أخر الاخبار

قصص نساء من القرآن الأولى آسيا زوجة فرعون


حصريآ علي موقع المجد للقصص والحكايات الكاتبه سمر ابراهيم 

قصص نساء من القرآن  الأولى آسيا زوجة فرعون

 نساء من القرآن

بسم الله الرحمن الرحيم والصلاة والسلام على خاتم الأنبياء والمرسلين ثم أما بعد.

نبدأ مع اول قصة من  قصص النساء فى القرآن الكريم. 

حبيت اول قصة معانا النهاردة تكون عن واحدة من خير نساء العالمين وسيدة من سيدات اهل الجنة ولحسن حظنا انها مصرية هى السيدة آسيا بنت مزاحم المعروفة باسم امرأة فرعون تعالوا معايا نعرف مين هى السيدة آسيا وازاى قدرت توصل للمكانة إللى وصلتلها بالرغم من زواجها من طاغية زى فرعون .

هى آسية بنت مزاحم بن عبيد بن الريان بن الوليد اختلف المؤرخين فى أصلها فيه إللى قال ان جد جدها كان ملك مصر فى عهد يوسف عليه السلام وفيه إللى قال ان أبوها كان حاكم مملكة من الممالك التابعة للحكم المصرى وفيه إللى قال انها من بنى اسرائيل من سبط موسى عليه السلام وفيه إللى شطح بخياله وقال انها كانت عمته بس انا شخصيا مستبعدة حتة انها من بنى اسرائيل دى خالص لان بنى اسرائيل فى الوقت ده كانوا خدم عند المصريين كانوا مواطنين درجة تالتة من الآخر يبقى ازاى فرعون هيتجوزها وينصبها ملكة على البلاد كلام مش منطقى بصراحة 🙄🙄🙄🙄🙄

نيجى بقى لفرعون نفسه فيه رواية ضعيفة جدا جدا ومشكوك فى صحتها بتقول انها كانت متجوزة الأول من فرعون مصر كان اسمه  قابوس بن مصعب بن معاوية ولما مات اتجوزها اخوه إللى اخد مكانه كفرعون لمصر وكان اسمه الوليد بن مصعب طبعا دا كلام غير صحيح بالمرة الاسامى دى اصلا مكانتش موجودة فى مصر فى الوقت ده هو معظم المؤرخين قالوا يا أما فرعون ده كان ملك هكسوسى حكم مصر ايام حكم الهكسوس ودا الرأى الغالب دلوقتى وعليه أدلة كتير وقالوا ان كان اسمه فرعون مش لقبه وفيه إللى قال ان الفرعون ده كان رمسيس التانى بس دى رواية تم التشكيك فيها حاليا وبأدلة كتير بس ده مش موضوعنا دلوقتى.

المهم كانت السيدة آسيا زوجة فرعون هى السيدة الأولى فى مصر فى الوقت ده مهى مرات الملك بقى وكانت بتعيش فى افخم القصور وحواليها الخدم والجوارى اشكال وألوان وكان جوزها طاغية وظالم وصل بيه الجبروت انه يدعى الاولوهية وينصب نفسه إله وارغم الناس أنهم يعبدوه  وفى يوم وفرعون نايم حلم حلم غريب حلم ان فيه نار شديدة جاية من بيت المقدس على مصر وكانت بتحرق كل حاجة تطولها إلا بيوت بنى اسرائيل لحد ما وصلتله النار هو شخصيا ولما سال الكهنة بتوعه قالوله ان تفسير الحلم ده ان فيه طفل هيتولد من بنى اسرائيل هلاكك وهلاك ملكك هيكون على ايده وهنا قرر انه يقتل كل مولود يتولد من بنى اسرائيل وبالفعل أمر جنوده ينفذوا الأمر فورا اى حد يتولد عنده مولود ذكر من بنى اسرائيل يقتلوه فورا واستمر الحال على كدا لكن وزيره هامان نصحه وقاله ان كدا عدد الخدم والعبيد هيقل لأنهم بيعتمدوا على بنى اسرائيل فى الخدمة وهنا قرر فرعون انه يخفف كلامه شوية ويسيب الأطفال سنة ويقتلهم السنة اللى  بعدها (ياسلام عليك يا ترعة المفهومية وبحر الذكاء يعنى تضمن منين ان الطفل اللى  عليه القصد والنية ميتولدش فى عام السماح ده 😏😏😏😏😏) 

وفى عام السماح ولدت ام سيدنا موسى عليه السلام اخوه الكبير هارون انما فى السنة اللى  بعدها فى عام القتل ولدت سيدنا موسى عليه السلام طبعا كانت مرعوبة تعمل ايه تعمل ايه علشان تنجيه من الموت لحد ما ربنا أوحالها انها تحطه فى التابوت وترميه فى النهر وربنا قادر يحميه وفعلا عملت كدا وهنا بقى اختلفت الروايات ازاى وصل التابوت لقصر فرعون فيه اللى  قال ان التابوت وصل لحد اشجار القصر والجوارى لما شافته افتكروا فيه فلوس فشالوه وودوه للسيدة آسيا إللى اول ما فتحته وشافت سيدنا موسى عليه السلام وقعت محبته فى قلبها وقررت تاخده تربيه وخصوصا انها مكانتش عندها أولاد ذكور مكانتش بتنجب إلا البنات وفيه إللى قال انها كانت عقيم مبتخلفش .

الرواية التانية بالنسبة للتابوت فبتقول ان إللى لقى التابوت هى بنت السيدة آسيا وكان عندها برَص فلما فتحت التابوت وشافت سيدنا موسى خفت من البرص فخدته لامها وقالتله انه طفل مبارك علشان كدا قررت تربيه .

اما الرواية التالتة فبتقول ان السيدة آسيا وفرعون كانوا قاعدين على النيل لما جه التابوت ووقف قدامهم فامرت الخدم يجيبوه ولما فتحته وشافت سيدنا موسى حبته وقررت تربيه.

ايا كانت ايه هى الرواية الصحيحة المهم ان سيدنا موسى عليه السلام وصل لايد زوجة فرعون وأول ما شافه فرعون أمر جنوده علشان يدبحوه بس هى رفضت وحاولت تقنعه بكل الطرق قالتله قرة عين لى ولك قالها لكى انتى اما انا فلا حاجة لى به طب عسى ان ينفعنا أو نتخذه ولدا المهم من هنا لهنا وافق فرعون بعد معاناه انه يخليه علشان تربيه.

طبعا كلنا عارفين قصة تحريم المراضع على سيدنا موسى  وازاى أراد ربنا انه يرده لامه تانى ويعيش معاها ازاى اقولكم 

لما سيدنا موسى رفض كل المرضعات واخته قالتلهم هل ادلكم عل  اهل بيت يكفلونه لكم وهم له ناصحون وفعلا رضع سيدنا موسى من امه وهنا عرضت عليها السيدة آسيا انها تعيش معاهم فى القصر علشان ترضعه بس هى رفضت بحجة البيت وزوجها وأولادها واقترحت انه يروح معاها بيتها وتربيه مع ولادها وهنا وافقت السيدة آسيا على الاقتراح ده ورجع سيدنا موسى لحضن امه تانى وهنا صدق وعد الله سبحانه وتعالى لام موسى لما قالها انا رادوه اليكى وجاعلوه من المرسلين. 

بعد مدة طلبت السيدة آسيا من ام موسى انها تبعت سيدنا موسى علشان تشوفه وفعلا بعتته امه وطول الطريق من بيته للقصر كان السيدة آسيا مدية أوامر لكل خدم القصر أنهم يقابلوه وهو جاى وكل واحد يديله هدية لحد ما وصل للقصر وأعجبت السيدة آسيا بيه اكتر وبتربيته .

اتربى سيدنا موسى بين امهاته الاتنين السيدة آسيا وامه التى انجبته لحد ما كبر وكلنا عارفين القصة إللى حصلت لما قتل الراجل واضطر يهرب من البلاد ويروح مدين يقعد فيها ١٠ سنين كل ده والسيدة آسيا زعلانة على بعاده جدا ونفسها يرجع تانى ولما رجع كان ربنا انزل عليه الوحى وأمره بتبليغ الرسالة وبالفعل كانت السيدة آسيا من أوائل من آمن بيه بس كانت بتكتم إيمانها خوفا من بطش فرعون واستمر الحال على كدا لحد ما جت حادثة الماشطة بتاعت بنتها اللى آمنت بربنا سبحانه وتعالى وانكشف أمرها عند فرعون وأمر بحرقها حية هى وأولادها إللى كان من ضمنهم طفل رضيع وهنا بقى لما وصلت الأخبار للسيدة آسيا ثارت جدا وواجهت فرعون وأعلنت إسلامها قدامه وقالتله اتتكبر على الله وهنا بقى شاط فرعون ازاى الأمر يوصل لأهل بيته بالمنظر ده وقرر ينتقم منها حاول الأول يخليها ترجع عن إسلامها وقالها لو رجعتى هسامحك هو كان بيحبها جدا ومش عايز يخسرها بس هى اتمسكت برأيها وهنا أمر جنوده ياخدوها فى عز الشمس الحارقة ودقوا لها أوتاد فى الأرض وربطوا ايدها ورجلها وبقوا يعذبوها وقالهم فرعون لو رجعت فى كلامها فهى مراتى مرجعتش استمروا فى تعذيبها وهنا ناجت السيدة آسيا ربها وقالت ربى ابن لى عندك بيت فى الجنة وهنا تجلت الملائكة ووروها قصرها فى الجنة عامل ازاى فابتسمت ولما شافها فرعون بتضحك اتجنن زيادة ازاى تتعذب العذاب دا كله وتضحك وأمر جنوده يجيبوا أكبر حجر ويحطوه فوقها بس كانت فاضت روحها الكريمة إلى ربها وماتت قبل ما يحطوا عليها الحجر .

طبعا القصة بتورينا ازاى الواحد ممكن علشان مبادئه يستحمل اى عذاب فى الدنيا لا وكمان ممكن يرفض كل نعيم الدنيا طمعا فى نعيم الآخرة ربنا يحسن ختامنا جميعا يارب 

تم ذكر قصة السيدة آسيا فى القرآن فى سورة التحريم الاية رقم ١١ فى قوله تعالى ( وَضَرَبَ اللَّهُ مَثَلاً لِّلَّذِينَ آمَنُوا اِمْرَأَةَ فِرْعَوْنَ إِذْ قَالَتْ رَبِّ ابْنِ لِي عِندَكَ بَيْتاً فِي الْجَنَّةِ وَنَجِّنِي مِن فِرْعَوْنَ وَعَمَلِهِ وَنَجِّنِي مِنَ الْقَوْمِ الظَّالِمِينَ } 

كمان ورد ذكرها فى السنة النبوية فى حديثين للرسول صلى الله اول حديث قال أحمد بن حنبل حدثنا يونس حدثنا داود بن أبي الفرات عن علباء عن عكرمة عن ابن عباس قال: خط رسول الله صلى الله عليه وسلم  في الأرض أربعة خطوط وقال: اتدرون ما هذا  قالوا: الله ورسوله أعلم. فقال رسول الله  (افضل نساء اهل الجنة خديجة بنت خويلد وفاطمة بنت محمد ومريم ابنة عمران وآسية بنت مزاحم امرأة فرعون )

اما الحديث الثانى: ورد فى الصحيحين من حديث شعبة عن عمرو بن مرة عن مرة الهمداني عن أبى موسى الاشعرى عن النبى صلى الله عليه وسلم أنه قال  (كُمل من الرجال كثير  ولم يكمل من النساء إلا آسية امرأة فرعون ومريم ابنة عمران وخديجة بنت خويلد وان فضل عائشة على النساء افضل الثريد على ثائر الطعام )

كدا خلصت قصتنا النهاردة اتمنى تعجبكم دمتم بالف خير والى لقاء آخر ان شاء الله. 

#samar_ibrahim

القصه التانية السيدة خولة بنت ثعلبة

تعليقات