رواية موسى الجزء جزء الثاني الفصل الاخير بقلم فريده الحلواني

استدراج الشيطان كامله بقلم احمد محمود شرقاوي 

استدراج الشيطان كامله 

بقلم احمد محمود شرقاوي 

استدراج الشيطان كامله بقلم احمد محمود شرقاوي 

 بعد ما خدت الدبلوم ملقتش مكان يلمني انا والصُحبة الفاسدة غير القهوة اللي على أول الشارع، ويوم بعد يوم بقيت بقعد عليها أكتر ما بقعد في بيتنا وبقيت أهم واحسن الزبون على القهوة مع الوقت، واتعلمت على القهوة كل حاجة كنت ببعد عنها ايام الدراسة..

اتعلمت التدخين والشيشة، ومع الوقت بدأت اشرب الحشيش والبانجو بسبب الملل والعطلة اللي انا فيها، وده لأني مكنتش بعمل اي حاجة في الدنيا غير اني أخد فلوس من ابويا واقعد على القهوة، واللي كان مميزني عن الكل بلا استثناء ان شكلي كان أجنبي اكتر مني مصري، لحد ما اتشهرت يوم بعد يوم بإسم الأجنبي، وكانت عندي جاذبية والكل عايز يصاحبني ويقرب مني بحُكم شكلي وشخصيتي في المكان..

كان ليا صاحب مقرب اسمه عمر، كنا بنروح بالليل لعزبة جمبنا نقضي الحشيش وندفع مبالغ عشان نجيب صنف محترم، واتشهرنا واتعرفنا كمان وسط بتوع المخدرات في العِزب وتحت الكباري..

لحد ما حصلت الكارثة وابويا جتله أزمة صحية ومات بدون أي مقدمات، واتقطع الجيب اللي كان بيصرف عليا وفي يوم وليلة لقتني مش عارف أجيب تمن السيجارة وكوباية الشاي فما بالك بتمن الكيف..

وقعدت كتير في الوضع ده وفي الخنقة دي، لحد ما اقترح عليا واحد أعمل مصالح من الحشيش، ناس هتطلب وانا اللي هجيب واودي وليا عمولة في النص، فلوس، مخدرات، زي ما أحب هاخد أجرتي، وانا معروف وسط بتوع المخدرات وبيحبوني كمان..

حسيت وقتها بالخوف لأول مرة، وكأني طول عمري بعوم على الشط بس المرة دي داخل في الغويط بدون عوامة، الموضوع كان مُخيف جدا بس مكنش فيه أي حل، انا مش هعرف أبطل دلوقتي وقعدة القهوة والدخان استحالة اعرف ابطل فيها، ولا هعرف ابطل قعدة القهوة لأني معرفش غيرها..

وغصب عني وافقت، وافقت وبقيت شغال ديلر على خفيف، ناس بتطلب وانا بوصل وليا نسبة، وكل ما كنت بوصل اكتر كانت نسبتي بتزيد وكانت الدنيا حلوة، فلوس وحشيش وعلاقات والدنيا حلوة..

لحد ما في مرة شافتني مرات ديلر من اللي بتعامل معاهم، شافت الواد ابو عيون ملونة وشعر اصفر انبهرت بيه، وجابت رجلي من ورا جوزها وبقيت عشيق في الظل، ومن معرفتها اتفتحت قدامي سكة اسوأ من سكة المخدرات، كانت سكة الستات..

عرفت عن طريقها ست واتنين وتلاتة وعملت علاقات معاهم كلهم، وبقيت بجيب الكيف والفلوس والستات وكل ده ببلاش، كنت عايش زي الملك، زي الطير اللي طاير في السما..

لحد ما بدأت الحكومة تضيق اوي واتمسك اكتر من تاجر ولقيت سكة المخدرات بتتقفل قدامي بالضبة والمفتاح، ووسط اكتئابي وفضفضتي للست مرات الديلر قالتلي انها تعرف سكة بتجيب فلوس كتير اوي..

كانت بتسرح بنات يشتغلوا في الدعارة وبتكسب، وقالتلي ممكن اشتغل معاها، حاولت اعترض وشفت ان ده نقص من رجولتي، اقنعتني اني مش هعرف اجيب فلوس غير من السكك دي وخطورة الشغلانة اقل كتير من شغل المخدرات..

ومع وقف الحال وافقت، وشغلت تحت ايدي تلت بنات، كتبت عليهم واتجوزتهم عشان يبقا الموضوع قانوني، وبقيت بسهل خروجهم مع الزباين وباخد نص الأجرة، الغريب ان فلوس الشغلانة دي كانت احسن واحسن، وسبت المخدرات خالص وفضلت اربع سنين مشغل تحت ايدي يمكن عشر بنات متجوزهم كلهم عرفي، ومشيت الدنيا كويس اوي اوي..

لحد ما بنت من البنات كانت مع زبون غني وقالتلي انا هقولك على سبوبة حلوة اوي، قالتلي ان الزبون غني اوي ومطلق مراته تلت مرات وبيدور على محلل يعجب الست مراته تتجوزه شهر وهيدفع مبلغ كبير، وكل ما يجيب محلل لمراته ترفض، وقالتلي انت شكلك حلو واكيد هتوافق بيك..

وفعلا عرفتني بالراجل وقابلت مراته في شقة فخمة، ومن اول نظرة عرفت ان الست اشتهتني اوي، مانا خبرة وفاهم، جوزها قال هيكتبلي شيك بعشرالاف جنيه، وهتجوز مراته شهر عشان يعرف يرجعها..

ومن اول يوم جواز بيني وبين مراته الست فاتن عرفت ان المجتمع ده الست فيه بتبقا حاطة رجلها على رقبة الراجل، ولما بتزهق من جوزها بتخليه يتعصب ويطلقها اكتر من مرة عشان تجيب محلل وتغير جو شوية، والازواج عارفين ده بس بيعدوها عشان اغلب جوازهم بيكون مصلحة..

واتجوزت انا وفاتن وقضينا شهر كامل مع بعض، اتعلقت بيا اوي وعشقتني حرفيا، عشقت كل حاجة فيا ومبقتش عايزة تسبني لحظة واحدة، وانا كمان اتعلقت بيها كتير، وقالتلي انها مش هتسبني وفيه صحبات ليها عايزين محلل وهترشحني ليهم بشرط ارجعلها من ورا جوزها كل شوية..

ومن قواد بقيت مُحلل، محلل بيروح كل شهر لست يقضي معاها فترة وياخد مبلغ، يمكن الفلوس كانت اقل كتير من لما كنت بسرح البنات، بس كنت واكل شارب نايم والدنيا حلوة جدا..

حاجة واحدة بس اللي مكانتش عاجباني، كان اغلب الستات بيطلبوا حاجات شاذة ومهينة للراجل في العلاقة، وانا غصب عني عشان الفلوس كنت بوافق، وطالما محدش شايف حاجة فالدنيا معايا كويسة، ودايما كنت برجع لفاتن والدنيا زي الفل..

لحد ما في مرة كنت نايم عند فاتن من ورا جوزها وسابت موبايلها بالصدفة جمبي، مسكته بدون سبب ولقتها فاتحة موقع اباحي..

وشوفت اكبر مصيبة ممكن اشوفها في حياتي، فيديوهات كلها ليا ولرجالة تانيين، الستات وشهم مموه مش ظاهر انما انا وشي ظاهر، انا متصور مع كل ست روحتلها، والفيديوهات جايبة مشاهدات كتير اوي اوي لانها فيديوهات فيها افعال شاذة..

وتقريبا كان الموقع بتاعها لأني شوفت كلمة مسؤول على الموقع من فوق، وقتها حسيت بصدمة ما بعدها صدمة، واجهتها باللي شوفته لقتها بتتكلم بإسلوب مختلف تماما، وقالتلي اني كدا كدا قواد، وطالما الموضوع عادي يبقا كلنا نكسب، وعرفت انها عملت اللعبة دي كلها مع البنت اللي كانت شغالة معايا، عشان يستدرجوني وانا اللي اقع بين ايديهم، اتصور، واجبلهم مشاهدات وارباح من المواقع وباخد منهم ملاليم..

وكل ست روحتلها هي مش زوجة، دي شغالة معاهم، وجوزها اللي قابلني معاهم هو كمان، ثورت، وتخيلت لما الفيديوهات دي توصل للناس في المنطقة هيبقا وضعي ايه، وبدون وعي مني قتلتها، قتلتها وكسرت دماغها لحد ما جسمي اتغرق بدمها..

ونزلت اجري وانا في حالة صدمة عصبية عشان الكاميرات تصورني وبعد يومين بس الحكومة تمسكني واعترف بكل حاجة بالتفصيل، وشوفت وقتها الموت قدام عنيا..

كل خطوة كنت بتنازل فيها عن رجولتي كنت بروح ناحية الموت وانا مش واخد بالي، المخدرات بتنقص من الرجولة فوق ما تتخيل، وبعدها خيانة وزنا خدوا من رجولتي اكتر واكتر، وبعدها قواد واتنازلت عن كل حاجة، وبعدها مُحلل وواحد متصورله فيديوهات ع موقع اباحي، وقتها بس عرفت ان ابواب المعاصي لما تتفتح قدامك بالسهولة دي والدنيا تبقا حلوة يبقا لازم تيقن وقتها انك رايح ناحية هلاكك، وان الرجولة فعلا شيء مش هين، الراجل اللي يحارب شهواته، وعقله، ويبعد عن المخدرات والحرام والعلاقات الحرام ده اللي يستحق يعيش ويتقال عنه راجل، أما انا فاستحق الجحيم.. 

بقلم: أحمد محمود شرقاوي

...............

"رجال لا تلهيهم تجارة ولا بيع عن ذِكر الله"

.................

لو عندك أي حكاية غريبة أو مخيفة حصلت معاك أو مع حد تعرفه وعاوزني أكتب عنها في قصة بكرة كل اللي عليك إنك تبعتلي على الخاص كل اللي تعرفه عن الحكاية أو الموقف المخيف ده بدون استئذان وتأكد اني هشوف رسالتك بأمر الله..

.........

متنساش لو عجبتك القصة تعمل لاف وتعليق برأيك في كومنت..

ومتنساش تمنشن أقرب صديق لك عشان يتابع معانا القصة أو تشاركها مع أصحابك..

وفولو لصفحتي الشخصية لو أول مرة تتابعني عشان يوصلك كل جديد.. 

بقلم: أحمد محمود شرقاوي

................

تعديل المقال