روايه قرية الجحيم كامله بقلم محمود الامين
روايه قرية الجحيم الفصل الاول بقلم محمود الامين
القصة تمت اضافة احداث ليها عشان تتناسب كقصة للقراية وانا جبت معلومات مؤكدة عنها وان شاء الله تعجبكم
وهتلاقوا في فيديوهات بيتكلم عن موضوع القرية دي وكمان برنامج صبايا الخير للاعلامية ريهام سعيد راحوا القرية دي وسجلوا مع الناس
يعني القصة المرة دي موثقة بحقايق
......
انا سائر.. أنا من أملك المعرفة في عالم المردة والشياطين
أحذر كل من يقترب من عالمي ستنقطع أوصاله وسيذهب إلي الجحيم
...
عواد قال أنا حذرتكم كتير.. اللي هنعمله ده هيلعنا كلنا انتوا متعرفوش اي اللي موجود هنا؟
واحنا واقفين.. لاقينا عقارب كتير خارجة من تحت الارض شكلها كان غريب جداً
توفيق جري أول ما شافها.. أما العقارب فهجمت عليا انا وعواد
أنا فضلت تلسع في رجليا وده اتسبب في بترها
لكن عواد العقارب هجمت علي رقبته اللي انفجرت من كل حتة والدم ملي المكان في لحظة.. ومن يومها وقريتنا بقيت قرية الجحيم.
....
قرية الجحيم
الجزء الاول
أسمي يوسف عبد النعيم.. صحفي وبحب المجال بتاعي جداً، عندي 30 سنة خاطب وعلى وش جواز
عايش لوحدي والدي ووالدتي متوفيين من زمان ومليش اخوات
البداية كانت مع يوم عادي جداً في الجريدة
وانا متعود اني بتابع برنامج الاعلامية ريهام سعيد
فتحت التليفزيون عشان أشوف حلقة النهاردة
لقيت حلقة عن قرية بتحصل فيها حرايق كتير وناس بتموت وناس بتطفش
والاستاذة ريهام سعيد كانت بتلتقي بالناس وتسألهم اللي عايشين هناك
وكانوا بيحكوا ان عفشهم بيولع وبيتحرق من غير سبب؟!
وحتي لما خرجوا العفش بره.. برضو بيتحرق
لكن الادهي من كده هي ظهور عقارب شكلها غريب بتطلع من تحت الارض
..
الموضوع كان غريب فعلاً.. ووقف لحد كده محدش عارف حصل اي تاني؟ ولا السبب اي؟
وعلى بليل الموضوع كان علي قناة يوتيوب شهيرة
حسيت بشغف وفضول اني اعرف سر القرية دي
واللي عرفت انها قرية صغيرة اسمها برسيم في محافظة قنا
..
تاني يوم دخلت لمديري المباشر وبلغته بقصة القرية واني عاوز اروح هناك واعرف اي اللي حصل
والمدير كان متحمس جداً وقلي ربنا يوفقك وشوف انت محتاج اي
اخدت مبلغ مش كبير واستعديت عشان اروح للتحقيق الصحفي اللي هيرفعني لفوق
اخدت معايا كل حاجه هحتاجها اقلام ونوتة وتليفوني طبعاً اللي هسجل عليه كل حاجة هسمعها
وتاني يوم كنت في القطر المتجه لقنا عشان ابدأ اول تحدي ليا.. بدون الدخول في تفاصيل مش مهمة من سكة سفر طويلة وصلت قنا.. وروحت موقف العربيات وسألت علي القرية.. وعرفت انها ساعة بالعربية لحد هناك
وفعلا بعد ساعة كنت واقف قدام قرية كبيرة في المساحة فيها بيوت كتير.. وورا البيوت دي أرض زراعية كبيرة
دخلت القرية اللي كانت معظم بيوتها باين عليها اثار الحرق.. الناس وشوشها واضح عليها الحزن والبؤس وكل واحد مشغول في اكل عيشه.. بس كل الناس بدأت تسيب اللي في ايديها وتتلفتلي وكأن حال لسانهم.. أنت مين؟
..
وفعلا بدأت ناس منهم تسألني.. قولتلهم اني صحفي وجاي اعرف اللي حصل
وكان رد واحد منهم
_ وحضرتك بقا تبع التليفزيون ولا تبع مين اه ما احنا خلاص بقينا لعبة ومحدش مقدر المصيبة اللي احنا فيها
وبعد نقاش وجدال.. لقيت واحد بيقول يا استاذ ممكن تروح لعم حسين.. ده شغال تبع المدافن وهو عارف كل حاجة
ودلني علي بيته
اتمشيت شوية كان بيت في اخر البلد عليه اثار حرق.. خبطت وفتحتلي بنت صغيرة وسالتها
بابا موجود يا حبييتي
هزت راسها انه موجود.. ودخلت البيت وشوفت حاجة صعبة جداً.. حسين ده كان علي السرير ورجليه الاتنين مقطوعين.. منظر صعب جداً
..
اتكلم وقال
_ اتفضل يا أستاذ.. خير حضرتك مين؟
_ انا اسمي يوسف انا جاي اعرف منك اي اللي حصل بالظبط وليه رجليك مقطوعين وليه التليفزيون مسجلش معاك؟
_ هحكيلك كل حاجة بس هتدفع كام.. متأخذنيش يبني انت شايف الحال بقا عامل ازاي دلوقتي انا بقيت عاجز مش عارف اصرف علي مراتي وبنتي
_ احكي وهديلك مبلغ كويس
...
أنا سمعت من عم حسين وهحكيلكم علي لسانه.. أنا اسمي حسين.. انا التربي بتاع البلد دي
قبل اي حاجة الناس هي اللي منعت التليفزيون يصور معايا.. وانا رجليا اتقطعت بسبب العقارب عشيرة العقارب
هحكي كل حاجة دلوقتي
أحنا قرية كبيرة وكل واحد بيصحي يجري علي أكل عيشه.. البداية كانت مع توفيق الجارحي واحد كان عايش بره هو وعيلته وكان ليهم بيت في البلد عندنا
رجع توفيق وفتح البيت.. ولمدة 3 شهور كان يعتبر مش بيخرج
لحد ما في يوم جيه لتوفيق ضيف أسمه عواد كان راجل من لهجته مش مصري.. وبعد ساعة من دخوله عند توفيق
لقيت توفيق جيلي البيت وبيطلب مني اجبله عمال حفر ضروري وانه هيراضينا بمبلغ كبير
من غير ما أسأله وافقت اه وافقت هرفض ليه حد يقول للرزق لأ
...
اخدت 6 عمال وانا السابع وروحنا علي بيت توفيق دخلنا ولقيناه هو والراجل اللي اسمه عواد
واتكلم توفيق وقال
_ أنا عاوز حفرة بعمق 6 متر ومعاكم أسبوع
_ ليه العمق ده كله؟!
_ مش شغلك أنت تنفذ وبس وليك فلوسك وبس
_ اهم حاجة لو حد سألكم بره انتوا بتكسروا حطيان وبس فاهمين
..
وبدأنا الشغل مجهود جبار كنا بنعمله.. اللي مطلوب مننا عمق كبير ومش سهل نخلصه بسرعة
أول يوم فات عادي.. ورجعت البيت رميت جسمي علي السرير ونمت
لما فتحت عينيا لقيت نفسي واقف في مكان غريب أشبه بمعبد وقدامي تابوت كبير.. مكتوب عليه من بره حروف وطلاسم كتير
مديت ايدي وفتحت التابوت.. جثة اشبه بالمومياء
شكلها من الآف السنين وانا واقف ببصلها فتحت عينيها.. وخرج من بوقها عقرب.. عقرب بشع
صحيت وانا بصرخ.. مش عارف اي معني الكابوس ده؟
تاني يوم واحنا شغالين واحد من العمال اسمه كريم قتل حشرة.. حشرة كبيرة اشبه بعقرب
نفس اللي شوفتها في الحلم.. خلصنا شغل في اليوم ده ولسه هغير هدومي وانام.. سمعت صراخ من بره البيت.. طلعت من البيت جري عشان اللاقي جثة كريم في بيته مقطوعين ايديه ورجليه وميت منظر صعب جداً مش قادر اتحمله.. خرجت من البيت وبمجرد ما خرجت.. نار مسكت في البيت كله الكل كان بيحاول يسيطر علي الحريق.. لكن مقدرناش
..
معرفش ليه حسيت ان السبب هو العقرب اللي كان قتله جوه
روحت لتوفيق وقولتله انه لازم يقول الحقيقه ومين السبب في موت كريم؟.. يتبع الجزء التاني
..
الجزء الثاني من قصة قرية الجحيم
..
محمود الأمين
الجزء الثاني
↚
_يعني اي كريم مات أزاي؟ وانا مالي أصلا انت جاي تتهمني بقتله؟
_ لا مش بتهمك بقتله.. بس الحفرة دي هي السبب في قتل كريم.. العقرب اللي قتله كريم هو اللي اتسبب في قتله
_ اي التخاريف دي يا جدع انت عقرب اي وكلام فاضي اي بس انت بتصدق في الكلام ده؟
_ خلاص أنت مش عايز تتكلم انا هبلغ الحكومة
_ أستني بس طيب وانا هفهمك بس اهدي.. عواد اللي انت شوفته معايا ده راجل مخاوي جن وقلي ان تحت بيتي في اثار بس في راصد ولازم يتفك الرصد
ولما تتفتح انا هراضيك بمبلغ هيغير حياتك
_ انا موافق بس بشرط
_ شرط اي؟
_ تضمنلي ان محدش هيتأذي تاني من العمال
_ اوعدك ان محدش هيضر تاني
..
صدقته تقدروا تقولوا من طمعي او من هبلي.. وروحنا الصبح أنا والعمال عشان نكمل الشغل، لاحظت ان عواد واقف ومش علي بعضه.. سألته
_ مالك يا عم عواد في اي؟
..
مردش عليا كان مبرق وبيردد كلام مش قادر اسمعه عشان صوته كان واطي جداً.. لحد ما فجأة اتكلم وقال ودي كنت أول مرة اسمعه بيتكلم مصري
_ وقفوا الحفر ده.. وقف الحفر يا توفيق
_ نوقف اي انت اتجننت؟
_ بقولك وقف اللي تحت ده راصد من أقوي انواع الجن.. والمقبرة فيها طلاسم لو طلعت للنور البلد دي هتتحرق
_ بقولك اي الناس هتكمل شغل.. انا مش هتنازل عن الدهب اللي تحت
_ يا غبي افهم.. اللي تحت ده مش اي حد ده.. ده سائر
...
في الوقت ده الناس كانت وقفت حفر وبصت للحوار اللي داير بين توفيق وعواد.. دهب اي وجن اي وراصد اي؟
اتكلم توفيق وقال
_ وقفتوا ليه؟ اشتغلوا وانت بطل الكلام ده بلا سائر بلا قرف
..
وكأن توفيق فتح علينا ابواب الجحيم.. الانوار بدأت تترعش بعنف.. وصرخات طالعة من تحت الارض تخلع القلب من مكانه
لكن المخيف هو منظر توفيق.. وشه اللي كأنه اتسحب منه الدم.. ومنظره وهو ماسك قلبه وبيصرخ وبيوقع علي الأرض وبتخرج منه رغاوي بيضة
العمال خافت وجريت علي الباب عشان تهرب لكن الباب كان مقفول ومكلبش.. الرعب والزعر سيطر علينا كلنا
عواد فضل يصرخ ويقول سامحوه.. سامحوه جاهل ميعرفش.. وبدا يقول من تاني كلام غريب
بعدها الوضع بدأ يهدي تدريجي.. وبدأ توفيق يرجع لحالته الطبيعية
ورغم كده مغيرش رأيه.. وطلب من الناس تكمل وانه هيديهم اضعاف اللي كانوا هياخدوه
..
وفعلا بدأنا نكمل.. وبعد أسبوع وصلنا لسلم طويل بينتهي ببوابة.. البوابة كان شكلها غريب
عبارة عن باب عليه نقوش غريبة والمقبض كان جمجمة بني ادم.. في الوقت ده توفيق ادي العمال فلوس كتير وقالهم اتكلوا علي الله
عواد قال
_ حد يثبت الكشاف ده عشان انزل اترجم النقوش دي.. وبعد شويه طلع وقال
النقوش بتقول كلام ميطمنش
بتقول.. انا سائر.. أنا من أملك المعرفة في عالم المردة والشياطين
أحذر كل من يقترب من عالمي ستنقطع أوصاله وسيذهب إلي الجحيم
...
عواد قال أنا حذرتكم كتير.. اللي هنعمله ده هيلعنا كلنا انتوا متعرفوش اي اللي موجود هنا؟
واحنا واقفين.. لاقينا عقارب كتير خارجة من تحت الارض شكلها كان غريب جداً
توفيق جري أول ما شافها.. أما العقارب فهجمت عليا انا وعواد
أنا فضلت تلسع في رجليا وده اتسبب في بترها
لكن عواد العقارب هجمت علي رقبته اللي انفجرت من كل حتة والدم ملي المكان في لحظة
...
المنظر صعب.. جثة عواد على الأرض رقبته اتفصلت عن جسمه والدم غرق الارض.. وانا على الأرض رجليا الاتنين فيهم ألم لا يحتمل وبيني وبين الموت خطوة.. أما توفيق فطلع يجري من البيت والعقارب رجعت للحفرة من تاني
احساس بين أني بموت وبغيب عن الوعي.. فوقت معرفش بعد قد اي
لقيت نفسي في المستشفى ورجليا مقطوعين ومحدش كان فاهم حاجه.. لكن المفاجأة انه مكنش في اي جثث جنبي.. جثة عواد اختفت.
...
لحد اللي حكيته ده.. ده كان انتقام الجن مننا.. لكن لسه الحكاية مخلصتش
توفيق جالي المستشفى وقلي
_ انا لازم الاقي حل للموضوع ده.. انا مش هسيب ملايين تحت رجلي وانا مش عارف اطولها
_ أنا مليش دعوه بالموضوع ده تانى ومش عايز حاجه
_ وانا اي يضمنلي انك مش هتتكلم مع حد ولا تبلغ عني؟
_ والله ما هتكلم ومليش دعوة بالموضوع ده تاني
_ عموما لو اتكلمت.. حياة بنتك هتكون التمن
..
سكت.. سكت عشان خاطر بنتي.. وبعد اسبوع رجعت البيت بقيت عاجز مش عارف هصرف علي البيت ازاي؟
لكن حصلت حاجة غريبة.. توفيق جالي البيت في زيارة وكان معاه واحد من هيئته شيخ
وقلي
_ الظاهر انك بقيت ركن اساسي في فتح المقبرة.. لازم تحضر فك الرصد
_ ليه؟
_ دي طلبات الاسياد اي هنرفض
..
للمرة التانية بخاف علي بنتي.. وقررت اروح معاهم كانوا جايبلي كرسي بعجل
ووصلنا من تاني قدام الحفرة.. وتوفيق قال
_ الشيخ مصطفى متمكن وهيعرف يفك الرصد مش كده يا شيخنا؟
_ اه طبعاً بإذن الله
..
يا سلام علي الايمان والتقوي.. هو ولا شيخ ولا حاجة يا جماعة.. دجال زيه زي اي حد بيتاجر باسم الدين
وبدأ يقول
( اقسمت عليك يا سائر أنت واعوانك ان تنصرفوا الان وان تتركوا لنا الامر.. بحق عهد الدم الذي بيني وبينكم ان يخرج مطيعا سالما دون اذي والا كان الاذي منه ومن عشيرته)
ق. د. م حروف مقدسة لكل من خالف عهدنا تنزل عليه شازيا من نار السموم
..
صرخات ضربت الارض... شوفت ظلال كتير بتخرج من الحيطان وبتلف حوالينا.. وده ممنعنيش ان اسمع صوت صرخات الناس.. اهل القرية اللى كانوا بيصرخوا وكأن حد بيقطع في لحمهم
ونار.. نار خرجت من الحفرة ومعاها العقارب اللي هجمت على الشيخ مصطفي وعلي رقيته تحديدا وانفجرت نافورة دم من رقبته.. وتوفيق المرة دي ملحقش نفسه عشان العقارب اتلمت عليه ووقع في الارض واتسحب من العقارب للحفرة وكانهم كلاب مفترسة.. شوفت جثة توفيق بتتحرق قدام عينيا
وفي الوقت ده باب البيت اتفتح بعنف واهل القرية داخلين عليا ومن فتحة الباب شوفت اللي مكنتش اتوقع اني اشوفه في يوم... شوفت..
يتبع الجزء الثالث
...
الجزء الثالث من قصة قرية الجحيم
...
محمود الأمين
الجزء الثالث والاخير
↚
شوفت الجحيم بعيني.. بيوت القرية كلها كانت ماسكة فيها النار كانت كلها بتتحرق.. الناس مكنتش عارفه تخرجني من البيت ولا تقتلني.. خروجني وهما نازلين فيا شتيمة وتلطيش.. حقهم ايوة حقهم مش هلومهم
ومن يومها والبيوت بتتحرق كل يوم بتشب فيها النار من غير سبب.. تبقي قاعد وفجأة تلاقي المرتبة بتاعت السرير بتولع ولا دولاب هدومك بيولع لوحده والخشب والسراير.. الناس اترعبت من اللي جاي والايام الصعبة اللي عايشنها
بلغوا الشرطة والموضوع كبر ووصل التليفزيون وقولنا بس الموضوع هيتحل.. بس محصلش حاجة جات الاعلامية المشهورة ريهام سعيد وصورت الوضع والتقت بالناس المتضررة ولكن الناس مجبتش سيرتي معرفش ليه؟!
...
واحد من الناس المحترمة في البلد اسمه حسان قال يعمل محاولة كده.. شغل التليفزيون علي قناة المجد.. تعرفوا حصل اي.. الفيشة انفجرت
الناس مكنتش عارفه تعمل اي؟
قررت تطلع عفشها بره البيت وتبات في الشارع لو هو ده الحل.. بس حتي الحل ده منفعش
العفش كان بيولع في الشارع برضو
لكن الحاجة الصعبة اللي محدش كان لاقي ليها تفسير بجد.. الرملة.. ايوة الرملة كانت الناس تعبي رملة عشان تطفي بيوتها تلاقي الرملة فيها عقارب
وفي اللي كان بيحاول يكمل.. يأما كان بيموت او بيتقطع جزء من جسمه
..
الوضع بقا صعب جداً.. اترميت في البيت طبعاً خلاص بقيت عاجز بسبب اللي حصلي.. مراتي كانت بتخرج تشحت اللقمة من الناس في اللي كان بيعطف عليها وفي اللي كان بيقولها انا مش هساعدكم انتوا السبب في كل حاجه بتحصل منكم لله
..
خلص عم حسين كلامه وانا وقفت تسجيل.. مذهول من الحكاية اللي اشبه بافلام الرعب وقولتله
_ هو ده حصل بجد؟
_ اه طبعاً بجد وانت لو استنيت شويه هتشوف
هو في الحقيقة ملحقش يكمل الكلمة.. وسمعت صوت صراخ رهيب جاي من بره.. جريت فتحت الباب وشوفت الجحيم حرفيا.. الناس بتجري في كل مكان والستات بتصرخ زي المجانين
3 بيوت مولعة فيها النار.. المنظر صعب اوى يا جماعة
ولقيت واحدة بتصرخ وبتقول.. ابني جوه ابني جوه البيت هيموت.. ابني هيموووت
من غير تفكير جريت علي البيت ودخلت.. النار ماسكة في كل حاجه حرفيا
وتحس انها نار مش زي النار اللي نعرفها.. وفجأة لمحته.. ايوة عقرب من العقارب
بس ده لا يمكن يكون عقرب شكله غريب جداً
شلت الولد بسرعة وخرجت بيه بره البيت
وروحت وصلته لوالدته
فضلت تشكر فيا وتدعيلي
ومشيت من البلد دي وقررت ارجع للجريدة من تاني
لكن
واضح ان روحتي هناك كانت غلط رغم اني حاولت اساعدهم.. لكن مكنتش متخيل اني هعيش المعاناة اللي هحكي عنها دلوقتي
..
ركبت القطر.. كنت مرهق جداً وعاوز أنام ونمت
وشوفت كابوس وحش جداً.. شوفت نفسي واقف في البيت اللي حكالي عنه حسين.. قدام الحفرة اللي بتوصل للمقبرة
فضلت واقف عشر دقايق مش فاهم أنا بعمل اي هنا
لكن فجاة ظهر قدامي مخلوق جسمه كله من النار وقلي
( لقد حرمت احد ابناء عشيرتي من الانتقام.. سنعذب روحك حتي الهلاك)
وشوفت العقارب خارجة تجري عليا من كل مكان وهجمت عليا.. ألم صعب مش قادر اتحمله
صحيت علي صوت الناس في القطر وهي بتحاول تفوقني وبتقولي مالك يا استاذ في اي؟
...
مكنتش عارف ارد عليهم اقولهم اي؟
نزلت من القطر وروحت علي البيت.. في دماغي مليون حاجه.. بس اهم حاجة انا عايز اساعد الناس دي
روحت الجريدة وسلمت كل حاجه عشان تتنشر تحت مسمي قرية الجحيم بالصعيد
مقدرش اقولكم التحقيق كسر الدنيا ازاي!
وبعد اسبوع روحت للشيخ فاتح.. ده كان صديق والدي واعرفه من زمان
وحكتله كل حاجة عن القرية.. فرد عليا وقال
..
_ العشيرة دي من اخطر العشائر في عالم الجن.. عشيرة بتتشكل في شكل عقرب غريب الشكل.. من صفاتها الانتقام والخراب وسفك الدماء
لما هما حضروه كان ممكن يرتضي لكن موت ابنه علي ايد العامل والطلسم اللي قراه الدجال الكافر ده هو السبب
انت عارف ان الطلسم ده هو اللي اتسبب في الحرايق والمصايب دي
_ طيب والحل يا مولانا؟
_ مفيش غير ترضية.. لازم يبني ترضية.. أنا هاجي معاك بكرة البلد دي.. لازم المشكلة دي تتحل
..
أنا رغم اني كنت خايف ارجع البلد دي تاني لكن وافقت.. انا وعدت الناس اني هحاول اساعدهم وانا لازم اكون قد الوعد ده.
تاني يوم كنا في القطر انا والشيخ في طريقنا للقرية من تاني.. وصلنا القرية كانت حوالي الساعة 10 الصبح
شكل القرية متغيرش بل بالعكس.. ده زاد سوء
الشيخ كان واقف مذهول من منظر البيوت والبؤس اللي علي الوشوش.. واتكلم وقال
_ كتر خيرهم انهم لسه عايشين.. غيرهم كان موت نفسه بسبب العذاب ده.. هو البيت فين؟
...
اخدت الشيخ من ايده علي البيت.. الناس شافته داخل البيت وكأنهم شافوا شيطان كلهم اتجمعوا ناحية البيت.. عاوزين يشوفوا هيعمل اي؟
الشيخ قلي خليك انت كمان بره.. أنا عاوز اكون وحدي.. طلعت بره عشان اواجه الناس دي كلها واواجه ردود افعالهم
محدش اتكلم معايا الحقيقة
وسمعنا الشيخ بيقول
اعوذ بالله السميع العليم من الشيطان الرجيم... اعوذ بالله من همزات الشياطين واعوذ بك ربي ان يحضرون
قولي عاوز منهم اي.. اتكلم اي المطلوب عشان تنصرف.. انت ضعيف واحنا مش خايفين منك
انصرف بأمر الله
..
نص ساعة والشيخ بيحاول معاه وفي الاخر خرج وللاسف قال
_ الجن طلب بنت حسين ترضية.. بس اوعي تسلموا البنت انا هاجي تاني وهحرقه اوعوا حد يتصرف من دماغه.. أنا جاي الاسبوع الجاي ولحد الاسبوع الجاي مفيش حاجه تاني هتحصل بعون الله
....
الشيخ للأسف غلط انه قال لناس الجهل والبؤس اتحكم فيهم عشان بعد ما رجعنا القاهرة بيوم واحد قرينا خبر في الجرايد عن اهل القرية اللي في الصعيد اللي سلموا بنت صغيره قربان للجن بعد قتل ابوها وامها
أنا ندمان اني رحت القرية وندمان اني حاولت اساعد وحتي الان عذب وضميري مش بينيمني.
..
تمت
...
محمود الأمين