أخر الاخبار

نساء من القرآن الحلقة السادسة زوجة سيدنا لوط عليه السلام

 




حصريآ علي موقع المجد للقصص والحكايات 


الكاتبه سمر ابراهيم 

نساء من القرآن الحلقة السادسة زوجة سيدنا لوط عليه السلام

#نساء_من_القرآن 

مينفعش نتكلم عن زوجة سيدنا نوح عليه السلام ومنتكلمش عن توأمها وشريكتها فى الشرك وخيانة الدعوة زوجة سيدنا لوط عليه السلام. 

ورد ذكر زوجة سيدنا لوط عليه السلام مع زوجة سيدنا نوح فى نفس الآية فى سورة التحريم حين قال الله تعالى بسم الله الرحمن الرحيم(ضَرَبَ اللَّهُ مَثَلًا لِّلَّذِينَ كَفَرُوا امْرَأَتَ نُوحٍ وَامْرَأَتَ لُوطٍ ۖ كَانَتَا تَحْتَ عَبْدَيْنِ مِنْ عِبَادِنَا صَالِحَيْنِ فَخَانَتَاهُمَا فَلَمْ يُغْنِيَا عَنْهُمَا مِنَ اللَّهِ شَيْئًا وَقِيلَ ادْخُلَا النَّارَ مَعَ الدَّاخِلِينَ)

مين هى بقى زوجة لوط عليه السلام وعملت ايه علشان يكون مصيرها النار بالرغم من انها زوجة نبى كريم تعالوا اقولكم.

محدش عارف اسمها كان ايه بالظبط فيه إللى قال اسمها والعة او واعلة او والهة وفيه بعض الكتب اليهودية ذكرت ان اسمها آدو أو إديث وفيه إللى قال كان اسمها هيشفع أو هلسفع أيا كان اسمها مش هيفرق.

طبعا كلنا عارفين ان سيدنا لوط عليه السلام كان ابن اخو سيدنا إبراهيم عليه الصلاة والسلام وهو إللى رباه وعلمه ولما كبر وتم اختياره ليكون نبى بعثه الله سبحانه وتعالى لقرية اسمها سدوم ودى  قرية بتطل على البحر الميت كان أهلها بيعملوا فاحشة محدش قبلهم عملها وهى اللواط كان الرجل يميل للرجل والانثى تميل للأنثى والعياذ بالله .

قعد سيدنا لوط ينصح اهل البلد علشان يبطلوا إللى بيعملوه ويرجعوا للطريق السليم لكن لا حياة لمن تنادى كانوا مستمرين فى المعصية وكانوا عايزين يخرجوا سيدنا لوط واهله بأى طريقة وقالوا اخرجوا آل لوط من قريتكم أنهم أناس يتطهرون يعنى كانوا بيعتبروا التطهر جريمة لازم يخلصوا من أصحابها. 

وصل الحال بقوم سدوم مش بس ارتكابهم للفاحشة لا دا وصل بيهم الحال أنهم كانوا بيخطفوا اى حد يمر على قريتهم ويجبروه يمارس معاهم الفاحشة بالعافية وكان عندهم نادى بيجتمعوا فيه خلوه وكر لممارسة الرزيلة كانوا بيمارسوها عيانا بيانا كدا، بالرضى شغال بالغصب ميضرش وهنا بقى جه دور زوجة سيدنا لوط لما بدأ يزيد من دعوته ليهم وحسوا ان ممكن الناس تستجيب ليه فكروا ان اكتر حاجة ممكن بيها يفقد مصداقيته قدام الناس هى انضمام مراته ليهم عملوا ايه بقى🤔🤔🤔🤔 بعتولها واحدة ست عجوزة ومعاها دهب وفضة ومجوهرات علشان تزغلل عنيها بيه وعملت انها عايزة تشرب مية ولما دخلت عندها البيت قالتلها هو انتى عايشة لواحدك هنا يا شابة قالتلها لا انا عايشة مع جوزى وبناتى الاتنين قامت ممصمصة شفايفها وقالتلها مسم عينى عليكى وعلى شبابك يا شابة بقى واحدة جميلة ولسة شباب زيك تعيش فى الفقر ده وقعدت تودود فى ودنها وتقولها واحدة زيك تلبس الدهب والحرير قالتلها ازاى قالتلها اهل القرية بيدوا فلوس بالهبل لأى حد يدلهم على رجالة حلوين وانتى بيجى لجوزك هنا رجالة كتير يسألوه عن دعوته المطلوب منك اول ما يجى حد عند عندكم تدى إشارة للرجالة وهما هيتصرفوا وقعدت تقنعها وورتها الفلوس والجواهر إللى معاها  وادتها قطعتين من الفضة عربون على كلامها وسابتها تفكر ومشيت.

بعد العجوزة ما مشيت قعدت والعة تفكر تفكر لحد ما غلبها شيطانها ووافقت على كلام العجوز .

كانت بتبعتلهم إشارات لما يجيلهم حد لو جه بالنهار تحرق أعشاب على النار علشان تطلع الريحة فيعرفوا ان فيه ضيف عند سيدنا لوط ولو بالليل تولع النار ومن الضوء بتاع النار يعرف اهل البلد بوجود الضيف وهكذا .

عايزة اقولكم ان زوجة لوط عليه السلام مختلفة عن زوجة نوح عليه السلام فى حاجة ان زوجة نوح كانت واضحة وصريحة وكانت بتجهر بكفرها انما زوجة لوط عليه السلام كانت منافقة قدام جوزها بتظهر الإيمان وتبطن الكفر وزى ما قولنا امبارح خيانة زوجة لوط مكانتش خيانة زوجية كانت خيانة دعوة وكفر برسالته ومساعدة الكفار ضده .

لما جه وقت العقاب بعث الله الملائكة بقيادة سيدنا جبريل علشان ينزلوا العذاب على اهل لوط بس قبل ما يروحوا لسيدنا لوط راحوا الأول لسيدنا إبراهيم عليه السلام علشان يبشروه بحمل السيدة سارة بسيدنا اسحق عليه السلام وقالوله أنهم جايين علشان قوم سدوم وهنا حاول سيدنا إبراهيم انه يخليهم يأجلوا العذاب  ويفكرهم ان سيدنا لوط واهله وسطهم بس هما قالوله ان دى أوامر المولى عز وجل وانهم عارفين ان سيدنا لوط موجود فيهم وانه مش هيصيبه حاجة .

لما وصل الملائكة لسيدنا لوط وكانوا على هيئة بشر شديدى الجمال اول ماشافهم سيدنا لوط أتضايق جدا وكان عايز يمشيهم بأى طريقة قبل قومه ما يعرفوا بوجودهم وياخدوهم يعملوا معاهم الفاحشة زى غيرهم بس هما طمنوه وقالوله مش هيعرفوا يعملولهم حاجة. 

طبعا زوجة سيدنا لوط اول ما شافت الرجالة راحت جرى النادى إللى بيعملوا فيه الفواحش وقالتلهم ان زوجها جاله ضيوف مشافتش فى جمالهم طبعا اول ما عرفوا كدا مستنوش لما الضيوف يخرجوا من عنده حتى وراحوا جرى على بيت سيدنا لوط علشان ياخدوا ضيوفه بالعافية .

لما راحوا قعد ينصحهم ويقولهم هؤلاءِ بناتى هن اطهر لكم طبعا مكانش يقصد بناته هو بصورة خاصة لان مش هيسيب بنتين للرجالة دى كلها يعنى 🙄🙄🙄🙄🙄 ميعقلش هو كان يقصد بنات القرية باعتباره فى سن والدهم بس اهل القرية مستجابوش ليه وصمموا ياخدوا الضيوف وهنا ظهرلهم سيدنا جبريل عليه السلام وطمس على سمعهم وابصارهم وقال لسيدنا لوط يخرج بأهله وميلتفتش وراه لان إللى هيلتفت وراه هيصيبه نفس إللى هيصيب اهل البلد ولما سأله سيدنا لوط هل عذابهم هيكون دلوقتى رد عليه سيدنا جبريل وقاله ان موعدهم الصبح أليس الصبح بقريب وطبعا تم تأجيل العذاب للصبح علشان سيدنا لوط وأهله يكونوا خرجوا من القرية وبالفعل مع اول خيوط النهار اتحول كل اهل القرية لحجارة على وضعهم زى ما هما إللى بيرتكب الفاحشة واللى نايم واللى بياكل كل واحد على وضعه.

 وأثناء خروج سيدنا لوط كان جزاء خيانة مراته لما التفتت وراها ومسمعتش كلام الملائكة فجرالها نفس اللى جرى لقومها. 

ربما يحسن ختامنا جميعا يارب. 

ورد ذكر قصة امرأة لوط عليه السلام فى القرآن اكتر من مرة فى اكتر من سورة فى سورة التحريم زى ما قولنا فى اول القصة وفى سورة هود قال تعالى بسم الله الرحمن الرحيم 

{قَالُوا يَالُوطُ إِنَّا رُسُلُ رَبِّكَ لَنْ يَصِلُوا إِلَيْكَ فَأَسْرِ بِأَهْلِكَ بِقِطْعٍ مِنَ اللَّيْلِ وَلَا يَلْتَفِتْ مِنْكُمْ أَحَدٌ إِلَّا امْرَأَتَكَ إِنَّهُ مُصِيبُهَا مَا أَصَابَهُمْ إِنَّ مَوْعِدَهُمُ الصُّبْحُ أَلَيْسَ الصُّبْحُ بِقَرِيبٍ}

وفي سورة الأعراف قال تعالى بسم الله الرحمن الرحيم {فَأَنجَيْنَاهُ وَأَهْلَهُ إِلَّا امْرَأَتَهُ كَانَتْ مِنَ الْغَابِرِينَ}

 وفي سورة العنكبوت قال تعالى بسم الله الرحمن الرحيم {قَالَ إِنَّ فِيهَا لُوطًا قَالُوا نَحْنُ أَعْلَمُ بِمَنْ فِيهَا لَنُنَجِّيَنَّهُ وَأَهْلَهُ إِلَّا امْرَأَتَهُ كَانَتْ مِنَ الْغَابِرِينَ}

 وفي سورة النمل قال تعالى بسم الله الرحمن الرحيم (فأنجيناه وأهله إلا امرأته قدرنا من الغابرين)

شوفتوا آخرة الكفر مشفعلهومش أنهم زوجات لأنبياء بالعكس المفروض عذابهم يكون مضاعف لأنهم اولى الناس بتصديق أزواجهم ومساعدتهم فى دعوتهم .

كمان شوفنا ان النسب مش شرط الهداية أو الضلال ابدا شوفنا لكل نبى حد من أهله يكفر بدعوته ويحاربه كمان زى ما شوفنا ناس فى غاية الكفر والطغيان ويطلع حد من نسلهم أو اهلهم يكون فى قمة الإيمان والتقوى فسبحان الهادى .

كمان عايزة اقولكم ان زوجة سيدنا لوط مكانتش بتعمل الفاحشة زى قومها ولا حاجة هى بس كانت موافقة على عمايلهم كانت open minded  من الآخر وبيس وعادتشى وحرية شخصية وفيها ايه يعنى طالما كله بالحب وكل واحد حر فى ميوله زى ما بنسمع اليومين دول وده يعلمنا أن مش بس إللى بيعمل الفاحشة بيتعاقب لا دا اللى بيوافقه ويساعده ويؤيده هو كمان ليه نفس الجزاء مش اقول طالما انا مبعملش كدا يبقى خلاص وكل واحد حر لا طبعا لازم نرفض الفعل الحرام حتى لو مش هنقدر نغير المنكر بس منعينش عليه ونوافق صاحبه ونقول حرية شخصية.  

كدا خلصت حلقتنا النهاردة اتمنى تعجبكم والى لقاء آخر ان شاء الله دمتم بالف خير.

#samar_ibrahim

نساء من القرآن الحلقة السابعة إمرأة العزيز

تعليقات