حصريآ علي موقع المجد للقصص والحكايات
الكاتبه سمر ابراهيم
نساء من القرآن الحلقة الرابعة السيدة حواء
#نساء_من_القرآن
مينفعش نبقى بنتكلم عن قصص النساء فى القرآن الكريم ومنتكلمش عن اول امرأة تم خلقها ام البشرية واللى من نسلها جه البشر كلهم امنا حواء😍😍😍😍😍
لما ربنا خلق سيدنا آدم عليه السلام وأمر الملائكة يسجدوله فسجدوا كلهم إلا إبليس ابى ان يسجد وتكبر على الله عز وجل وقال انا خير منه خلقتنى من نار وخلقته من طين وهنا غضب الله سبحانه وتعالى على إبليس وقرر انه يخرجه من الجنة ويدخله النار وهنا قال إبليس لربنا عز وجل امهلنى إلى يوم يبعثون وهنا استجاب له ربنا سبحانه وتعالى وقاله انك من المنظرين إلى يوم الوقت المعلوم وهنا بدل إبليس ما يطلب السماح ويستغفر عن ذنبه قال لربنا عز وجل فبعزتك لأغوينهم أجمعين إلا عبادك منهم المخلصين شايفين الوعيد بيوعد ربنا وبيحلف بعزته على غواية البشر على قد ما يقدر ربنا يعافينا من همزات الشياطين ووسوستهم يارب العالمين.
نرجع لسيدنا آدم بعد ما خلقه الله سبحانه وتعالى كان عايش فى الجنة وحاسس بالوحدة الشديدة علشان كدا ربنا خلقله من ضلعه وهو نايم ستنا حواء (طبعا فيه أساطير كتير اتقالت فى الموضوع ده من ضمن الأساطير دى ان كان فيه زوجة لسيدنا آدم قبل حواء واسمها ليليث لكن إبليس غواها فهربت معاه وسابت سيدنا آدم وحولها إبليس لشيطانة وكانت ليليث هى بداية سلالة الشياطين وهى ام الشياطين وان سيدنا آدم لما حزن على فراق ليليث حب ربنا سبحانه وتعالى يخفف عنه فخلقله حواء من ضلعه طبعا دى كلها أساطير آرامية مالناش دعوة بيها وليست من الإسلام فى شيئ ومعروف عندنا ان اول امرأة تم خلقها هى السيدة حواء )
لما سيدنا آدم عليه السلام صحى من النوم وشاف ستنا حواء جمبه اتخض وقالها انتى مين قالتله انا امرأة قالها جيتى هنا ازاى قالتله خلقنى الله من ضلعك وانت نائم لأكون لك سكن وأؤنس وحدك قالها اسمك ايه قالتله معرفش سمينى انت مش ربنا علمك الأسماء كلها وهنا سماها حواء قيل انه سماها الاسم ده بمعنى حياة لانها خلقت من ضلع حى ويقال ان حواء من الاحتواء حوى الشيئ اى احتواه لان مهمتها إللى اتخلقت علشانها هى احتواء سيدنا آدم ومصدر السكينة له.
فضل سيدنا آدم وستنا حواء عايشين فى الجنة ربنا قالهم بسم الله الرحمن الرحيم ( وَقُلْنَا يَا آدَمُ اسْكُنْ أَنتَ وَزَوْجُكَ الْجَنَّةَ وَكُلَا مِنْهَا رَغَدًا حَيْثُ شِئْتُمَا وَلَا تَقْرَبَا هَٰذِهِ الشَّجَرَةَ فَتَكُونَا مِنَ الظَّالِمِينَ ) ربنا سمحلهم ياكلوا ويتمتعوا بكل حاجة موجودة فى الجنة ما عدا شجرة واحدة فقط لا غير يقال ان اسمها شجرة الزقوم محدش عارف حكمة ربنا من منعهم من الشجرة دى هل اختبار للطاعة المطلقة ولا لسبب تانى الله اعلم .
فى الوقت ده كان إبليس غيرته بتزيد من سيدنا آدم وكان عايز يوسوسله بأى طريقة علشان ربنا يغضب عليه ولما عرف بمنع ربنا لسيدنا ادم والسيدة حواء من الاكل من الشجرة لقاها فرصة علشان يخلى ربنا يغضب عليهم معروف ان الممنوع مرغوب وده طبعا فى بنى آدم قعد يوسوسله وقاله ( هَلْ أَدُلُّكَ عَلَىٰ شَجَرَةِ الْخُلْدِ وَمُلْكٍ لَّا يَبْلَىٰ) وقعد يحلفلهم انه صادق (وقاسمهما إني لكما لمن الناصحين)
وانه عايز مصلحتهم وقالهم (مَا نَهَاكُمَا رَبُّكُمَا عَنْ هَٰذِهِ الشَّجَرَةِ إِلَّا أَن تَكُونَا مَلَكَيْنِ أَوْ تَكُونَا مِنَ الْخَالِدِينَ) يعنى ربنا نهاكم عن الاكل من الشجرة دى لان لو كلتوا منها هتكونوا من الملائكة أو من الخالدين وفضل بقى زن على ودانهم لحد ما سمعوا كلامه وكلوا من الشجرة قال تعالى بسم الله الرحمن الرحيم(فَأَكَلَا مِنْهَا فَبَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِن وَرَقِ الْجَنَّةِ ۚ وَعَصَىٰ آدَمُ رَبَّهُ فَغَوَىٰ ) وهنا لازم نرد عن إللى بيقول ان ستنا حواء هى إللى خرجت سيدنا آدم من الجنة وهى إللى خلته ياكل من الشجرة المحرمة والله هذا ظلم بين كلام ربنا واضح (فَوَسْوَسَ إِلَيْهِ الشَّيْطَانُ قَالَ يَا آدَمُ هَلْ أَدُلُّكَ عَلَىٰ شَجَرَةِ الْخُلْدِ وَمُلْكٍ لَّا يَبْلَىٰ) يعنى الشيطان كان بيوسوس لآدم وربنا قال فأكلا منها ومعظم المفسرين قالوا ان سيدنا آدم هو اللى أكل من الشجرة الأول وتبعته السيدة حواء وأول ما أكلوا من الشجرة ظهرت عورتهم وبقوا يدوروا على ورق الشجر علشان يداروا بيه عورتهم وهنا كلمهم ربنا سبحانه و تعالى وقالهم (وَنَادَاهُمَا رَبُّهُمَا أَلَمْ أَنْهَكُمَا عَن تِلْكُمَا الشَّجَرَةِ وَأَقُل لَّكُمَا إِنَّ الشَّيْطَانَ لَكُمَا عَدُوٌّ مُّبِينٌ) وهنا ندم سيدنا آدم وستنا حواء على الذنب إللى اقترفوه جدا وقعدوا يستغفروا ربنا علشان يسامحهم وربنا سامحهم بالفعل لكن أمر بخروجهم من الجنة ونزولهم للأرض عقاب ليهم على إللى عملوه (قُلْنَا اهْبِطُوا مِنْهَا جَمِيعًا ۖ فَإِمَّا يَأْتِيَنَّكُم مِّنِّي هُدًى فَمَن تَبِعَ هُدَايَ فَلَا خَوْفٌ عَلَيْهِمْ وَلَا هُمْ يَحْزَنُونَ)
وبالفعل هبط سيدنا آدم وستنا حواء وابليس كلهم نزلوا الأرض السؤال هنا بقى حد يعرف آدم وحواء قعدوا قد ايه فى الجنة🤔🤔🤔🤔🤔 انا اقولكم اختلف المفسرين فى المدة إللى قعدوا فيها فى الجنة فقال ابن عباس رضى الله عنه أنهم قعدوا بين الضهر والعصر وفيه إللى قالوا قعدوا نصف نهار طبعا ده بتوقيت الجنة فاليوم فى الجنة بألف سنة على الأرض فيه إللى قال بحساب اهل الأرض حوالى ١٠٠سنة وفيه إللى قال ٦٠سنة وفيه إللى قال ١٣٠سنة وفيه إلى قال ٥٠٠سنة محدش قال كلام محدد فى الموضوع ده المدة بالظبط ايه العلم عند الله.
نزل سيدنا آدم وستنا حواء من الجنة بس منزلوش فى نفس المكان سيدنا آدم نزل فى الهند وستنا حواء نزلت فى جدة وطبعا الأرض فى الوقت ده كانت سكن الوحوش ومكانتش متعمرة وتعبوا جدا على ملاقوا بعض واتقابلوا على جبل عرفات إللى اتسمى بالاسم ده لأنهم تعارفوا عليه .
بعد ما اتقابلوا بدأت رحلتهم الشاقة فى أعمار الأرض طبعا كانوا فى الجنة منعمين مرفهين كل إللى بيتمنوه بيلاقوه لكن عالارض كل حاجة صعبة لازم يتعبوا علشان ياكلوا ولازم يبقى عندهم بيت يحميهم من الحر والبرد والوحوش المفترسة ولازم هدوم تقيهم البرد وهدوم تنفع فى الحر كان الموضوع شاق فعلا لكن كل ده منساهومش عبادة الله عز وجل كانوا ديما يستغفروا ربهم عن الذنب إللى اقرفوه بجهل منهم وخلفت السيدة حواء أطفال كتير جدا كان فى كل مرة تجيب توأم بنت وولد ولما كبر الأولاد نزل الله سبحانه وتعالى الوحى لسيدنا آدم انه يزوج أولاده لبعض لكن مينفعش التوأم إللى جايين مع بعض يتجوزوا لازم كل واحد من بطن يتجوز اخت من بطن تانية ودى كانت بداية بذرة الشيطان اللى قدر بيها يدخل لقابيل ابن سيدنا آدم وقدر يوسوسله علشان يقتل اخوه هابيل لأنه كان عايز يتجوز اخته التوأم إللى كانت من نصيب هابيل لانها كانت احلى من توأم هابيل وهنا حصلت اول جريمة على الأرض بقتل قابيل لأخوه هابيل وكانت صدمة كبيرة لأمنا حواء وسيدنا آدم لأنهم كدا خسروا ولادهم الاتنين الأول بموته والتانى بقتله لأخوه .
عاش سيدنا آدم ١٠٠٠سنة ويقال ٩٦٠سنة بعد ما شاف ٤٠ ألف من ذريته وبعد موته بسنة توفت ستنا حواء حزنا عليه ويقال ان قبرها موجود فى جدة فى المملكة العربية السعودية فيما يعرف دلوقتى بمقبرة حواء ويقال ان اسم جدة نفسه نسبة للسيدة حواء مأخوذ من كلمة جِده بكسر الجيم وأنها اتسمت بالاسم ده لان السيدة حواء دفنت فيها وهى نفس المكان إللى هبطت فيه من السماء لكن فى مؤرخين بيكذبوا الكلام
ده وبيقولوا ان جدة اتسمت بالاسم ده علشان ستنا حواء نزلت فيها مش علشان مدفونة فيها ولا حاجة برضه الحقيقة فين ربنا إللى يعلم.
دى كانت قصة ستنا حواء رضى الله عنها حاولت اختصرها بقدر الامكان من غير ما اخل منها وحاولت اجيب معظم الآراء إللى اتقالت عن القصة دى اتمنى تعجبكم دمتم بالف خير والى لقاء آخر ان شاء الله مع قصة جديدة من قصص النساء فى القرآن.