنت متحمسة قووي اتكلم انا معاهم... وأول ما الست فتحت..
_ عقبااال عندكوااا.. عقبااال عندكواااا فرحي وفرح مريم وفرح احمد يوم الخميس الجااااي..
_ ومالوا يا اختي ربنا يتمملكوا على خير ..
_ هي مالها يا مريم بتتكلم وهي مخضوضه وشكلها مش فاهمه كدة ليه ... هو انا قولت غلط ؟
_ لا .. ازاي .... يلا عقبااال حباااايبك يا خاااالتي بالاذن .
_ مريَم ... مين المحروسة دي يا اختي؟!!
_ دي مرات اخويا احمد ... اسمها سيرين .
_ اه هي دي بقى .. ماشاء الله..عسولة .
_ شكرااا يا طنط .
قولتها بابتسامة وانا مبسوطة قوي .. الناس هنا طيبة قوي .
_ كدة فاضل كام بيت ؟!
_ لأ احنا كدة عدينا عالناحية كلها ... لسة بقى الجهة التانية من الترعة وامي و ريم هيبقوا يروحوا ... يلا انا وانتي نراوح .
_ طب ما تيجي نروح احنا برضة ... عشان خاطري..نروح احنا
_ .. واضح ان الموضوع عجبك يا سيرين .
_ صراحة اه ...قوي .
قولت كدة وانا مبسوطه فعلا ... بلدهم حلوة قووي ... عدينا فعلا للجهة التانية عشان نروح للبيوت اللي من الناحية التانية من الترعة.. الله هنا الجو جمييل جدااا واشجاار وزرع على طوووول النظر ...منظر مع ريحة المكان وهدوئه في غاية الراحة النفسية... انا فعلااا كنت محتاجة احس كدة بالإحساس دة .. انا فعلااا مبسوطة اني جيت ... ايه دة الله .. في راجل بيسقي الارض من الترعة!!! بقلم رانيا أبو خديجة
_ مريم .. مريم هي الميا اللي في الترعة دي نضيفة وحلوة ؟
_ بصي هي المفروض نضيفة عشان خاطر ان احنا بنسقي منها الاكل اللي بناكلة والا هتبقى مشكله.
قربت من الترعة والمكنة اللي بتاخد منها الميا .. ايه دة صوتها عالي قووي .
_ شكلها نضيف فعلااا
ومديت ايدي تحتها .. وياريتني ما عملت كدة ...
_ يالهووووي ... حاااااسبي ياااا سيررررررين !!!!!!
…..............................
كنت فوق في اوضتنا بحاول اظبط حاجات كتير فيها .. انا عارف هي قد ايه بتحب النظام ... خلال الايام اللي فاتت ماكنتش تشوف حاجة قدامها مش عجباها وتسيبها بس حاليا نظام الاوضة مش عاجبها بالمره .. وطبعا ولانها لسة مش بكامل قوتها وصحتها .. بقت تبص للحاجة بعبوس كدة وتسكت واوقات تقولي ممكن تساعدني انقل دة هنا ودة هنا ولما تتعب تسيب كل حاجه وتنام .
هي كان نفسها يبقى السرير تحت الشباك عشان بتحب ريحة الهوى بالليل وانا اهووو نقلتة عشان اما ترجع تبقى تقعد تحته بالليل زي ماهي عايزه... كمان من وقت ما جينا وهدومها لسة في الشنطة زي ما هي و مكنش قدامي وقت من أول ما جيت عشان اساعدها فيها
فتحت شنطتها وقولت ارتب هدومها في الدولاب مع هدومي
...ايه دة!!!! ... مش دة البتاع اللي كانت لابسااه في الليلة اياها ... اممممم ايه دة كماااان..... يا نهااااار !!!!
وهي جايبه الحاجات دي معاها هنا لية ... هي علطوول جاهزة كدة ... طب وبعدين معاااكي ... هتعملي فيا ايه تااااني ؟!!!
لقيت كمان في الشنطة ازازة برفانها اللي بقيت بدمن اشم ريحتها .... قربتها اشمها بعمق وبعدين اخدتها ورشيت منها على كل هدومها اللي في الشنطة عشان اما تلبس اي حاجه منهم تبقى ريحتها مغرقة الاوضة كالعادة..
اية دة ... ايه الصوت اللي تحت دة ... رميت اللي في ايدي عالسرير بخضة وجريت على تحت .. لقيت خبط عالباب بشكل غريب ... ريم سبقتني وفتحت
_ الحق يا عم أحمد... فين عم احمد؟!!!
_ في ايه يا بسام ... عايزاحمد في ايه ؟!
_ مرااااتة وقعت في الترعة والبلد كلها بتطلعها ومش عارفه.
_ ايه!!! يالهووووووي!!!
كنت حاسس ان خروجها من باب البيت لواحدها مش هيعدي على خير ... بس مش لدرجة ان يجرالها حاجة....خرجت من باب البيت وانا مش شايف قدامي ...كل اللي في بالي بس سؤال بزهول هي مين دي اللي وقعت في الترعة ....سيرين !!!!! .... لقيت نفسي في خطوتين بس كنت بعدي الجهة التانية من الترعة وبجري بكل ما فيا من سرعة عشان اوصلها ... اية دة !!! دة البلد كلها عالترعة لدرجة اني مش شاايف حاجة من عندي ... جريت بسرعة اكبر وحاولت أزيح الناس من طريقي ..
_ سيرررررين!!!
لقيتها مغمى عليها ومجموعة من الرجالة بيحاولوا يطلعوها من الترعة ... رميت نفسي من غير تفكير وجوايا بدعي ربنا تكون لسة بخير .... شلتها من ايديهم لقيت ناااس منهم مُصره تساعدني ولسة شيلاها معايا لقيتني بصرخ فيهم
_ خلااااااص ... ابعد انت وهوووو ... ابعدوووو!!!
شيلتها وحاولت افوقها وناس كتير كانت حواليا لسة ملمومة
_ سيرين ... سيرين !!!!
حاولت بكل الطرق اخليها تفوق وبرضة مبتفوقش ... معقولة .. معقولة تكون خلااص راحت مني ... شلتها بين ايديا وجريت بيها لحد العربية واخدتها لحد اقرب مستوصف في البلد .. يااارب يلحقوها ... ياارب تكون لسة معايااا ... انا والله ماصدقت انها بقت معايا وفي حياتي مش معقول بعد كل دة تروح مني تاني !!!!
.....................
دخلت بيها البيت على بالليل بعد ما قعدت بيها في المستوصف لحد ما الدكاترة طمنتني انها الحمد لله لسة بخير...
_ احمد ... طمنا يا ضنايا .. عامله ايه دلوقت ؟
رديت وانا طالع اوضتنا بصوت مش طالع من الرعب اللي اتعرضتلة النهاردة على ايديها ...
_ الحمد لله يا امي ... قدر ولطف .. ربنا عالم بيا .
دخلت الاوضة وأول ما دخلت لقيت امي بتقول
_ استنى يا ابني دي محتاجة تغير هدومها وتتحمم من مية الترعة... يلا يا بنات ساعدوني نعمل لمرات اخوكوا اللازم
دخلت الاوضة بعد ما خلصوا كانت لسه نايمة وباين على وشها التعب ... قعدت جنبها عالسرير ولقيت نفسي بشدها براحة وباخدها في حضني... ضمتها جامد .. كنت هخسرها لتاني مرة .. مش قادر استوعب اللي كان ممكن يحصل النهاردة... الحمد لله. ... ربنا قدر ولطف.
_ اااه .. ااااه جسمي بيوجعني . روايات رانيا أبو خديجة
بعدت وشي عن حضنها وانا ببتسم بفرحة اني سمعت صوتها تاني
_ ربنا ما يحرمني من صوتك ومن اهاتك دي ابدا.
لقيتها بتعيط بوجع
_ ااااه... احمد ... جسمي كلة بيوجعني قوووي .
اخدتها في حضني تاني بدون تفكير وضمتها قوي
_ الف سلامه عليكي يا روح احمد ..
_ اااه .... اوعى انت بتوجعني زياااادة .
_ حاضر ... انا اسف .. اهووو .
بعدت عنها فعلا ومريت بايدي على وشها امسحلها دموعها و عرق التعب اللي مغرق وشها
_ حاسه باية دلوقتي ؟!
لقيتها بتحاول تتعدل ساعدتها
_ هو ايه اللي حصل يا احمد... انا مش فاكرة غير اني كنت بتفرج عالترعة وهي بتسقي الارض وبعد كدة مش عارفه حصل ايه .. لقيت نفسي مقلوبة في الترعة
خلصت كلامها وانفجرت في عيااط زي الاطفال
اخدت راسها على كتفي و قولت وانا ببوس راسها
_ حقك عليا... اخر مرة اسيبك تخرجي من البيت لواحدك تاني....لازم بعد كدة اكون معاكي .. حقك عليا أسف.
سمعت خبط على باب الاوضة..... دخلت امي وشايلة في ايديها صنية.... ومعاها اخواتي البنات
_ سمعت صوتها يا ضنايا قولت صحيت اجبلها لقمة تاكلها .
_ تعالي يا حبيبتي.
_ عاملة ايه دلوقتي يا بنتي .
_ الحمد لله يا ط...يا امي... كويسة .
_ تستاهلي الحمد يا ضنايا ... لكن قوليلي ايه بس اللي وداكي ناحية الترعة ... انا مش قولتلكوا تروحوا بس للجيران اللي نواحينا هنا .
_ والله يا اما قولتلها كدة بس هي اللي فضلت تتحايل عليا نروح هناك .
_ يلا يا سيرين.. ليكي نصيب تاخدي دش في الترعة .
_ كدة يا ريم ... بتضحكي عليا وانا في الحالة دي.. الله يسامحك.
_ هي بتهزر معاكي يا ضنايا ... يلا يا بنات يلا نسيب مرات اخوكوا ترتاح .. وانت يا احمد متخليهاش تنام الا وهي واكلة كويس يا ابني ... الهدر اللي خدتة مكنش هين .
_ حااضر يا حبيبتي... متقلقيش
خرجوا فعلا من الاوضة ... مامته طلعت ست طيبة قوي خصوصا بعد ما جرالي كدة ... من وقت ما جيت وهي مش بتتكلم معايا كتير زي دلوقتي... بجد طلعت طيبه .
_ يلا عشان تتعشي قبل ما تنامي .
_ ماشي بس انت كُل معايا .
وبدأنا ناكل سوا وهو طبعا يأكلني اكتر
_ مين اللي نقل السرير هنا .
رد بابتسامه وهو بيحطلي الأكل في بقي
_ انا قولت كدة افضل بالنسبالك يعني ..
_ كدة احسن كتير قوي... شكراً.
_ و ... و مين اللي كان بيفتش في حاجتي!!
_ اكيد محدش دة انا كنت عايز ارتب حاجتنا في الدولاب لاني شايفك بتحبي تعملي كدة بس مش قادرة.
_ و و وازاي تعمل كدة من غير ما تقولي
لقيتة ابتسم كدة وهو بيبعد نظرة عني ... يا دي النيلة يعني شاف اللي في الشنطة... اية الرزالة دي ... هو مفيش خصوصية في البيت دة ... خصوصية ايه يا هبلة دة جوزك بطلي تخلف يا سيرين.
_ واية بقى اللي يضايقك اني فتحت الشنط .. هو انتي ناسيه ان حاجتي معاكي في نفس الشنط
_ لأ طبعا حاجتك في شنطتك وانت عارف كدة.
_ طب ممكن متتعصبيش وتهدي وتكملي اكلك .
_ لأ مش عايزة انا اصلا كلت.
_ عموما انا كنت عايز اقولك اني ملحقتش افضي الشنطة اصلا ... حتى بصي عليها كدة هتلاقيها تقريبا بحالها .
فعلا بصيت عليها في جنب من السرير لقيتها فيها الحاجة .. يارب ما يكونش شاف حاجة يقول عليا ايه ...
......................
صحيت من النوم ونزلت تحت لقيتهم ملمومين كلهم في وسط البيت وقاعدين قدام دخان كتير
_ اية دة ... انتوا بتعملوا ايه .
_ النهاردة هنعمل البسكويت بتاع الفرح ..
قربت منهم الله ريم ومريم قاعدين بيعملوا اشكال بسكويت حلوة قوي ومامت احمد تدخلو جوا الفرن تسوية .
_ ينفع يا ماما .. اجي اعمل معاكوا .
لقيتها بصتلي وبعدين قالت
_ هتعرفي تعملي ولا هتبوظي العجين ؟
_ لا والله هعمل زي ريم ومريم بالظبط
_ طب اقعدي معاهم يلا خلينا نخلص .
قعدت احاول اقلدهم بيعملوا اية واعمل زيهم ...
_ الله ريحتة حلوة قوي ... تسلم ايديكوا
_ بقولك يا أما ... طلعي بسكويتة ادواقها لسرين .
_ لأ انا عايزة انا اعمل واحدة وتسويهالي .
لقيتهم ضحكوا ... الله انا مبسوطة قوووي ... وبجد حبيتهم قووي .
_ طيب بصي اعملي شويه واللي تعملية حطي في الصاجة دهي وانا اسوهولك لواحدة.
فضلت اشوفهم بيعملوا ازاي واعمل عشان الحق املى الصاجة بتاعتي زي ما قالتلي
_ شوفي كدة يا ماما ... حلو دة ؟
بصت للصنية اللي عملتها شويه وبعدين قالت
_ اعملي حسابك محدش هياكل بسكوتك دي الا احمد ابني عشان يعرف هو عمل ايه في نفسة .
_ عمل اية في نفسة؟
لقيت ريم ومريم ضحكوا
_ طب والله يا أما حلو اهووو وبعدين تلاقي سيرين اول مرة تعملة .
_ طيب ممكن تسوية بقى ... عشان عايزه ادوقه لاحمد زي ما قولتي.
ردت وهي بتحطة في الفرن
_ مااشي ... تستاهل يا احمد يا ابني اللي يجرالك ..
سمعنا خبط على الباب
_ هقوم اشوف مين يا أما .
_ خليكي يا مريم ... هشوف انا .
قومت وفتحت الباب ولقيتها في وشي ... اية دة هو انتي لسة عايشة ...
فضلنا نبص لبعض شوية وهي فضلت تبصلي كتير قوي من تحت لفوق وبعدين قليلة الذوق تجاهلتني ودخلت .
_ صباح الخير... ازيك يا خالتي ازيك يا ريم... يا مريم
_ اهلا يا سماح.. اقعدي يا بنتي واقفة ليه .
_ اني قولت اجي اشوفكوا محتاجين حاجة لزوم الفرح وتجهيزاته ولا لأ.
_ اقعدي ساعدي اخواتك... اقعدي .
_ اومال ...اومال فين احمد يا خالتي ؟
_ وعايزة احمد لية ؟!
بصتلي وكلهم بصولي لقيتها تجاهلتني تاني وقالت
_ ان شاء الله يكون بخير يا خالتي.. انا سمعت انه امبارح رمى نفسة في الترعة ورا الست فكنت عايزة اطمن علية مش اكتر
_ جوا يا بنتي في المنضرة .. عزت كان عندة من شويه ولسة ماشي .
_ وعرفتي منين بقى ان احمد رمى نفسة في الترعة امبارح .
_ البلد كلها يا حبيبتي بتحكي عن المحروسة اللي احمد رمى نفسة وكان هيموت امبارح عشانها .
مش عارفه لية فرحت لما شوفت غيظها من خوف احمد عليا امبارح.. دة وضحلي قد اية احمد بيخاف عليا .. بيخاف عليا لدرجة بتضايق اللي زي سماح .. وكانت عايزه تتجوزة .. خلاص بقى متفكرنيش دلوقتي بالموضوع ده.
قعدت معانا فعلا تساعدنا وتعمل معانا بس كانت طول الوقت ساكتة وحزينة... يا خبر شكلها زعلانة قوي ... واضح انها كانت بتحب احمد بجد ... بس بجد احمد يستاهل حد احسن من سماح... دي واحدة اول ما شافتني ضربتني وقالت عني كلام مش كويس من غير حتى ما تعرفني ... لكن احمد عمري ما شوفت حد في حنيتة واخلاقة ... حقيقي هو يستاهل أحسن بنت في الدنيا...
_ حد يقوم يا بنات يناولني الصيجان اللي جوا ... يلا خلينا نخلص .
_ خليكي انتي يا مريم ... حطاهم فين يا خالتي وانا اجبهم .
_ في الأوضة إللي جنب المنضرة ... ادخلي هتلاقيهم جوا يا سماح.
................................
كنت قاعد وفي ايدي ورقة وقلم بحاول اظبط مصاريف الايام اللي جايه من غير محتاج لحد ... مش عايز استلف هنا كمان ... كفاية عليا سلفة الشغل
_ اممممم ... كدة يبقى فاضل الفين جنية ... يدوب دول يبقوا ل....
_ ازيك يا احمد....
بصيت لقيتها واقفة على باب المنضرة و بتبصلي بحيرة في عنيها وحزن ... صعبت عليا من اخر مرة شفتها فيها وابوها بيضربها قدامي ... سماح شبه متربية هنا مع اخواتي قدام عنيا و بجد بعتبرها واحدة منهم ومن غلاوتهم ...بس تصرفاتها اوقات بتقفلني منها ..
_ ازيك يا سماح... عاملة ايه.
دخلت وقعدت جنبي عالكنبة
_ انت عارف يا احمد اني مش كويسة ..
.......................
_ اهوووو ... خدي يا سيرين الصاج بتاعك اهوو .. عاللة يتاكل بقى .
ضحكت وانا باخدة منها فعلا كان شكلة مختلف عن البسكوت بتاعهم بس ريحتة حلوة قووي .
_ انا هدخل اجيب طبق عشاان احطة فيه وادوقة لأحمد .
قولت كدة وانا مبسوطة وقومت بحماس .. جبت طبق ورتبتة فيه بشكل يبان لطيف شويه وبعدين اخدتة ودخلت للاوضة اللي هو فيها وانا متحمسة اني أدوقة عمايل ايدي .
_ يا سماح انتي زي أختي ... معزتك عندي زي ريم ومريم وربنا يعلم .
_ كل دة عشان خاطر الحلوة بتاعتك ... و اه صحيح ازاي ترمي نفسك وراها في الترعة انت مش خايف على نفسك يجرالك حاجة .
_ شئ ميخصكيش ... وبعدين انتي عايزاني أسيب مراتي تغرق مثلا ولا ايه .
_ يااااريت يا اخي ... كانت غرقت ولا ماتت وراحت في ستين داهية تاخدها .
_ اخرسي!!!!!! ماتنسيش انك بتتكلمي معايا عن مراتي ... وتتكلمي كويس احسنلك .
سمعتها بتعيط ... هي كمان هتعيطلة بعد اللي قالتة
_ بقى كدة يا احمد هي دي اخرتها ..... دة انا كنت نايمه قايمه احلم بيك وانت عارف انا كنت بتمناك قد ايه .
_ عيب يا سماح تقولي الكلام دة.... ابوكي لو وصلة حرف من كلامك دة مش بعيد يموتك فيها
_ يا احمد عشان خاطري حس بيا ... طب وغلاوة خالتي أم أحمد عندك ...انا عارفه ان مفيش اغلى منها عندك لتفهمني .
ايه دة هو سكت ليه ... يكونش بيفكر في كلامها
_ طب اقولك على حاجه انا موافقة اكون زوجة تانية عادي ..
يا نهاااار مش فايت النهاردة....... دي عايزاااة يتجوز علياااا ...
_ بس انت تعالى اطلبني من ابويا وانا هقولة اني موافقة ... وحياة اغلى حاجه عندك يا احمد .
مقدرتش اتحمل سكوتة .. فتحت الباب ودخلت لقيتة واقف في الأوضة ومديها ضهره ... هو بيفكر بجد دة ولا ايه
_ سيرين ... في حاجة.. كنتي عايزة حاجة ؟
_ اه .. لأ ... كنت ..
_ االمدام اكيد كانت بتتصنت علينا ... مش كدة يا اسمك ايه انتي .
_ اسمي سيرين يا حبيبتي... وانا مكنتش بتصنت انا كنت جاية في حاجة لجوزي انتي بقى بتعملي هنا ايه ؟!
_ انا يا حبيبتي في البيت دة ادخل واخرج براحتي من قبل حتى ما نشوف وشك هنا .
سكت وبصتلها بغيظ بجد ... هي مالها دي يعني جاية تتجوز جوزي وكمان مش عاجبها .
اخدت الطبق بتاعي وخرجت بنرفزة
_ سيرين استني ....
_ استنى انت يا احمد... احنا لازم نخلص كلامنا وانت هتيجي النهاردة تكلم ابويا .
_ سمااااح!!! كلامي اللي هقولهولك دة انا مش هعيده تااااااني... انتي يا بنت الناس في البيت دة من وانتي قد كدة كنتي تلعبي مع اخواتي وتروحي وتيجي معاهم حتى اما كنت اذاكرلهم والاعبهم كنتي بتبقى معاهم .... ودة خلاني اعتبرك واحدة منهم ... وعمرك ما هتبقي اكتر من كدة وحاجة تانية لازم تسمعيها برضه ... دلوقتي انا راجل متجوز وبحب مرااتي وان شاء الله مش هسيبها .... ولا هتجوز عليها ...مفهوووم ....
قولتلها كدة وخرجت ادور عليها ... ملقتهاش قاعدة مع امي واخواتي ... يبقى طلعت فوق ... طلعت جري ملقتهاش
_ اومال فين سيرين يا امي .
_ مش عارفه يا ابني دة هي من وقت ما دخلتلك بطبق البسكويت وقالت هتدوقك واحنا ما شفنهاش .
.......................
خرجت ادور عليها قدام البيت ماهي مينفعش تخرج لواحدها بعد اللي حصلها ... اهي ....مالها قاعدة كدة ليه
لقيتها قاعدة تحت شجرة في الارض اللي قدام البيت..
_ سيرين ... مالك قاعدة كدة ليه... وازاي تخرجي من البيت لواحدك من غير ما تعرفيني؟!
لقيتها ساكته بصتلي بس ومردتش ... قربت قعدت جنبها
_ انتي زعلانة مني في حاجة ؟!!
بصتلي فاجأة
_ هو انت ممكن تتجوز سماح دي عليا ؟
بصتلها باستغراب هي بجد بتسالني كدة..
_ انتي سمعتينا ؟
_ ايوا سمعتكوا ...غصب عني بالصدفة... بس كمان لقيتك ساكت يعني بتفكر ... صح ؟
لقتني سكت وببصلها .. احاول افهم دماغها اللي ولا مره فهمتها دي
_ انا عارفه اني مش حقي أسألك.... لأ على فكرة بقى من حقي...
ابتسمت على كلامها
_ بتضحك على ايه... هو انت مش جوزي دلوقتي..
بصتلها كتير قوي ... قولي كدة الجمله دي تاني يا سيرين..
_ طب حتى استنى بعد ما نطلق وبعد كده ابقى اتجوز..
الله يخربيتك مبتكمليش جملة حلوة على بعض
_ لأ يا احمد ... بص هقولك على حاجه بامانة ... انت حد كويس .. لأ انت حد كويس قوووي .. وبجد تستاهل احسن بنت .
والله انتي عندي احسن بنت ... يارب تفهمي..
_ فلو فعلا عايز تتجوز بعد ما نطلق .. بلاش سماح دي..
اه يعني مشكلة حضرتك في سماح ... حسبي الله ونعم الوكيل!!
_ بص ... رأيي بلاش تفكر في الموضوع دة دلوقتي... فكر تجوز اخواتك الاول ... مريم وبعدين ريم ولسة مامتك ..
_ ايه !!!
_ قصدي يعني متبقاش اناني وتفكر في نفسك دلوقتي..
_ عندك حق... وبعدين يا سيرين انتي فاهمة الموضوع غلط ... سماح عندي زي ريم ومريم بالظبط.. ومش ممكن افكر فيها كزوجة ابدااا .
_ بجد ؟؟!
هزيت راسي بمعنى ايوا
_ امي لقاتكوا غبتوا قالتلي اجبلكوا البسكويت قبل ما يبرد .. سيرين يا احمد كان نفسها تدوقهولك .
_ اه هاتي يا ريم.... بص انا اللي عملاه.
اخد مني الطبق بابتسامة عريضة بعد ما ريم مشيت وقطم منة حته
_ اية رأيك... حلو ؟
_ اممممم .... حلو قوي بس شكلوا عجيب شوية.
قال كدة وضحك ضحكتة اللي انا بحبها دي .. ضحكت معاه
_ معلش بقى عشان اول مرة اعمله ... بس خلي بالك انا عملت صاجة بحالها لواحدي.
_ تسلم ايدك... حلو قوي.
قال كدة وهو بياكل منة تاني .. مش عارفه لية كنت فرحانه انة عجبة ... بصلي لقاني ببصلة وهو بياكل وانا مبتسمة .. قام مقرب واحدة من بوقي
_ مش هتدوقي عمايل ايدك انتي كمان.
_ الله طعمة حلو ..
_ حلو قوي .. تسلم ايديكوا .
قال كدة وهو بياخد باقي البسكوتة من بوقي وبيحطها في بوقه .
احمد انت حد قالك انك حد جميل قبل كدة
لو كان بيقرا العيون ... كان لقى عيوني المبتسمة ليه دي بتقوله كدة
……..............................
النهاردة الخميس... يااااه النهاردة فرحي!!!! لأ وفي نفس اليوم اللي كنت مستنيه اللي هجوز فيه اختي مريم !!!
مش عارف فرحااان قد ايه ... يا ترى الفرحة دي كلها عشان مريم ... بنتي قبل ما تكون اختي اللي حلمت كتير احقق وصية ابويا و اوديها بيت جوزها ... عقبالك يا ريم انتي كمان ... ولا اكونش فرحان كدة عشان كمان النهاردة يبقى فرحي ... لأ وفرحي على مين.... على االبنت الوحيدة اللي كانت بتزورني في احلامي من يوم ما شفتها... الوحيدة اللي حبيتها وبتمنى اعيش معاها حياتي كلها ... سمعت خبط على باب الاوضة اللي انا فيها
_ ادخل ...
_ احمد ... سيرين واختك جهزوا .. و سيرين مستنياك في الأوضة ...
عااايزة اعتذر من هناااا لبكره عالتأخير دة بس صرااحة هو مكنش ناازل النهاردة لولا انا وعدتكوا امبااارح ...
عااايزاكوااا كمااان تبقوااا عارفين ان الفصل الجااااي هيبقى غيييير خاااالص .... جمداااااان .....وبرضه في مفاجأت حلوة... باذن الله يعجبكوااا متنسوش رأيكوا في الفصل دة كماان وتفاااااااعل كتيييير بقااااا وتشجييييع كده على كتابة اللي جااااي .... قراءة ممتعة ياقمراااااات ❤️❤️❤️🥰
#حمل_بالتراضي
#أخر_امل
#رانيا_أبو_خديجة