القائمة الرئيسية

الصفحات

أخبار القصص

يكفينى من حظوظ الدنيا أنك لى



يكفينى  من حظوظ   الدنيا  أنك لى

- الزبون مستنيكى برا. ....القصه  كامله  

- انا تعبانه النهارده. 

-  ضربنى بالقلم،  مفيش حاجه اسمها تعبانه دى هنا فاهمه! 

-  اتكلمت بخوف،  حا...  ،  حاضر طالعه اهو. 

-  التفت الاقيكى ورايا مفهوم؟ 

-  هزيت رأسى،  مفهوم مفهوم. 


طلع وانا وقعت ع الارض  لان رجلى مبقتش شيلانى من الخوف  ،   كنت ببلع ريقى بصعوبه كبيره  ،  بدأت اعرق وجسمى يبرد،  بس مفيش دموع،  مش عارفه اعيط!. 

كنت لسه باخد نفسى سمعت صوته  اتفزعت وقومت طلعت وراه.


-   افردى وشك!

-  حاولت ابتسم ففشلت  ، بص ليا بغضب، فإبتسمت.


فضلنا ماشيين وسط ناس غريبه  ، ناس عمرى ما كنت اتوقع انهم عايشين في الدنيا دى، كنت مفكره انهم  بيتنقلوا لينا عن طريق الافلام والروايات عمرى ما كنت اتوقع انى هكون في المكان دا   ولا وسط الناس  دى في يوم من الايام.


-  هيا دى اللى قولتلك عليها يا باشا، مفيش احلى من كدا ولا إيه؟

-  تسلم دماغك  ، هوا دا الصنف اللى يعجبنى بدأت تنضف دماغك وتمشى ع مزاجى.

-  احنا دايما تحت امر مزاجك يا باشا.

-  وعشان فهمتنى خد دول مش خساره فيك.


كنت واقفه  وباصه للارض مش قادره ارفع عينى، كنت بضغط ع ايدى بضوافرى جامد   ، وبدأ ضغطى عليها يزيد لما شوفته اداله فلوس، انا كدا هتباع صح!، انا كدا هضيع انا ومستقبلى خلاص!


-  حاسبى ايدك! 

-  كنت بضغط ع ايدى بغل  وغضب كبير   ، وفوقت ع صوته ووقتها رفعت عينى وبصيت ليه لما  مسك ايدى وبعدهم عن بعض رجعت بصيت ليها تانى لقيتها  غرقانه دم.من كتر  ضغطى عليها، معقول محستش بكل دا، معقول يكونى وجعى من جوا كبير لدرجه انى مش حاسه بوجعنى الجسدى  ولا حاسه بيه حتى  ممكن!!


-  انتى كويسه؟، تعال الفلك ايدك.

-  شديت ايدى منه وحطيتها ورا ضهرى وسكت وهوا بص ليا.

-  ايه يا صاحبى انت هتخطفها منى ولا إيه؟

-  فضل باصص ليا وساكت.


كانوا  قاعدين بيتحاسبوا.وانا مغمضه عينى وبتمنى.اكون في حلم والسنه دى  تكون حلم ، اتمنى افوق والاقى نفسى ع سريرى وفي بيتى وكل دا ميكونش حصل،  اتمنى اعرف اعيط. وقلبى يرتاح.، اتمنى  .. اتمنى من كل قلبى.


-  كدا اتفقنا وكل واحد اخد فلوسه صح!.

-  اه كدا خلصانين  يباشا.

-  شوف واحده لصحبى زى الاموره العسوله دى.

-  وبدأ يقرب منى ومسك ايدى.وانا جسمى اتنفض  وحاولت اشيل ايدى بس هوا كان ضاغط عليها جامد وانا ببعد عنه  .

-  انا هاخدها.

-  بعد عنى ووقف.. نعم!!، انت باصصلى فيها ولا ايه صاحبى.

-  عيب عليك دا انا ضيفك وانا بطلبها منك معقول ترفض وتصغرنى قدامهم؟

-  بس هيا حلوه اوى.

-  وهتستخسرها فيا يعنى؟

-  سكت شويه وبصلى وبعدها اتكلم.. متغلاش عليك ياصاحبى.وزقنى عليه وضحكوا.


كنت حاسه انى زى  سلعه.وهما بيتخانقوا.عليها مكنتش حاسه انى بنت او بنى ادمه خالص!،   هه و زى ليه، ما انا سلعه فعلا وبقى اللى يسوى واللى ميسواش يشترى ويبيع فيا.

شدنى وقعدنى جمبه.وبعدها بشويه  دخلنى اوضه كانت غريبه كنت اتمنى مدخلهاش ابداا.،  كنت خايفه جسمى كله متلج.، اللحظه دى اتمنيت الموت  بجد مش مجرد كلمه او ذله لسان.اتمنيت اموت.قبل ما يقرب منى.


-  انتى خايفه منى؟

-  ضغطت ع طرف اللحاف جامد  وسكت.

-  متخافيش منى.

-  ضغطى  زاد  وكان قلبى بيدق جامد ونفسى زاد وبقى مسموع.

- اتكلم بغضب.. انتى مبترديش عليا ليه؟

-......

- هتتكلمى ولا اعمل حاجه متعجبكيش!

-.....

-  ماشى انتى اللى اختارتى.


مشى ناحيتى بسرعه  وقرب منى وانا غمضت عينى   ووقتها دمعت  ،  يااه اخيرا  دمعت وعينى حنت ع قلبى.ونزلت دموع عشان تهديه كنت نسيت ازاى الواحد بيعيط اصلا.، وكنت نسيته.، نسيته هوا!، هوا مقربش ليه؟، فتحت عيونى لقيته  باصص ليا  واول ما فتحت عينى وبصيت ليه بعد عنى  ، هوا بعد ليه!.


-  متعيطيش.

-  نعم؟

-   صرخ فيا..  بقولك متعيطيش. وامسحى دموعك. 

-  اتكلمت بإستهزاء..  قلبك رحيم.اوى.

-  رفع حاجبه  وهوا بيقرب منى.. بتقولى حاجه؟

-  هزيت راسى بنفى.. لا لا ابداا.

-  ابتسم ابتسامه خفيفه  ولما بصيتله.اختفت من ع وشه ورجع وشه المكشر تانى


 فضلنا قاعدين ساكتين.، هوا مبيتكلمش ليه!،  وليه طلب مخافش منه!، معقول يكون طيب!، بس لو هوا شخص طيب.، ايه يجيبه هنا!، ايه يجيبه ملهى ليلى.،  يجيبه مكان أشبه بالزباله زى دا  لو هوا شخص.طيب زى ما بفكر   !، حنان فوقى.محدش طيب متفكريش بسذاجه تانى  !


-  ايه اللى جابك هنا!

-  ودا يخصك في ايه؟

-  مبتعرفيش تجاوبى من غير اسئله او سكوت 

-  اتنهدت تنهيده طويله.. ظروف، جيت هنا بسبب ظروف اكبر منى ومن اى حد 

-  حد قرب منك؟

-  بصيتله بصدمه.وبرقت ليه، اييييه!!

-  هوا سؤالى مكنش واضح؟، حد قرب ليكى؟

- هزيت راسى بنفى.

-  كنت متأكد.

-  وايه اللى خلاك متأكد!!

-  شكلك،  وهيئتك وخوفك وكل حاجه.

-  بصيتله وسكت.

-   متخليش حد يقربلك خالص ماشى!  

-....

-  صرخ فيا.. قولى ماشى!

-  اتكلمت بتردد مصاحب بخوف.. ماشى.


وسابنى.ومشى!  هوا اهبل، لا بجد هوا اهبل؟، هوا مين دا واسمه ايه وسنه كام هوا كان جاى يعمل ايه ومشى في ايه، هوا عاقل!!  ، لا مستحيل يكون عاقل.

بس انا مش هثق فيه.ولا هسمع  كلامه.انا مستحيل اعيد الغلطه مرتين مستحيل.


بصيت حواليا وع الاوضه وع المكان اللى انا فيه اللى جيته هنا بسبب  غبائى  ،   وسذاجتى،   لسه فاكره يوم ما جيت هنا كأنه امبارح بيئه غريبه ومقرفه.ومرعبه لبنت  لسه هتم  ١٨.سنه  ،  كنت محتاجه الفلوس عشان تعب ماما  ،   مكنش حد راضى.يساعدنى.وكل ما اروح مكان عشان اشتغل فيه  يقولوا عليا انى عيله، مجرد عيله في تالته ثانوى هيشغلوها يعملوا بيها ايه، ومحدش فكر العيله دى نزلت الشارع وقررت تشتغل عشان ايه او محتاجه الفلوس دى ليه، كنت مروحه بعد يوم متعب وانا بدور ع شغل وانا قايله لامى انى في الدروس  ،  وانا باخد فلوس الدروس اجيب ليها ادويه بيهم..


كنت ماشيه وانا بردد، العالم قاسى، العالم ميتعاش  فيه، العالم.مؤذى، العالم بيقتل براءه وفطره الانسان، العالم مهلك لكل حاجه حلوه جوانا.، العالم ميتعاشش فيه.


لما قابلته.ووقفنى.


-  بتدورى ع شغل؟

-  التفت للصوت بفرحه.وهزيت رأسى.وانا مش قادره ارد من الفرحه.. ايوه ايوه  ، انت عندك شغل، مهما كان الشغل انا هشتغله مهما كان المهم تدينى فلوس.


-  رفع حاجبه..مهما كان؟

-  اه اه.مهماا  كان.


كان كلامى مندفع وغبى، كنت طفله بتتكلم، امى عمرها ما عرفتنى ع الحياه معرفتنيش ان فيه عالم قاسى غير الوردى الىى بانته جوايا وجوا عيونى  .


-  مش الفلوس دى كتير هوا انا هشتغل ايه؟

-  امضى بس ع الورق دا  وهقولك هتشتغلى ايه؟

-  سحبت ايدى لا قولى الاول.

- دى وظيفه عايزه ناس خريجه ثانويه.عشان انتو لما بتخصلوا بتشتغلوا علطول واحنا قولنا نديكوا فلوس.عشان  تكملوا دراسه واهو بالمره  نكون ضمناكم.

-  بجد انتو طيبين.

-  اه شوفتى بقى امضى يلا.


مضيت.واثبت سذاجتى.للمره... معرفش للمره الكام حقيقى.


الكلام كان صعب انه يتصدق وميدخلش في عقل صغير بس دخل في عقلى او انا اللى كنت عايزاه يدخل في عقلى وعايزه اصدقه وهوا ميتصدقش اصلا  ، بس كنت عايزه اصدقه، عشانها وعشان اعملها العمليه ب اى تمن.

واخدت الفلوس وحددت العمليه من غير ما تعرف ولما عرفت قولتلها انها مجانيه  واقنعتها.،  معرفش ليه مقولتلهاش الحقيقه، يمكن لانى كنت فاهمه ان اللى بعمله غلط بس بكابر.


كنت رايحه جايه وخايفه اوى.،  الدكتور طلع من العمليات  جريت عليه.

-  خير يا دكتور، العمليه  نجحت  ، هتبقى كويسه بعد ايه طيب، انت مبتردش ليه، دكتور؟

-  البقاء لله 


وقتها وقعت ع الارض ومحستش بنفسى.،  حسيت ان الدنيا ضلمت، كانت ضلمه كدا لما بابا سابنى.وانا صغيره، واتملت نور بيها.، ولما مشيت رجعت ضلمت تانى.،  هيا مشيت ليه  ، سابتنى لمين.طيب!، بقالى ست شهور مبروحش دروس  ولا حتى قادره استوعب اللى حصل   ، ولا فيه حد بيسال عليا كأنى مت بعد موت امى!


 كنت قاعده بكلمها  وحاضنه هدومها وبعيط.لما جرس الباب رن، روحت وفتحت الباب.


-  انت!!!


 ووقتها محستش بنفسى غير وانا هنا، واكتشفت انى مضيت ع حاجات غريبه  شيكات ع بياض،  وقروض بالهبل.،  وكمان حاجات تودينى ورا الشمس  وانا اصلا كل علاقتى بيها انها بتدفى ايدى لما تبرد!، دخلت عالم مش شبهى ولا عمرى سمعت عنه، لقيت بنات لابسه لبس غريب  وبتضحك ضحكه غريبه وفيه ولاد.وبنات قاعدين مع بعض عادى، جسمى اترعش   من المنظر  ،  ازاى فيه عالم زى دا معانا كدا!    ،  ومن يومها  وانا بحاول استوعب اللى بيحصلى!، بحاول استوعب.انى هنا في المكان دا، ومش قادره للاسف، مش قادره.


رجعت اوضتى تانى.وانا مقرره انى مش هثق فيه ولا هعيد نفس الغلطه   عدا  أسبوع ومحدش كان بيخبط ع اوضتى حتى!، بعد ما كان كل خمس دقايق البنى ادم التخين ابو صوت شاذ دا يجى ويقولى  كلام يسم البدن  ، بس مبقتش اشوفه  ، ياترى ايه اللى حصل؟


فوقت من شرودى ع صوت بنت منهم.


-  عملتى فيه ايه؟

-  نعم!

-  عملتى  فيه ايه وخلتيه يقع فيكى  لدرجه ان مش عايز حد ياخدك منه.

-  هوا مين دا؟

-  الشاب اللى كان هنا، هوا فيه غيره اختارك!!

 افتكرته وافتكرت كلامه  وافتكرت ان فعلا مفيش حد كان بيختارنى وكنت بحمد ربنا كل مره انى مبعجبهومش.

-  معملتش  حاجه.

-  غمزتلى.  يابت!!، عليا انا  بردو، انا عارفه الحركات دى كويس اوى.

-  حركات ايه انا معملتش حاجه بجد!

-  دا انتى طلعتى مش سهله.

-    رفعت صابعى..  حضرتك ايه مش سهله دى!!

-  ضحكت ضحكه غريبه.. حضرتى!!، هه حضرتى قال.

-  انا.....


قطعنا دخوله  ، يارب انا مكنتش شوفته من زمان ايه جابه بس.


-  يلا عشان البيه عايزك برا!

-  اتنهدت بتعب.. بيه مين؟

-  زقنى.. انتى لسه هتستفسرى  اطلعى وانتى ساكته.


طلعت وكان هوا اول ما شافنى وقف.وكان معاه فلوس كتير.استغربت من منظرها وبلعت ريقى وبعدين بصيت ليه تانى.


-  كدا خالصين صح!

-  انا مكنتش اعرف انها علقت معاك كدا لدرجه انك عايزها علطول.

-  ياعم ميخصكش   المهم اخدت فلوسك.

-  اه ودا الورق  بتاعها.


كنت واقفه ومش فاهمه حاجه وخلانى امضى ع ورق وبعدها مسك ايدى وطلعنى برا  وركبنى عربيه.ونزلنا قدام عماره ودخلنى شقه، هوا جايبنى هنا ليه، هوا اشترانى؟، هيخلينى جاريه ليه!، هه مش قولتلك مفيش حد طيب!


-  إدخلى.غيرى هدومك بدل ما إنتى قاعده كدا.

-  مسكت هدومى.. لا مش هغير حاجه انا مرتاحه كدا.

-  ماشى براحتك.


ومشى  ، هوا مشى بجد، هوا مشى ليه الشخص دا!!،  هوا سمع كلامى ليه؟


-  خدى اشربى المايه  دى.

-  بصيتلها بشك... لا شكرا.

-  شرب بوء منها.. مفيهاش حاجه  اشربيها.

-  انتى طلعتنى من هناك ازاى؟

-   اتكلم وهوا بيلعب في الموبايل  ، اتجوزتك.

-  نعم!!!  ،  انت بتهزر صح؟

- وباين عليا انى بهزر مثلا؟

-  رميت الكوبايه.. كنت مفكراك انك غيرهم بس طلعت زيهم، كلكم زى بعض مفيش فرق كلكم زى بعض.

-  ع اساس انك مختلفه عننا!!.

-  قولتلك انه غصب عنى مش بمزاجى  ، وبسبب الظروف.

-  غصب عنك وانتى واخده الفلوس دى كلها، قولى انك مأخدتيهاش  قولى!

-  ......

-  مالك ساكته ليه يا ست اللى غصب عنك؟

-  لما انت شايفنى وحشه كدا ليه  طلعتنى من هناك واتجوزتنى!

-  فيه أكل عندك في التلاجه.، وكمان  فيه لبس  طويل في اوضتك   و..... 

-  انت مبتردش عليا ليه!! 

- ولو عوزتى حاجه.ممكن تتصلى عليا وانا هجيبهالك وانا لازم امشى دلوقت.


مشى وسابنى وانا قعدت مكانى، وحسيت انى خرجت من جحيم دخلت جحيم تانى، انا ليه بيحصلى كدا.، قومت بالعافيه  واتوضيت ولبست لبس طويل  ووقفت وبدأت اصلى مع تكبيره الاحرام  بدأت عينى تبكى، كنت بقرأ الفاتحه وانا بعيط  ، مصلتش من زمان، موقفتش قدام ربنا من زمان.، سجدت.ومكنتش عارف اقول ايه غير انى بقيت اعيط وبردد.، يارب  .... ياارب  .

خلصت صلاه. ومحستش  بنفسى غير تانى يوم  فضلت قاعده مكانى  ومبتحركش   حبست نفسى في الاوضه مكنتش بأكل  وبشرب بس  اربع ايام وانا ع نفس الحال اشرب مايه وأصلى بس  وكل ما اسجد اقول يارب وبس.، حسيت ان حد بيفتح الباب بس مقدرتش اتحرك. واول ما دخل قومت بصعوبه.


-  حنان!!!

-  لما نطق إسمى وقعت وهوا جرى عليا ووقعت بين إيده  وفوقت لقيته جمبى وبيعملى كمدات  فتحت عينى.ومكنتش قادره ابعد ايده.

-  انتى فوقتى، انتى كويسه.

-  بعدت عنه وسكت.

-  مكلتيش ليه  ، هوا انا جايبك هنا عشان انقذك تقومى تموتى نفسك؟

-   اتكلمت بصعوبه وتنقذنى ليه.

- بص الناحيه التانيه.وسكت.

-  أرجوك جاوب عايزه احس بالأمان ولو لمره واحده في حياتى.

-  معرفش، صدقينى معرفش  ، حسيت ان عيونك بتقولى انقذنى وطلعنى من المكان دا،  وطول الاسبوع اللى بعدته وانا بفكر فيكى،  وببعدك عن عقلى وقول انه مش انتى  ، مش انتى اللى لازم افكر فيها  ومينفعش لانك.....

-  قولها..  ، قولها عادى لانى بنت ليل صح!

-  ماهوا مفيش مصطلح ينفع غير دا، تقدرى تقولى ايه اللى وداكى هناك او ليه اخدتى الفلوس  دى كلها.

-  ظروف قولتلك ظروف.

-  صرخ فيا.. ظروف ايه اللى تخليكى  تاخدى الفلوس دى كلها  وتروحى مكان زى دا  ، انتى مفكيش عقل يعنى!!

-  قومت من مكانى وانا بعيط.. لا مفيش عقل مفيش.، بنت عندها ١٧ سنه وابوها متوفى وفي تالته ثانوى ومامتها تعبانه وبين الحياه والموت ومقدمهاش اى حد تاخد الفلوس   ولاقت حد بيقدملها الفلوس ومبيطلبش منها حاجه.يبقى مفيش  ،  لما تلاقى. كل حاجه هتتحل بمجرد انك هتمضى ع حته ورقه وتنقذ امك يبقى مفيش  ، قعدت ع الارض.وخبيت وشى بإيدى، بس هيا راحت.وسابتنى وملحقتش  اقولها انى أسفه وبعدها عرفت انى مضيت ع وصلات امانه وورق غريب مش فهماه.، انا تعبت في السنه اللى قعدت فيها هناك دى اوى، بالله متكونش انت كمان زيهم بالله.


-  قرب منى وحضنى.وبدأت اعيط بحرقه كبيره اوى.

-  اهدى خلاص انا أسف اهدى.

- معرفش فضلت اعيط لامتا بس صحيت.لقيتنى نايمه ع السرير وهوا نايم ع الارض وساند ع طرف السرير  ، بصيت عليه، وعقلى بيقول  ، ياترى هيكون طيب!!


 لما حسيت انه هيصحى غمضت عينى تانى بسرعه.ولما صحى حط ايده ع راسى. وبعدها حسيت انه مشى  وفتحت عينى وقعدت ع السرير بفكر ياترى.هوا وحش!  ، ولا حلو،  ولا طيب، ولا شرير؟


-  كلى الاول.وبعدين هنفكر.

-  نعم؟!

-  حط لقمه في بوئى... اتغذى بقى مش كل شويه هيغمى عليكى كدا  !

-  دا هما مرتين بس!!

-  وانتى عايزه اكتر، انتى تقيله علفكره!

-  ومحدش قالك تشيلنى علفكره!

-  واسيب مراتى ع الارض كدا عادى.

-  شرقت وفضلت اكح لما قال كلمتى مراتى.

-  اسمالله عليكى يا حبيبى اشربى.

-  انت اتجوزتنى ليه!، كان ممكن تدفع الفلوس وبس.لو عايز تخلصنى منهم.

-  وانتى متخيله انهم هيسيبوكى لما انا اسيبك كدا، انما لما اتجوزك محدش هيقدر  يقرب منك.

-  سكت شويه.وفضلت باصه ليه.. هوا اانا ممكن اسالك سؤال؟

-  افتحى بؤك.كدا الاول  ايوه كدا، اسالى بقى  ؟

-  انت طيب؟

-  رفع حاجبه.. انتى شايفه ايه؟

-  مش عارفه، انت كنت في مكان مفيش حد فيه بيبقى طيب، بس تصرفاتك بتدل انك طيب.

- حط الطبق ع الكومدينو.. كانت اول مره اروح هناك.

-  وروحت ليه؟

-  عشان صاحبى طلب منى كدا.

-  ولو  لو قالك.ارمى نفسك في البحر هترمى.يعنى، مش المفروض يكون عندك عقل.

-  بص ليا وضحك كانه بيقول شوف مين بيتكلم!

-   انا دايما قافل ع نفسى.وصحابى مقضينها.، ولما طلبوا منى اروح المره دى،  ضميرى كان بيقولى لا بس زى ما انتى عارفه صاحب السوء بيبقى اشبه بالشيطان.ولما روحت كنت متوتر ولما شوفتك اتوترت اكتر  وبعدها  طلبتك من صاحبى ولما شوفت توترك وخوفك.وطريقه تعاملك  حسيت انك سبب عشان اتراجع عن اللى بعمله وعشان اتراجعت عن الغلط دا  قررت اجى وانقذك وبس، انا عارف انى بعمل حاجات كتير غلط اوى  بس  مكنتش متخيل انى هوصل للمكان دا بس حسيت انى وصلته عشانك وعشان اطلعك منه.


-.......


-  يمكن كلامى غريب بس انا والله ما كذبت عليكى في حاجه ومعرفش انا بحكيلك دا ليه، بس انا هسيبك تمشى، وكل حاجه هترجع زى ماهيا بس فتره ع ما ينسوا والاقى ليكى شغل ومكان تعيشى فيه بعيد عن هنا موافقه؟

-  موافقه بس بشرط.

-  شرط ايه؟

-  تتغير وانا معاك   ،  الفتره دى تنتهى بعد ما تتغير.

-  ومين هيغيرنى.. انتى؟

-  ايه انتى دى.ميغركش منظرى، دا.انا واخده ثانويه  بس ممتحنتش فيها يعنى.

-  ضحك وسكت.


ومن يومها وانا قررت اعمل حاجه صح، واساعده ع كل اللى عمله معايا وصدقته.مش عشان هوا يتصدق، لا دا عشان انا عايزه اصدقه،  كان بيقعد معايا. احيانا واحيانا تانيه بيمشى،   كنت بشوفه كل شويه يجى يهزر معايا ويجبلى اكل. واللى محتاجه ويمشى. 


-  هات ايدك كدا! 

-  لا احنا متفقناش ع كدا  ،  احنا قولنا فيه حدود دلوقت هات ايدك بعدين هتقوليلى بحبك  ولا ايه؟ 

-  ضحكت جامد..  انت بتقول ايه؟ 

-  اللهم صلى ع النبى ايه الضحكه دى!! 

-  ايه دا صليت ع النبى،  يعنى  انت مسلم صح؟ 

-  نعم؟  ،  انا إسمى مصطفى يا حنان فوقى! 

-  طيب يا استاذ مصطفى   انت مبتصليش ليه.،  عايزه افهم! 

-  انا بصلى بس... 

-  بس ايه انت هنا طول النهار ومصلتش ولا فرض،  تعالا ورايا. 

-  اجى فين؟ 

-  ادخل انت هنا اتوضا وانا هروح الحمام التانى اتوضا لحد ما انت تخلص و نصلى سوا.

-  بس....

-  اتوضأ صح يا عسل ويلا متتأخرش.


كنت بتوضا وانا فرحانه صلينا سوا.وكان بيطول في السجود زى اول مره سجدت فيها في البيت دا.، خلصنا صلاه وهوا قعد وفضل باصص قدامه وبعدين بص ليا وابتسم.


-  شكرا.

-  مسكت ايده وبدأت اسبح عليها.

-  انتى بتعملى ايه؟

-  عشان ناخد الاجر مع بعض.، ماما علمتنى  اعمل كدا مع اللى بحبهم.

-  يعنى انتى بتحبينى؟

-  ابتسمت برخامه.. لا طبعا.

-  غمزلى، وضحك .. يا بت!!!


ضحكت ع كلمته.وضحكته  ، هوا يتحب، ويتحب اوى كمان بس مينفعش انا اللى أحبه.، كل افعاله معايا تخلينى اقع فيه  بس الواقع وعقلى بيقولوا مينفعش.مينفعش هوا إلا هوا!!


-   انا قولتلك انى عايزه اتعلم؟

-  لا.

-  اشتكيتلك من قله المعلومات اللى عندى؟

-  لا بردو.

-  قولتلك.انا حاسه بملل يا مصطفى وعايزه املاه بالدراسه؟

-  ابتسم.. تؤتؤ.

-  ولما  هوا تؤتؤ مع ابتسامتك اللى توقع القلب دى  قدمتلى في مدرسه وهتخلينى اخد الثانويه العامه ليه؟

-  عشان انا عايز كدا.

-  وانا صاحبه الشأن ومش عايزه ياعم.

-  وانا جوز صاحبه الشأن وعايز عندك مانع بقى؟

-  هنبدأ دراسه امتا يباشا قولتلى؟


صاحب واخ واب.وقبلهم كلهم عيله ملا فراغ كبير في حياتى.بقى بالنسبالى حياتى كلها وحبيته غصب عنى بسبب افعاله وكلامه وضحكته. وحلاوته اللى توقع القلب وتدوبه.دى!.

 بعد عن كل صحابه اللى الوحشين زى ما قولتله، جابلى موبايل.وبقى يكلمنى دايما ونهزر ونضحك وقالى انى مليت مكان صحابه،   وبعد عنهم كلهم. وصاحب ناس كويسه تانيه وبقى كل ما يصلى فرض يقولى وانا افرح جداا كانه ابنى وانا علمته الصلاه.ومستنياه  يثبت عليها   ويقرب من ربنا اكتر  .


-  علبه السجاير اللى كانت هنا فين بقى؟

-  اتكلمت وانا بقطع البصل.. رميتها.

-  ورميتيها ليه؟، 

-  عشان حرام وبتتعبك ومش بتفيدك بحاجه.

-  بس انا مش هقدر ابطلها.

-  طول ما انت هنا مبتشربش.وبتنساها اقعد هنا وانساها  وانا عملتلك حاجه هتبدلها بيها.

-  وهيا ايه بقى؟

-  كنافه  بالقشطه انما ايه تحفه والله بص عليها في الفرن كدا؟

-  نعم  ، انتى بتهزرى؟

-  اعملك واحده بالمانجا؟، لسه فيه كنافه اعملك؟

-  حناااان!!!!

-  دموعى نزلت.

-  بتعيطى ليه خلاص  مش هشرب تانى وانا بحب اللى بالقشطه  ، خلاص بقى بالله ما تعيطى..

-  البصل حرقلى عينى.يا مصطفى  ، عاااااا.

-!!!!!!!!


 الحياه حلوه بوجوده، بوجوده هوا بس محدش غيره  ،  انسان  غريب  يتحب اول ما يتشاف، بدأ يعيش معايا.ويقعد معايا اكتر وانا كنت مبسوطه بقينا نتشارك كل حاجه حرفيا، كله كله  ،  بنطبخ مع بعض.، ونساعد بعض في شغل البيت  ، زى ما كنت بقرأ في الروايات  ، حياه تتمنى اى بنت تعيشها حياه مستقره وهاديه، حياه تتحب، معقول هسيب دا كله وهمشى في يوم؟


كنت بلف قدام الاوضه وماسكه الملخص  وبقرأ فيه بصوت عالى عشان هوا سابنى ودخل ينام وهوا كان واحشنى وعايزاه يذاكرالى  ويقعد معايا.


-  وقال انه ذات يوم!

-  .......

-  ذات يوم  انه.....

-....

-  ثم يقول انه ذات.....

-.....

-  ويقول انه.....

-  فتحت الباب فجأه فإتخضيت، هوا مش هيقول في ليلته اللى مش هتعدى دى ولا ايه؟

-  هوا مين دا؟

-  قرب منى.. وعدل الكتب وضحك.. ذات يوم.

-  علفكره انا كنت بذاكر.

-  والكتاب بالشقلوب؟

-  هااا؟

-  ضحك تعالى اذاكرلك تعالى.


وايه يعنى لما الانسان يمسك  الكتاب بالشقلوب فيها حاجه، طيب والله مافيها حاجه!!

 كنت واقفه وبعمل الغدا.، وسمعت صوت المفتاح  ابتسمت وانا في المطبخ.


-  حنون عامله لينا أكل ايه النهارده.

-  صنيه بطاطس بالفراخ  إيه رأيك؟

-  هواا عشان انتى بتحبيها  تطبخيها لينا كل ما تلاقى نفسك فاضيه!

-  رفعت المعلقه في وشه  ، عندك مانع؟

-  لا يباشا، اه بقولك ماما برا.

-  نعم؟؟؟؟!

-  نعم ايه بقولك ماما برا.

-  يلهوى يا مصطفى يلهوى  ، خبينى يلا خبينى، اتخبا في المطبخ هنا  بس مفيش مكان  اقعد في التلاجه ولا هتلج.،  ادخل في كيس المكرونه دا طيب.،  مسكت الجاكت بتاعه وكنت بهز فيه  يلهوى اعمل ايه فكر بسرعه فكر.

-  افكر ايه يابنتى هوا انا شاقطك انتى مراتى 

-  اه صح انت صح.

-  تعالى بقى نطلعلها.

- هوا لازم طيب؟

-  يلا يا حنان.


كنت خايفه تكون وحشه وتنتقد فيا  ، بس اول ما شافتنى حضنتنى.، وقالتلى شكرا عشان غيرته وخليته يبعد عن الناس اللى ياما تعبت معاه عشان يبعد عنهم، كانت طيبه لدرجه كبيره.وكانت بتضحك وتهزر.وهوا كمان   ،  كلنا. وكنا بنتكلم  وورتنى صوره وهوا صغير وقعدنا نتريق  عليه  وفضلنا نتكلم كتير اوى وكان ساند وشه ع ايده وبيبص ليا وبيبتسم ليا بحب  وتقريبا اتفضحنا  ،  هوا بيعمل معايا كدا ليه هوا بيحبنى!!! 


 مامته مشيت وهوا وقف قدامى وفضل باصص ليا ومبتسم وانا دخلت اوضتى بسرعه وانا بضحك ع منظره وكنت فرحانه جداا،  صليت. وبعدها كنت هنام وافتكرت كلام مامته ان هوا كدا خلاص بقى كويس وانسان حلو. وطيب،  وافتكرت شرطى الغبى! 

 فضلت افكر كتير ونمت.. 

وحلمت بيها!!!!!! 

 حلمت بأمى كانت لابسه ابيض،  اخيرا يا أمى محلمتش بيها من ساعه ما اتوفت. شوفتها كانت وحشانى اوى،  قالت انها مسمحانى  وبعدها كل ما أسالها عن حالها توصينى ع مصطفى  وبعدها فوقت من الحلم وهوا بيصحينى  لقيته قدامى فحضنته وضغطت عليه جامد. 


-  كان  بيمسح ع شعرى...  اهدى يا حنون اهدى يا حبيبتى انا جمبك. 

-  اتكلمت وانا بعيط  ..  شوفتها يا مصطفى.،  شوفت ماما. 

-  بجد!!  ،  وفرحانه صح؟ 

-  جدا،  جداا يا مصطفى فرحانه اوى بجد، كانت طول  الحلم بتوصينى عليك وبتقولى.مش اسيبك و..  

-  طيب ما تسمعى كلامها.

-  ايه!!!

-  اسمعى كلامها ومتسبنيش.

-  والشرط طيب؟

- انا حبيتك يا حنان، وجيبت ماما امبارح عشان تتعرف عليكى وهيا كمان حبتك، حياتى اتغيرت بفضلك بعد ربنا واتحولت للاحسن، وبقت حلوه بسببك وبيكى وهتبقى وحشه  لو مشيتى!

-  بس انا يامصطفى...

-  يلهوى ع مصطفى لما تقوليها بتوقع قلبى.

-  ضحكت  جامد وبصيتله..

-  وضحكتك كمان والله.

-  طيب اعمل ايه طيب!!

-  شدنى لحضنه..نكمل دا الاول وبعدين نفكر.

-  تعرف ؟

-  إيه؟

-   ضغطت ع قميصه.. انت عوض ربنا ليا.

-  وإنتى كل حياتى، بحبك. تمت 

تمت

"    يكفينى  من حظوظ   الدنيا  أنك لى   ♥✨"


رايحين فين يا حلوين اتفقنا على ايه تفاعلوا هنزلكم روايات حلوه

ليلى 

تعليقات