أخر الاخبار

رساله من مجهول كامله

 ببص لقيت رسالة على الخاص 

_ السلام عليكم ورحمة الله وبركاته


" اتعجبت من الرسالة ومين ده اصلا "


= وعليكم السلام ورحمة الله وبركاته.. مين !

_ ازيك يا أختي 

= الحمد لله مين برضو 

_ أخوكِ في الله أحمد 

= وعاوز اي يعني !

_ انا معتبرك زي أختي .. وأنتي كذلك اعتبريني زي أخوكي

= ايوة وبعدين !

_ نعين بعض على دين الله .. اسألكِ عن الصلاة وتسأليني، أوقظكِ للقيام والفجر وتوقظيني، اذكركِ بالورد والأذكار وتذكريني 

= وأنت معندكش أخت مثلا !!

_ أصبتيني بالحزن، ليس لدي إخوة لا صبيان ولا بنات 

= معندكش صحاب !!

_ أصحابي يسيرون في طريق السوء وأنا لا أحب مشاركتهم حتى لا يجرونني إلى طريقهم 

_ أقسم لكِ أنني سأعتبركِ گ أختي ولن أؤذيكِ 

= واشمعنا أنا !

_ رأيت نزعتكِ الدينية على حساب فيسبوك وأعجبت بها، رأيت فيكِ الأخت الصواب، رأيت أنكِ أهلاً لما أريد 


" اي الولد ده، هعمله بلوك ، لا بس ده يا عيني عايز يلتزم ومحدش مساعده، ومعندوش أخوات يعينوه ولا أصحاب حتى، وجه طلب مساعدتي حرام أرده، أنا هساعده وربنا يجزيني على نيتي بقى " 


_ لم تجيبي يا أختي، أقبلتي؟

= ايوة قبلت .. بس عندي شرط

_ كما تأمرين

= التعامل يكون بحدود.. مينفعش أنا أو أنت نتخطاها

_ بالطبع 

= كده تمام 

_ أحادثكِ بالعامية أم الفصحى 

= العامية أفضل

_ تمام.. اتفقنا  

= تمام



_ طيب العشاء أذنت .. قومي صلي يلا 

= أنت بتكلمني كده لي!

_ احنا اتفقنا نكون مع بعض زي الأخوات.. وأنا بكلمك كأني أخوكي

= آه .. ماشي


" مش عارفه حاسة اللي بعمله ده غلط وغلط كبير كمان ، بس لا لا ما دام بحدود وكأننا أخوات عادي مش هيحصل حاجة "


" الساعة جات 12 بالليل ولقيت رسالة منه بتقول "


_ لسا صاحية لدلوقتي لي !

= وأنت مالك .. دي خصوصيات ع فكرة

 _ ع فكرة كان قصدي ما تناميش متأخر علشان تقدري تقومي لصلاة القيام والفجر 

= ماشي.. اعتذر لسوء الفهم 

_ لا عليكي .. بقولك هاتي رقمك

= نعم!!! لي إن شاء الله.. انا كنت فكراك واحد محترم.. عاوز رقمي كمان 

_ بالراحة فيه اي 

_ ع فكرة كنت هاخد الرقم علشان ببقى قافل نت بعد الساعة 1 فكنت هديكي رقمي واخد رقمك علشان تتصلي علي لأني بكسل، أنتي اللي فهمتي غلط

= اممم.. ابعت رقمك انت وانا هبقى ارن، بس ما تسجلش الرقم 

_ ليه!

= ما تسجلوش وخلاص 

_ ماشي 

_ أهو رقمي ******01

= تمام 

_ رني ع الساعة 2 ونص 

= تمام 

_ هي كل حاجة تمام تمام 

= ع فكرة قولنا فيه حدود المفروض ما تتخطاهاش 

_ ماشي 


" الساعة 2 ونص "


" ارن ولا لا، يا ربي ، بس لو ما رنتش مش هيصلي، وهو شيلني أمانة، انا هرن "


" بعد جرسين "


بنوم _ ألو

= ألو 

بابتسامة جانبية _ مين 

= احم..ولاء 

بمكر_ ولاء مين 

= ولاء اللي كلمتها ع الفيس وقولتلها تتصل علشان تصحيك لصلاة القيام .. افتكرت 

_ آه صح .. معلش أسف أصل لما بصحى من النوم بكون شبه فاقد الذاكرة 

= ماشي .. هقفل أنا دلوقتي.. المهم ما تنامش وقوم صلي 

_ حاضر 

= سلام 

_ سلام


 " مر أسبوع ع الحال ده اليوم كله يبعت رسائل بس بحدود أيوة.. بكلمه بحدود بس ما يقدرش يتعداها، لغاية ما لقيت رسالة منه ع الواتس "


_ السلام عليكم.. كيف أخبارك يا ولاء 

= أولا وعليكم السلام.. ثانيا انا مش قولتلك ما تسجلش رقمي 

_ أسف .. بس انتي كل يوم لما بتتصلي ع القيام والرقم مش مسجل ببقى خايف ارد احسن يكون هكر 

= اللي اعرفه البنات بتخاف علشان صورها بشعرها انت هتخاف لي 

_ اي حد هيخاف وبعدين الفون عليه صور أمي وأختي

= آه

= لحظة انت قولت معندكش اخوات، أختك مين دي بقى !!!

بتوتر _ يا ستي بنت خالتي زي أختي وبقولها دايما يا اختي وهي صغيرة لسا في اعدادي وبتيجي عندنا بتمسك الفون وتقعد تتصور بيه 

= ماشي


" بعد دقيقتين "


_ انتي دي اللي في صورة البروفايل

= ايوة

_ شكلك حلو 

بخجل = شكرا 

_ شكرا 😒

= امال اقول اي !!

_ عيونك أحلى مثلا .. أنت اللي أحلى .. كده 

= اعتقد انك خرجت عن مسار هدفك الأساسي 

في نفسه _ دي باردة اوي 

_ معاكي حق أنا أسف 


" مر شهر اتنين والتجاوزات في الكلام كترت وبقيت أكلمه اليوم كله وهزار وضحك وكلام من ده لغاية ما.."


_ ولاء 

= نعم 

_ أنا بحبك 

بتوتر وخجل= أنت بتقول اي 

_ بقول الحقيقة، أنا شايف فيكي الزوجة الصالحة وهتعينيني ع الدين وشكلك جميل وروحك حلوة 

= احم .. والمفروض اعمل اي 

_ نتعرف على بعض علشان لما اجي اتقدملك نكون فاهمين بعض

= بس ما ينفعش 

_ صدقيني مش بخدعك، انا عاوز نكون عارفين وفاهمين بعض وبعدين نتجوز علشان نكون على بينة من الأول 

= بس أنا حاسة أن اللي انت بتقوله ده غلط وما ينفعش 

لنفسه_هه أنتي لسا واخدة بالك

_ لا غلط ازاي .. انا بتعرف عليكي علشان نبقى فاهمين بعض، قولتي اي 

_ اه صح، يمكن تكوني انتي مش بتحبيني أصلا، وكده هجبرك

_ قولتي اي

= هفكر وارد عليك 

_ منتظر ردك وأكيد موافقة بإذن الله


" يا ربي اي الورطة اللي انا فيها دي، مش كفاية شعور تأنيب الضمير اللي بحس بيه دايما ده، اعمل اي، اه صح ما هو بيقول عايز اتقدملك، انتي غبية اوييي ما كل الشباب بيقولوا كده وبيضحكوا بيه ع البنات، لا بس ده غيرهم ومش بيضحك علي، هو أنتي كنتي دخلتي جوا قلبه علشان تعرفي نيته، يي اعمل اي بس، احنا اصلا هنتكلم عادي وكلامنا بحدود طبعا " 


= احم.. فكرت 

_ وقولتي اي 

= موافقة 

لنفسه _ غبية جدا 

_ اللهم صل على النبي 

= عليه افضل الصلاة والسلام

_ مبدئيا كده انا بحبك جدا جدا 

= ع فكرة مينفعش اللي بتقوله ده 

_ يا بنتي لازم اعبرلك انا بحبك قد اي .. امال هتتجوزيني وانتي مش عارفه مكانتك اي في قلبي 

= ماشي 


" توالت الأحاديث معاه، بقيت بتكلم عن شخصيتي عن نفسي أنا بحب اي وبكره اي، وهو برضو بيعمل كده، كنت دايما بحس بتأنيب ضمير بس بقول لا هو هيتقدملي بس بيتعرف بس، فضل ورايا لغاية ما خلاني قولتله اني بحبه " 


_ ولاء 

= نعم 

_ عاوز اشوفك 

= تشوفني ازاي !

_ نتقابل انا وانتي 

= لا مش هينفع 

_ هيكون مكان عام ما تخافيش 

= لا برضو مينفعش 

_ خمس دقايق بس وهتمشي 

= لا 

_ بالله وافقي 


" وطبعا انا بعد التحايل ده كله وافقت اني أقابله، وطلعت قعدت معاه في كافيه على بحر "


_ ياااه مبسوط جدا إني شوفتك 

= وانا كمان 

_ تعرفي انك اجمل من الصور بكتير 

= بجد 

_ أيوة طبعا 

= طيب انت طلبت تقابلني لي 

_ كنت عايز اتكلم معاكي وجها لوجه 

= امم.. لحظة أنت مش قولتلي انك التحيت فين اللحية 

_ احم.. اصل.. اصل جالي حساسية في دقني اطريت احلقها علشان اعالجها

= اه .. الف سلامة عليك

_ الله يسلمك يا حبيبتي

= طيب أنا همشي 

_ اي ما تخليكي قاعدة انتي ما كلملتيش حاجة 

= لا مش هقدر معلش 

_ على راحتك .. هاجي اوصلك 

= لا لا شكرا 


" مشيت وانا مرعوبة احسن حد يشوفني، مر شهرين تكررت مقابلاتنا بدل ما بقعد خمس دقايق زادت وممكن ساعات، كلامنا كتر اوي، وزاد بإنه مسك ايدي عادي لغاية ما في يوم كنا قاعدين في كافيه .."


= احمد 

_ قلبه

= مش هتيجي تتقدم 

_ ولاء هو انتي مش معاكي غير ام السيرة دي 

= هو انت لي كل ما اكلمك تتهرب مني 

_ انا مش بتهرب 

= لا بتتهرب، بص يا احمد انا زهقت بقالنا اكتر من شهرين بنتكلم واتعرفنا على بعض بما فيه الكفاية وانا بصراحة زهقت بقى على طول حاسة اني عاملة غلط .. ريحني هتتقدم امتى ، ولا انت كنت بتضحك علي 

_ أيوة انا فعلا بضحك عليكي 

= ايه !!!

_ زي ما سمعتي .. انتي مفكراني هتجوز مع واحدة مشيت معاها، عاملة نفسك الخضرا الشريفة، ولما دخلتلك من ناحية الدين الباب انفتح في وشي فورا، ما فكرتيش بعقلك ابدا مانا كان ممكن أستعين بأي واحد ع الفيس يكون كويس ومحترم ويساعدني، لكن انتي غبية وغبية اوي كمان ما فكرتيش تشغلي عقلك دقيقة وحدة 

= يعني أنت مش بتحبني !

_ احب مين يا ماما، انتي وحدة خنتي ثقة أهلك فيكي ورنيتي على شاب ما تعرفيهوش، بتقوليلي الكلام بحدود واحنا مكسرين الحدود دي اصلا، اتخليتي عن دينك وحدة وحدة، كأنك طفلة، بذمتك دي وحدة أئتمن عليها بيتي وتبقى أم أولادي، يا شيخة بلا قرف .. سلام بقى 


" مشيت وانا مش شايفة قدامي ازاي أنا بالغباء ده انا اضحك علي، خنت ثقة أهلي، اتخليت عن ديني ومبادئي، الرحمة يا رب الرحمة "


بتنهيدة = بس يا ستي ادي كل اللي حصل 

^ تقصدي ما اردش على الرسالة دي 

= اسمعي مني يا حبيبتي.. اوعي تسمعي كلام اي ولد يقولك انتي زي أختي.. كل واحد عارف أخته فين.. اخوك يبقى من أبوكي وامك غير كده ده مش اخوكي ومينفعش تعتبريه زيه ابدا.. ما تخليش الشيطان يسحبك لتحت ابدا 

^ يعني ما اردش عليه 

= اعمليله بلوك فورا 

^ طيب أشوفه عاوز اي 

= لو رديتي .. هتقعدي تستني رده على كل كلمة وهيسحبك وحدة وحدة .. الأفضل والأحسن غلق الباب في وجهه ووجه الشيطان 

^ معاكي حق 

= ربنا يهدينا جميعا يارب 

^ يااارب


" أخيتي، من كتبه الله من نصيبكِ، سيأتي به الله إلى عقر دارك مجرورا من قلبه، فاطمئنِ واتقِ الله 🦋💙 "


لعلها تكون المُنجيه


تمت

قصد جديده تحفه 

هنا

تعليقات