روايه نهاية الرحلة كامله بقلم عمرو راشد
روايه نهاية الرحلة الفصل الاول بقلم عمرو راشد
انت يا حيو*ان ياللي خبطت العربية.. انت اعمى ولا ايه.. ايه رأيك بقا انك هتصلحها
= أنتي بتتكلمي كدا ليه يا مر*ا.. اتكلمي عدل بدل ما اساوي وشك بالاسفلت.. و اعملي حسابك اني مش هصلح حاجة واللي عندك اعمليه
طب انا هوريك انا هعمل ايه
" الامور الروتينية في الجواز شئ طبيعي لكن اللي مش طبيعي لما يتحول الجواز ل حاجة بتهرب منها .. ممكن تستغرب من كلامي ولكن هو دا اللي حصل.. انا بهرب من البيت.. بهرب من مراتي.. معنديش رغبة اني اكون موجود في البيت معاها و دا محصلش فجأه.. ولكن كان بسبب التراكمات او تقدر تقول اننا مخدناش وقت نتعرف فيه على بعض.. كل واحد فينا يدرس شخصية التاني و دا اللي انا اكتشفته متأخر اننا مش شبه بعض تماما ، كل واحد فينا عنده شخصية مختلفة.. طموح مختلفة.. تفكير مختلف.. اهتماماتها مش زيي او بمعنى اصح مش حاسس انها شبهي.. و النهاردة كانت خناقة جديدة انتهت ب اني هربت من البيت زي كل مرة
فلاش باك
شادي انا عايزة اروح عند ماما
= ليه يا حبيبتي.. هي تعبانة؟
لا انا اللي محتاجة اروح اريح اعصابي شوية
= مالك في ايه
مفيش يا شادي.. اعصابي تعبانة ومش مستريحة ، هروح اقعد يومين هناك
= و دا عادي كدا ، الموضوع دا طلع فجأه يعني
اه فجأه.. اتفضل بقا قوم غير هدومك عشان توصلني
" قومت من مكاني وقربت منها
طب ممكن تهدي شوية
= اووف ابعد عني.. ريحتك مش حلوة
مالها ريحتي يا يارا.. انا لسة واخد دش على فكرة
= لا حاسة انها مش حلوة.. ادخل استحما تاني
طيب يا حبيبتي اهدي انتي وانا هعملك اللي أنتي عايزاه
= هو كل شوية تقولي اهدي.. هو انت شايفني مجنونة ولا ايه، شايفني بشد في شعري ولا اتجننت خلاص
لا يا حبيبتي انا اللي مجنون.. ممكن تهدي بقا عشان العصبية دي مش كويسة على اللي في بطنك
= ملكش دعوة انا حرة
طب انا عايزك ترتاحي وكل حاجة هتحصل زي ما أنتي عايزة
= أنا مش عايزة حاجة.. انا عايزاك توديني عند ماما وخلاص
تروحي عند ماما ازاي الساعة 3 الفجر
= هو انت مش هتكون معايا ولا ايه.. طالما انت معايا اروح في اي وقت انا عايزاه
طب ايه رأيك تنامي دلوقتي والصبح نروح
= لا انا قولت دلوقتي يبقا دلوقتي
وانا مش قادر دلوقتي يا يارا
= مش قادر ليه يعني.. هو انت اللي حامل ولا انا ، ولا يكونش انت بتتعب زي ما انا بتعب
اه بتعب يا يارا
" ابتسامة سخرية اترسمت على وشها
بتتعب اممم.. طب معلش
= هو أنتي ليه دايما بتتعمدي تبينيلي اني مش بعمل حاجة.. اه تعبت يا يارا ، تعبت من اني كل يوم ارجع من الشغل اعمل اكل و انضف البيت و اغسل المواعين و اغسل الهدوم و اشوفك لو محتاجة حاجة.. تعبت من كتر ما بعملك كل حاجة وانتي برضو مش بيعجبك
وعايزني انا اللي اعمل يعني.. ابقا حامل وتعبانة و اقوم انا اعمل كل دا
= وانا معترضتش.. انا معنديش مانع اعملك كل دا بس تبقي عارفة اني بعمل كدا عشان بحبك.. عشان مش عايز اتعبك
خلاصة الكلام انا تعبانة وعايزة اروح عند ماما.. هتوديني ولا اروح انا لوحدي
" زعقت فيها لأني مكنتش قادر اكتم جوايا أكتر من كدا
أنتي مبتحسيش ب حاجة.. بني ادمة أنانية مش بيهمك غير نفسك.. مبتعمليش حاجة غير انك بتدوسي عليا وبتكسري خاطري.. بتكسريني وانا اللي كل مرة بجيلك.. مش مقدرة انا بعمل ايه عشان بحبك.. مش قادرة تشوفي اني مبقاش عندي طاقة.. مبقاش فيا طاقة كفاية عشان تشيل تعبي منك.. كلامك بيجرحني ، بيحسسني اني عاجز دايما قدام تصرفاتك و اي حاجة بتعمليها لأنك مبتفكريش فيا قبلها.. مبتفكريش انا ممكن ازعل ولا لا.. هو مش أنتي اللي اقترحتي اني اشتغل شغل تاني عشان مرتبي مش مكفيكي رغم انه كويس.. مكنتش محتاج ل شغل تاني ولكني اشتغلت عشان اوفرلك كل حاجة.. عشان متبقيش عايزة اي حاجة ، ضحيت ب راحتي.. مبقتش بفكر في اي حاجة غير الشغل.. مبقتش انزل مع صحابي.. مبقتش عارف ازور اهلي.. مبقتش عارف اعمل اي حاجة في حياتي غير الشغل.. حتى يوم اجازتي بنام فيه من تعبي طول الاسبوع.. ضحيت بكل دا و اخترت اني اريحك أنتي وأنتي برضو مكنش فارق معاكي ، يارا انا تعبت وانا اللي هسيبلك البيت مش أنتي.. خليكي أنتي قاعدة هنا في بيتك وانا اللي همشي
بااك
" احساس صعب أوي لما تعمل كل حاجة عشان خاطر حد و هو ميقّدرش دا.. يعتبره انه شئ عادي وانك مطالب تعمله ، كانت من ضمن أسئلتي دايما اللي بسئلها لنفسي.. هي ليه الحياه بتقف بعد الجواز.. ليه مبنعرفش نكمل حياتنا مبسوطين ونعيش بشكل طبيعي.. بس دلوقتي انا عرفت الاجابة.. الغلط مش فيا ولا فيها ، الغلط اننا الاتنين اتجمعنا مع بعض تحت سقف واحد.. هي كانت لازم تقابل اللي شبهها وانا كذلك بس دا محصلش وعشان كدا الامور بقت بالشكل دا.. كنت ماشي بالعربية تايه مش عارف اروح فين ، بلف في الشوارع بقالي ساعة متجاهل كل مكالماتها لاني لو رديت هنتخانق تاني.. بس لقيتها بترن تاني ، مسكت الموبايل و كنسلت عليها و رميت الموبايل جنبي على الكرسي عشان ابص قدامي واتفاجئ ان في عربية واقفة قدامي وانا ماشي بسرعة ، دوست فرامل ولكن ملحقتش وخبطت العربية ، نزلت بسرعة عشان اشوف اللي حصل بعدها لقيت اللي بتفتح باب عربيتها ونزلت تجري منها ، بعد ما بصت على العربية وشافت اللي حصل..
انت يا حيو*ان اللي خبطت العربية؟.. انت اعمى ولا ايه ، مش شايف اني واقفة
= انتي بتتكلمي كدا ليه يا مر*ا ، وبعدين أنتي اللي غلطانة.. هو في حد يقف في نص الشارع كدا
انت مالك.. انا اقف زي ما انا عايزة
= دا في بيتكو يا حبيبتي ، تقفي زي ما أنتي عايزة دي في بيتكو
اوووه دمك خفيف اوي.. يالهوي مش قادرة اديني رقمك بسرعة
= شكلك عبيطة وهي مش طالبة معايا عبط على بليل كدا.. يلا شوفي أنتي رايحة فين
انت هتمشي وتسيبني كدا.. مش هتصلح العربية؟
= و اصلحها ليه.. انتي اللي غلطانة
طب ايه رأيك انك هتصلحها لأنك لو مصلحتهاش هوريك انا هعمل ايه
" عليت صوتي عليها
هتعملي ايه يعني
= هعيط.. اه والله هعيط
طب يبقا ايه لازمتها بقا.. تفردي عضلاتك كدا
= معلش انا اسفة ممكن بقا تصلحلي لان انا مش هعرف اتصرف لوحدي
اتحايلي عليا شوية
= ممكن بعد اذنك يا استاذ..
شادي
= ممكن بعد اذنك يا استاذ شادي تصلحلي العربية
لا محستهاش.. عايزك تقوليها ب شجن كدا ، عايز اعيط
= لو سمحت يا استاذ شادي يا ابو الرجولة ، انا واحدة و واقفة في نص الليل لوحدي و عربيتي با*يظة وحضرتك اللي خا*بطها أصلا.. ممكن بقا تصلحها او تساعدني
ماشي هساعدك.. كدا كدا انا كمان عربيتي محتاجة تتصلح
= طب ازاي بقا
" كنت أعرف واحد صاحبي ميكانيكي وفاتح ورشة للصيانة.. اتصلت بيه وطبعا الوقت كان متأخر و اكيد كان نايم.. وفعلا توقعي طلع صح وكان نايم
في ايه يا شادي.. حد يكلم حد في وقت زي دا
= معلش يا رامي.. انا عندي مشكلة ومفيش غيرك هيحلها
مشكلة ايه
= انا عملت حادثة
و بعدين
= خبطت عربية واحدة وعايزين نصلحها و اصلح عربيتي كمان
بقا انت قالقني من النوم عشان كدا.. اقفل العربية و امشي يا شادي وبكرا الصبح هبعت حد ياخدها
= لا وحياه امك.. انا رسمت نفسي أوي قدامها ، متكسفنيش يا رامي بالله عليك
يا شادي انت مجنون.. انا لسة قافل الورشة وعايز انام شوية
= و رحمة ابوك يا رامي.. هتخلي شكلي وحش قدامها يعني ، يرضيك صاحبك يطلع شكله وحش يعني
خلاص يا شادي
= لا قولي لو يرضيك يعني
خلاص يا شادي هتصرف
= أنا عايز اعرف بس لو كان هيرضيك؟
قولت هتنيل هتصرف
= طلب كمان بقا
انجز
= عايز بس اي حاجة تكون معايا
تكون معاك ازاي يعني مش فاهم
= يعني ابعتلي اي عربية من عندك
لحد هنا و تنسا انك تعرفني أساسا
= رامي انا معنديش غيرك دلوقتي.. انت هتتخلى عني يعني
وانا كنت وعدتك بالجواز و هسيبك
= طب عشان العيش والملح اللي بينا
برضو لا
= طب هعزمك على حواوشي
بالجبنة
= بالجبنة
بس أنا للاسف يا شادي مش معايا غير المكنة دلوقتي
= ابعتها عادي
ماشي هبعتهالك مع الواد اللي هييجي ياخد العربية
= وانا هبعتلك لوكيشن بالمكان اللي انا فيه
" قفلت معاه و بصتلها لقيتها واقفة وساندة على رجل واحدة معرفش عملتها ازاي أصلا و مربعة ايدها
عرفت تتصرف ولا لا؟
= عرفت اه.. أنتي مالك عاملة كدا ليه
والله انا امرأه حرة
= طيب اتا اعرف كافيه هنا بس قدام شوية.. ايه رأيك نروح نشرب اي حاجة
لا شكرا
= هعزمك انا
شكرا
= ماشي انا هروح وخليكي هنا لوحدك
هخليني لوحدي.. هو انا هخاف يعني
" مشيت حوالي 10 متر بالظبط ولقيت اللي بتنادي عليا
ممكن بس تاخدي معاك اصل انا هخاف اقعد هنا لوحدي
= طب امشي قدامي يلا
" فضلنا ماشيين ساكتين من غير ما حد فينا ينطق بأي كلمة لحد ما وصلنا الكافيه.. دخلنا وقعدنا وساعتها انا اللي بدأت الكلام
طب ايه.. ماهو احنا مش قاعدين في عزا
= و لاحظ برضو اننا منعرفش بعض ف مفيش أي مجال للكلام
طب ما نتعرف عادي
= نتعرف
انا شادي
= وانا ملك
ايه اللي نزلك في وقت متأخر زي دا
= مفيش كنت مخنوقة شوية فقولت انزل اتمشا شوية لحد ما الطيارة توصل
انتي مستنية حد راجع من برا
= اه
قريب منك
= تقريبا.. قولي بقا انت ايه اللي نزلك من بيتك دلوقتي
بهرب من الدنيا
= وهي مالها الدنيا
بهرب من دنيتي انا ، بهرب من الوحده
= ملكش صحاب
ليا بس مبقناش نقعد
= ليه
اتشغلت في حياتي ف مبقاش عندي وقت
= امال انت بتعمل ايه في حياتك
بشتغل
= و بعدين
بنام
= بس كدا
بس اه
= و ازاي قادر تعيش كدا
زي اي حد عايش
= فين حياتك انت.. فين نفسك
حياتي بقت عبارة دورة بعملها كل يوم ب انتظام و ب روتين ممل جدا ، من كتر ما انا مبقتش افكر اعمل حاجة لنفسي بقيت انسا انا المفروض اعمل ايه اساسا.. بقيت عايش جسد بس من غير روح.. مش عارف الاقي نفسي
= وانت ليه سايب نفسك لحد ما توصل للحالة دي
انا مسيبتش نفسي والله بس انا مكنش عندي أي اختيار تاني.. بقولك ايه بقا شوفيلنا موضوع تاني بدل النكد دا
= بس بجد يا شادي انت لازم تخرج من الوضع دا بدل ما توصل للاسوء من كدا
طب قوليلي بقا.. انتي بتعملي ايه في حياتك
= انا عكسك تماما بقا بس برضو متشابهين ، يعني انا خرجت كتير و اتفسحت و اشتريت لبس و سافرت وعملت كل حاجة بس برضو مش لاقية نفسي
مش جايز عشان أنتي اللي مش عايزة تلاقيها
= يعني ايه
يعني ممكن تكوني أنتي اللي قاصدة متلاقيهاش زي الراجل اللي اول ما يقبض مرتبه يروح يصرف فيه يمين وشمال وبعدين يشتكي ان المرتب قليل وخلص بسرعة مع انه لو كان حافظ عليه و صرف بالعقل مكنش خلص
= ومين قالك اني مش عايزة الاقي نفسي
عنيكي بتقول كدا
= وانت بقا سايب كلامنا ومركز ف عنيا
ملقتش حاجة أحلى من كدا اركز فيها
= فليرت قديم أوي
بس حلو
= اممم حلو اه
" ضحكنا.. بعدها الويتر جالنا
تشرب ايه يا فندم
= شوفها الاول تطلب ايه
" ساعتها بصتلي و ابتسمت.. بعدها خدت منه المنيو و فضلت تدور كتير لحد ما رفعت وشها وقالت ب زهق
مش عارفة.. اطلب انت
= هو حل واحد بس اللي بلجأله في الموقف دا.. اتنين لمون بالنعناع
" الويتر كتب الاوردر ومشي
ايه رأيك كل واحد فينا يسأل التاني اي سؤال بيدور في دماغه دلوقتي حالا
= موافقة
ابدأي
= كلت ايه النهاردة
شوربة لسان عصفور
= ايه دا بجد.. انا كمان كلتها النهاردة
بتحبيها؟
= دا انا بموت فيها.. ولو عليها لمون بقا تجنن
تصدقي انا كمان بحبها وهي عليها لمون
= اي حاجة عليها لمون بتبقا جامدة اصلا
زي الكبدة
= يابن الايه ايوا صح.. بحبها اوي برضو
من البيت بقا ولا من على عربية
= طب هسألك سؤال و ترد عليا بحق ربنا.. هي الكبدة تتاكل اصلا غير من العربية
مبتخافيش من الأمراض يعني
= الانسان بيعيش مرة واحدة بس يا صديقي.. يعني لازم اجرب كل حاجة انا نفسي فيها
عندك حق
فلاش باك
ما تيجي يا يارا ننزل ناكل كبدة.. انا نفسي فيها أوي
= يع ايه القرف دا.. عايز تخلينا ناكل من على العربية دي
مالها العربية يعني
= لا طبعا مستحيل ااكل من هنا.. انا بقرف
باك
سرحت ف ايه
= في الكبدة
طب بس عشان جوعت.. يلا دورك
= الكراش كان اسمه ايه
أكرم
= كنتي بتحبيه؟
كنت فاكرة اني بحبه او وهمت نفسي بكدا
= وبعدين
متفقناش وكل واحد راح ل حاله
= يلا دورك
انت بقا كراشك كان اسمها ايه
= يارا
حبيتها؟
= مش عارف.. مش عارف حبيتها ولا لا الصراحة
امال كنت مكمل معاها ازاي
= ومين قالك اني كملت.. احنا سيبنا بعض
ليه
= هي اللي مبتحبنيش او تصرفاتها وكلامها هما اللي كانو بيقولو كدا ، كنت بشوف دا في عنيها رغم اني كنت دايما بحاول اسعدها بقدر الإمكان وهي برضو محبتنيش او انا اللي معرفتش اخليها تحبني
بس انت كنت بتقول انك كنت جنبها وبتحاول تخليها مبسوطة يعني المفروض هي تفرح ب دا
= كان نفسي تحبني زي ما انا كنت بحبها او على الاقل اشوف دا في عنيها بس عادي يعني
متقلقش بكرا تلاقي اللي يحبك
= انا بقالي كتير أوي مستني بكرا دا
ياعم قولنا جاي بقا متصدعناش
" ابتسمت
طب قوليلي مين أكتر مطرب بتحبي تسمعيه
= اقولك ومن غير تريقة
عيب عليكي بقا
= بحب عبدالحليم حافظ
تحبي اقولك بقا ان انا كمان بحبه
= بجد
اه والله بجد
= طب ايه أكتر اغنية بتحبها
انا لك علطول
= انا مش مصدقة بجد.. انا بحبها اوي الاغنية دي.. مش متخيلة ان في حد لسة بيسمع عبدالحليم
انا بسمعه اهو عادي
= طب عمرو ولا تامر
بهاء سلطان
= لا لا مش ممكن انت من النهاردة صديقي
" ضحكت جدا من طريقة تعبيرها.. ووسط كل دا شوفت اسمها على التليفون.. كانت بترن عليا ، كنسلت عليها وبعدها ب ثواني رامي رن عليا وقالي
انت فين.. انا عند العربية اهو بس مفيش حد
" وصفتله عنوان الكافيه وبالفعل جالي هناك.. استأذنتها وخدت منها مفاتيح عربيتها وخرجت برا
انا جبتلك المكنة اهي.. خلي بالك منها
= في عنيا
انا هرجع عند العربية عشان الونش جاي دلوقتي
" خدت منه المفتاح و سلمته مفاتيح العربيات.. دخلت الكافيه تاني
يلا نمشي
= طب واللمون
يلا بس.. هما كدا كدا بيعملوه وحش أصلا
" خرجنا برا الكافيه
هنروح فين بقا
= اركبي ورايا
تعرف اني كان نفسي اجربه من زمان أوي
= واهو جالك لحد عندك
بس خايفة
= متخافيش.. امسكي فيا بس
" ركبت ورايا بعد معاناه طبعا عشان تعرف تطلع
اعمل ايه بعد كدا
= امسكي فيا
" مسكت فيا بكل قوتها
براحة يا شادي.. يا شادي هقع براحة.. حاسب العربيات
= ملك احنا لسة متحركناش
اصلا
" مشيت بالموتسيكل.. في الاول كنت حاسس انها خايفة من مسكة ايديها لكن تدريجيا بدأت تسيب ايدها لحد ما لقيتها قامت وقفت و بتضحك.. بصيتلها وكانت زي الاطفال وهي مبسوطة.. بعدها قربت مني و لوهلة حسيت انها بتحضني بس بعدها بسرعة شالت ايدها و رجعت تضحك بصوت عالي زي الأول لحد ما وقفنا
اهو انا كان من ضمن احلامي اني اجرب البتاع دا
↚
نهايه الرحله الفصل الثاني ولاخير
= و جربتيه
كان احساس حلو أوي
= اشكريني بقا
اشكرك على ايه.. هو انت اخترعت يعني؟
= اممم ماشي ماشي.. مش يلا بقا عشان جوعت
وهناكل ايه دلوقتي
" شاورت ب ايدي على عربية الكبدة اللي كانت على الناحية التانية
الله دي كبدة.. يلا بسرعة
" ملحقتش ارد عليها لانها جريت على العربية و بدأت تطلب الاكل.. وساعتها طلبنا اكتر من 25 سندوتش.. بعدها خلصنا و روحنا شربنا اتنين لمون بالنعناع
انا حاسة اني بملك الدنيا و ما فيها
= مبسوطة؟
جدا
= انا كمان مبسوط اوي
" كنا على النيل.. اتمشينا جنبه
ايه مواصفات فتى أحلامك
= يكون بيحبني طبعا و حافظ افيهات الأفلام دا اهم حاجة.. دمه خفيف ، بيعرف يلبس.. بيعرف يحتويني
وكل دا مكنش في موجود في الشخص اللي كان في حياتك
= مكنش فيه غير المشاكل.. كان مليان عيوب وحتى مكنش عايز يتغير
وهو ليه يتغير
= عشان بيحبني
مش شرط عشان بيحبك يبقا يتغير يا ملك.. هو لو عايز يتغير كان اتغير لو هو حابب دا.. لو هو عايز يتغير اساسا لكن هو كان رافض التغيير عشان هو عاجبه نفسه كدا
" وقفت مكانها وبدأت تكمل كلام
بس أنا كنت استاهل انه حتى يحاول عشاني.. انا مكنتش استاهل انه يهملني بالشكل دا يا شادي
= كل واحد فينا بيحب بطريقته يا ملك.. أنتي عايزاه يتغير عشان تحبيه وهو شايف انه بطريقته دي هو كدا بيحبك وبيعمل كل اللي عليه.. انا مش عايزك تزعلي ، أنتي جميلة أوي وتتحبي .. هو اللي خسران مش أنتي يا ملك.. دا يارتني كنت انا والله
" ضحكت و كملنا مشي لحد ما حسيت انها تعبت.. وقعدنا على الرصيف
قولي بقا كنت تقصد ايه ب كلمة " يارتني كنت انا دي "
= لا دا هزار
هزار اممم
= مش مصدقة انه هزار ولا ايه
لا طبعا
= وحياه عنيكي الحلوين دول
ما تركز معايا وتسيبك من عنيا شوية
= بيشدوني حتى وانا مش مركز معاها والله
بجد
= بجد جدا
" سرحت للحظة وتوهت أكتر في عنيها.. قربت منها أكتر.. كنت قريب جدا من شفايفها ، غمضت عيني وكنت لسة هبو*** .. سمعت صوت تليفونها بيرن . فوقنا من اللي كنا فيه و طلعت التليفون و ردت
ايوا انا جاية اهو حاضر
" بعدها قفلت المكالمة و بصتلي والدموع بتتجمع في عنيها
انا لازم امشي.. اللي مستنياه وصل خلاص
= انتي مقولتليش انتي مستنية مين؟
اكرم
" قالت الكلمة اللي كانت بمثالة سكي*نة و دخلت في قلبي
جوزي
= هو كان مسافر؟
علطول مسافر ولسة راجع وكمان كام يوم هيسافر تاني.. عن اذنك مضطرة امشي
= طب و عربيتك
هبقا اكلمك عشان استلمها لما تخلص.. قولي رقمك
" سجلت الرقم عندها و رنت عليا
اول ما العربية تخلص كلمني
= حاضر
مع السلامة
= سلام
" احساس ب وجع غريب في قلبي.. كنت مصدق اللحظة.. صدقت انها هي اللي كان المفروض تكون معايا مش يارا.. غريبة أوي الدنيا دي دايما تقابل الناس الصح في الوقت الغلط.. جالي تليفون من حماتي.. اكيد طبعا يارا كلمتها و اشتكت ، رديت عليها عشان الاقيها بتقولي
مراتك بتولد في المستشفى
" عرفت منها العنوان وجريت بسرعة ركبت تاكسي و روحت على المستشفى.. وصلت الأوضة اللي كانت فيها لقيتها نايمة على السرير.. قربت منها و بو*ستها من دماغها وقبل ما انطق ب حرف كانت هي قالت
انا اسفة
" ابتسمت في وشها
حمدالله على سلامتك.. أنتي كويسة؟
= متقلقش يا حبيبي كويسة
ولد ولا بنت
= بنت زي القمر
" بصيت عليها وهي نايمة جنبها على السرير.. شيلتها بهدوء و حضنتنها.. ساعتها يارا قالت
هتسميها ايه يا شادي
" بصتلها و ابتسمت
ملك
" كل واحد مننا هيقابل الشخص اللي يشبهه بس الله اعلم هتقابله في الوقت الصح ولا الغلط.. لكن اللي متأكد منه هو انك هتقابل شخص يشبه روحك بس اتمنى انه يبقا لسة في اول الرحلة "
" اما انا بقا.. كلمته بعدها ب أسبوع واستلمت العربية بالفعل بس متقابلناش تاني.. جميل أوي انك تقابل شخص تحس انك واقف قدام مراية.. شايف نفسك فيه.. شخص تقدر تتسند عليه وانت مطمن.. حتى لو كنت هفوق من الحلم دا و هرجع للواقع بتاعي تاني بس الاهم اني اكون عيشتها ولو لمرة.. القدر بيفرقنا عن اشخاص كان المفروض نكون معاهم ويجمعنا ب اشخاص عايشين معاهم من غير روح.. بس اللي انا متأكدة منه اني عمري ما هنساك يا شادي.. وعشان كدا قررت اني هكتب دايما حكايات تجمعنا.. حكايات شادي ملك♥️ "
" لو عجبك الاسكريبت سيب كومنت لطيف ♥️
#عمرو_راشد
#نهاية_الرحلة