حصريآ علي موقع المجد للقصص والحكايات
الكاتبه سمر ابراهيم
نساء من القرآن القصه التلاته الملكة بلقيس
هنتكلم النهاردة عن أعظم ملكة حكمت فى تاريخ البشرية سواء القديم أو الحديث مفيش ملكة على مر العصور اجتمعت فيها صفات العدل والحكمة والصلاح الذكاء والفطنة زيها. هنتكلم عن بلقيس ملكة سبأ
اتولدت بلقيس فى القرن العاشر قبل الميلاد واختلف المؤرخين فى نسبها بس الأرجح انها بنت الهدهاد بن شرحبيل ملك سبأ .
مملكة سبأ نفسها اختلفوا فى تحديد مكانها دلوقتى فى إللى قال فى إثيوبيا وفى إللى قال فى اليمن وهو الرأى الشائع.
من ضمن الأساطير والاشاعات إللى اتقالت عن بلقيس أنهم بيقولوا ان امها كانت من الجن فى إللى بيقول ان أبوها الهدهاد كان فى رحلة صيد واصطاد ظبى وكان الظبى ده عبارة عن ملك الجن فسابه الهدهاد ومرضاش يؤذيه وعلشان ملك الجن يكافئه جوزه بنته😂😂😂😂😂 وفى رواية تانية انه كان ماشى لقى تعبانين واحد ابيض وواحد أسود بيتقاتلوا وكان الأسود على وشك قتل الأبيض لكن الهدهاد قتل الثعبان الأسود وقال ايه بقى دول عبارة عن جن والأبيض ده ملك الجن والاسود جن شرير كان عايز يقتل الملك 🙄🙄🙄🙄
عرض بقى ملك الجن مكافئة على الهدهاد فسأله عندك بنت قاله آه قاله خلاص جوزهالى ☺☺☺☺
طبعا كله كلام فى الهجايص
انجب بقى الهدهاد بلقيس وهى الوحيدة اللى عاشت من بين أولاده وكانت شديدة الجمال والذكاء .
لما جه الملك يموت قرر يوصى بالملك لبنته وبعد تنصيبها ملكة طبعا ناس كتير اعترضت ازاى واحدة ست تبقى ملكة عليهم كمان ناس كتير طمعت فى الحكم وكان ضمن الطمعانين ذو الأذعار عمر بن أبرهة ملك حمير إلى حضر جيش ضخم علشان يستولى على حكم سبأ وكان معروف عنه البطش والجبروت والظلم فسموه ذو الأذعار لأنه كان بيثير الذعر فى كل إللى حواليه .
أول بلقيس ما جالها الخبر قررت تستعمل الحيلة وكيد النسا علشان تخلص من ذى الأذعار عملت ايه بقى 🤔🤔🤔🤔 راحتله واوهمته انها معجبة بيه ومستعدة تتجوزه وطبعا لشدة جمالها وقع على جدور رقبته 😁😁😁😁 وصدق كلامها قعدت بقى تشربه خمرة لحد ما سكر وبقى مش شايف قدامه قامت مطلعة الخنجر بتاعها ودبحاه وخرجت جمعت كبار المملكة وقالتلهم انها اتجوزته وهو بايعها بولاية العهد لو جراله حاجة وبالفعل بايعوها بولاية العهد وبعدين كشفتلهم موته ولما عرفوا انها هى إللى موتته فرحوا جدا أنهم خلصوا منه ومن ظلمه وجبروته ونصبوها ملكة عليهم .
حكمت بلقيس مملكتها بالعدل والحكمة فعملت مجلس شورى علشان تتشاور فى أمور الحكم ومتنفردش بالرأى لوحدها وكمان عملت جيش قوى علشان محدش يطمع فى المملكة وكان الشعب بيحبها جدا وبيقدرها .
كانت المملكة بتعبد آلهة متعددة بس أشهر عبادة عندهم هى عبادة الشمس .
وقت حكم بلقيس كان مواكب لحكم سيدنا سليمان عليه السلام زى ما ورد فى القرآن الكريم وزى ما كلنا عارفين القصة.
جه الهدهد وتغيب عن سيدنا سليمان من غير اذن وراح مملكة سبأ ولما رجع لقى سيدنا سليمان غاضب جدا وسأله عن سبب غيابه وعلشان يبرر غيابه قاله انه راح مملكة عظيمة جدا عندها من الخيرات مالا يعد ولا يحصى وبتحكمهم امرأة لكن عيبهم الوحيد انهم بيعبدوا الشمس وسايبين عبادة الله الواحد الأحد .
لما سيدنا سليمان عليه السلام سمع كلام الهدهد بعت فرقة استطلاع علشان يتأكد من كلامه وفعلا لقى كلامه صح فبعت رسالة مع الهدهد للملكة يدعوها للإسلام وبالفعل راح الهدهد ورمى الرسالة فى جناح الملكة ولما فتحتها لقت مكتوب فيها
(إِنَّهُ مِن سُلَيْمَانَ وَإِنَّهُ بِسْمِ اللَّهِ الرَّحْمَٰنِ الرَّحِيمِ . أَلَّا تَعْلُوا عَلَيَّ وَأْتُونِي مُسْلِمِينَ) اول ما قرأت الرسالة جمعت مجلس الشورى بتاعها علشان تاخد رأيهم قالولها احنا عندنا جيش قوى ونقدر نحارب اى حد يجى علينا بس هى معجبهاش الكلام وقالتلهم ان الملوك لما بيدخلوا اى قرية بيفسدوا فيها ويذلوا أهلها انا هبعتله هدية كبيرة يمكن يقبلها ونتجنب الحرب قالولها الرأى رأيك والشورة شورتك يا ست الكل 😄😄😄😄 .
وبالفعل بعتت بلقيس هدايا كتير وقيمة جدا لسيدنا سليمان جواهر وذهب ويقوت ومرجان واحمدك يارب😂😂😂😂
ومن ضمن الهدايا ٢٠٠ عبد وأمة مولودين كلهم فى نفس اليوم ولابسين نفس اللبس (تبذير اوفر الصراحة يعنى) 😏😏😏
طبعا سيدنا سليمان عليه السلام اول ما شاف الهدية غضب جدا وقرر انه يحاربهم بجيش ضخم لكن الخبر اول ما وصل لبلقيس قررت انها تروح بنفسها ومعاها قوادها وأمراء مملكتها علشان تزور الملك سليمان فلما عرف بمجيئها جمع حاشيته من الجن والإنس وقالهم مين فيكم يجيبلى عرشها قبل ما يجونى مسلمين فقال عفريت من الجن انا اجيبهولك قبل ما تقوم من مجلسك وقال إللى عنده علم من الكتاب انا اجيبهولك قبل ما ترمش بعينك (قبل أن يرتد عليك طرفك) ولما جابوله عرشها أمرهم يغيروا ملامحه علشان يشوف هتعرفه ولا لأ .
أولا ما دخلت بلقيس على الملك سليمان وراها عرشها وسألها دا العرش بتاعك طبعا اول ما شافته اتصدمت ازاى قدر يجيبه ويا ترا هو ولا لأ فقررت تجاوب إجابة دبلوماسية ولا تأكد ولا تنفى قالتله كأنه هو مش بقولكم كتلة ذكاء وأول ما دخلت القصر افتكرت ان أرضية القصر عبارة عن مية ورفعت هدومها علشان تقدر تعدى فقالها سيدنا سليمان أن الأرضية عبارة عن زجاج شفاف وتحتها المية😲😲😲😲
طبعا اندهشت جدا ودخلت فى دين سيدنا سليمان هى وكل إللى معاها .
فى روايات بتقول ان سيدنا سليمان اتجوزها وسابها تحكم سبأ وكان بيروحلها كل شهر ٣ ايام وخلف منها ولد وفى روايات تانية بتقول انه جوزها واحد من قواده ايه الصح وايه الغلط الله اعلم .
يقال كمان انها توفت قيل سيدنا سليمان عليه السلام وقام يدفنها فى تدمر (الشام) وأخفى قبرها.
وذكرت قصة ملكة سبأ فى القرآن الكريم فى سورة النمل زى ما كلنا عارفين من اول قوله تعالى بسم الله الرحمن الرحيم
(وَتَفَقَّدَ الطَّيْرَ فَقَالَ مَا لِيَ لَا أَرَى الْهُدْهُدَ أَمْ كَانَ مِنَ الْغَائِبِينَ) إلى قوله تعالى بسم الله الرحمن الرحيم(قِيلَ لَهَا ادْخُلِي الصَّرْحَ ۖ فَلَمَّا رَأَتْهُ حَسِبَتْهُ لُجَّةً وَكَشَفَتْ عَن سَاقَيْهَا ۚ قَالَ إِنَّهُ صَرْحٌ مُّمَرَّدٌ مِّن قَوَارِيرَ ۗ قَالَتْ رَبِّ إِنِّي ظَلَمْتُ نَفْسِي وَأَسْلَمْتُ مَعَ سُلَيْمَانَ لِلَّهِ رَبِّ الْعَالَمِينَ)
كدا خلصت قصتنا النهاردة اتمنى تعجبكم والى لقاء آخر ان شاء الله
Samar Ibrahim