حصريآ علي موقع المجد للقصص والحكايات
الكاتبه سمر ابراهيم
نساء من القرآن الحلقة الخامسة زوجة سيدنا نوح عليه السلام
#نساء_من_القرآن
زى ما ورد فى القرآن الكريم نمازج مشرفة من النساء ورد كمان نمازج غير مشرفة علشان يكونوا عبرة لغيرهم علشان نتعظ من آخرتهم واللى حصلهم.
من النماذج دى واحدة المفروض تكون من اكتر الناس ايمانا لكن طبع الله على قلبها وهى زوجة سيدنا نوح عليه السلام.
بالرغم من انها كانت متزوجة من واحد من أولو العزم من الرسل إلا أنها استمرت فى الكفر واتمادت فى الغى لحد ما كانت آخرتها إللى بقت بيها عبرة لمن لا يعتبر تعالوا اقولكم مين هى زوجة نوح عليه السلام.
اختلف المؤرخين على اسمها فيه إللى قال اسمها واغلة وفيه إللى قال والهة أو والغة أو نعمة تبقى بنت لامك بن متوشائيل بن مهويائيل بن عيراد بن خنوخ بن قابيل بن آدم عليه السلام.
قولنا قبل كدا ان بعد موت سيدنا آدم عليه السلام فضل الناس يعبدوا ربنا سبحانه و تعالى ويعمروا فى الأرض لحد ما ظهرت عبادة الأصنام لما كان فيه خمس رجال اتقياء محبوبين بين الناس وهم ود وسواع ويغوث ويعوق ونسر فلما ماتوا الشيطان وسوس للناس أنهم يعملوا تماثيل ليهم علشان يفضلوا فاكرينهم ويحثوهم على العبادة ومع الوقت بدأ الناس يعبدوا التماثيل دى وبدأت عبادة الأصنام فى الأرض علشان كدا بعث الله سبحانه وتعالى سيدنا نوح علشان يدعوا الناس أنهم يرجعوا تانى لعبادة الله الواحد الأحد وكان سيدنا نوح اول رسول يبعث بعد آدم عليه السلام.
فضل سيدنا نوح عليه السلام يدعوا قومه لعبادة الله لكن محدش استجابله إلا المستضعفين من قومه ناس قليلة اوى حوالى ٨٠ واحد معظمهم من النساء والعواجيز .
كان من ضمن إللى مآمنش برسالة سيدنا نوح المفروض اقرب الناس اليه مراته إللى المفروض تسانده وتساعده زى غيرها من زوجات الرسل والأنبياء لكن هى معملتش كدا بالعكس دى كانت مش بس كافرة برسالة سيدنا نوح عليه السلام لا دى كانت بتهاجمه وبتسخر منه وبتقول عليه مجنون وكانت تعتبر اول جاسوسة فى تاريخ البشرية كانت اى حاجة تحصل فى بيتها تنقلها للمشركين من قومها وأى حاجة تعرفها وأى حد يآمن بسيدنا نوح كانت تروح تدى التقرير بتاعها فورا تقرير شامل كل جديد فى حياة زوجها إللى المفروض تكون ليه سكن وسكينة علشان كدا نزل فيها قول الله تعالى فى سورة التحريم لما قال بسم الله الرحمن الرحيم(ضَرَبَ اللَّهُ مَثَلًا لِّلَّذِينَ كَفَرُوا امْرَأَتَ نُوحٍ وَامْرَأَتَ لُوطٍ ۖ كَانَتَا تَحْتَ عَبْدَيْنِ مِنْ عِبَادِنَا صَالِحَيْنِ فَخَانَتَاهُمَا فَلَمْ يُغْنِيَا عَنْهُمَا مِنَ اللَّهِ شَيْئًا وَقِيلَ ادْخُلَا النَّارَ مَعَ الدَّاخِلِينَ )
والخيانة فى الآية مش مقصود بيها الخيانة الزوجية فزوجات الأنبياء منزهات عن الخيانة الزوجية انما المقصود هنا خيانة الدعوة وخيانة الأمانة وافشاء اسرار بيت النبوة .
جدير بالذكر أن فيه رأيين بخصوص زوجات سيدنا نوح عليه السلام فيه رأى بيقول انه كان متزوج من امرأتين واحدة مؤمنة بيه وداعمة ليه وهى ام أولاده سام وحام ويافث والتانية هى واغلة بطلت قصتنا ودى ام ابنه يام وده إللى غرق معاها فى الطوفان بعد كدا وفيه رواية تانية بتقول ان واغلة كانت مراته الوحيدة وهى ام كل أولاده .
سيدنا نوح اتجوز واغلة قبل الرسالة وكانت من عيلة غنية وذات حسب وسلطان ولما نزلت عليه الرسالة فضلت على شركها وعبادة الأصنام.
فضل سيدنا نوح عليه السلام يدعوا قومه ٩٥٠سنة ولما يئس من استجابتهم دعا عليهم زى ما قال ربنا سبحانه و تعالى فى سورة نوح بسم الله الرحمن الرحيم( قَالَ رَبِّ إِنِّي دَعَوْتُ قَوْمِي لَيْلاً وَنَهَارًا * فَلَمْ يَزِدْهُمْ دُعَائِي إِلَّا فِرَارًا * وَإِنِّي كُلَّمَا دَعَوْتُهُمْ لِتَغْفِرَ لَهُمْ جَعَلُوا أصابعهُمْ فِي آذَانِهِمْ وَاسْتَغْشَوْا ثِيَابَهُمْ وَأَصَرُّوا وَاسْتَكْبَرُوا اسْتِكْبَارًا * ثُمَّ إِنِّي دَعَوْتُهُمْ جِهَارًا * ثُمَّ إِنِّي أَعْلَنْتُ لَهُمْ وَأَسْرَرْتُ لَهُمْ إِسْرَارًا * فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُمْ مِدْرَارًا * وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا)
وهنا نزل الوحى على سيدنا نوح وأمره الله عز وجل انه يبنى سفينة ضخمة قال الله تعالى(فَأَوْحَيْنَا إِلَيْهِ أَنِ اصْنَعِ الْفُلْكَ بِأَعْيُنِنَا وَوَحْيِنَا فَإِذَا جَاءَ أَمْرُنَا وَفَارَ التَّنُّورُ فَاسْلُكْ فِيهَا مِن كُلٍّ زَوْجَيْنِ اثْنَيْنِ وَأَهْلَكَ إِلاَّ مَن سَبَقَ عَلَيْهِ الْقَوْلُ مِنْهُمْ وَلا تُخَاطِبْنِي فِي الَّذِينَ ظَلَمُوا إِنَّهُم مُّغْرَقُونَ)
واستجاب سيدنا نوح لأمر المولى عز وجل وبدأ يبنى السفينة هو والمؤمنين وطبعا اتقابل بالسخرية وأول إللى سخروا منه هى مراته واغلة ودارت تقول عليه مجنون بيبنى سفينة فى الصحراء فى مكان مفيهوش نقطة مية لكن صدق الله وعده لرسوله وحصل الطوفان ومرضيتش واغلة هى وابنها يام يركبوا السفينة مع سيدنا نوح وكان مصيرهم الغرق هما وكل الكفار ومفضلش حد فى الكون كله عايش إلا اللى آمن مع سيدنا نوح وركب معاه السفينة حتى الحيوانات والطيور محدش نجى إلا اللى ركب السفينة.
وكانت نهاية واغلة من جنس عملها وهنا نشوف ان الهداية بتكون هبة من الله عز وجل يهدى من يشاء شوفنا زوجة فرعون كانت متجوزة اطغى خلق الله ورغم ذلك أصبحت سيدة من سيدات اهل الجنة وواغلة زوجة رسول كريم ومع ذلك مصيرها الدرك الأسفل من النار فسبحان الله الهادى اللهم اهدنا جميعا يارب.
كمان شوفنا تعامل سيدنا نوح معاها بالرغم من كفرها إلا أنه مأجبرهاش على الإيمان برسالته وترك عبادة الأصنام موردش انه ضربها مثلا بنية تأديبها زى بعض الذكور ما بيدعوا ان يجوز للزوج ضرب زوجته بهدف التأديب كان من باب أولى سيدنا نوح عليه السلام يعمل كدا😏😏😏😏😏
كمان شوفنا نتيجة إفشاء أسرار البيت ممكن تؤدى لإيه .
كل دى حكم ومواعظ من قصتنا النهاردة اتمنى تعجبكم والى لقاء آخر مع قصة جديدة ان شاء الله دمتم بالف خير.
#samar_ibrahim