أخر الاخبار

اسكريبت يوميات زين وحنين كامله

يوميات زين وحنين

بقلم حنين عادل



المجد للقصص والحكايات 

 كنت راجعه مبسوطه من الفرح 

_انتي يا ست هانم

..ايه يا زين في ايه

_ في ايه يعني مش عارفه في ايه

.. انا لحظت انك كنت متضايق في الفرح وطول الطريق واحنا في العربيه كنت مبوز ممكن اعرف السبب

_السبب ماشوفتيش الزفت بتاعك على اللي ساب الفرح كله واجي رقص قدامك وكان بيبصلك

.. وانا ذنبي ايه طيب 

_ دا حتي قبل ما نروح القاعه ووقف بالمكنه قدامك ويصلح

.. صدفه وانا مالي بده كله

_دا حتي امك لما لحظت أنه ساب الفرح كله واجي يرقص قدامك وقفت وقعدتك وراها

.. اولا امي عملت كده عشان انا قولتلها انك مش بتطيق علي ابن خالي مش عارفه ليه وهوا كان بيرقص زي اي شاب في الفرح

_ومالحظتيش لما مشيتي مشي وراكي واستناكي علي الطريق 

..واللهي مالحظتش وبعدين علي ايه اللي تحطه في دماغك دا عيل بالنسبالك

_ما هوا العيل ده اللي بتخاف منه وبعدين انتي ناسيه أنه رن عليكي تاني يوم الفرح ..

..مش هنخلص من الحكايه دي بقا وبعدين اعمل ايه إن كنت حلوة يعني ماهو مش بإيدي واللهي

_الحلاوة حلاوة الروح 

دي حياتي معاه كلها شك وتعب وتفكيره وحش جدا او يمكن عشان الفرق بينا 9 سنين تفكيرنا مختلف ...

_كل اما اجي ماسكه التليفون 

..حوش النادي اخد كل وقتي والخروجات والكوافير المفروض ما امسكوش صح يعم حرام عليك ما انا طول اليوم بنتك هداني دا غير البيت حرام بقا أما امسكه شويه وبعدين هوا كل اما نتشاكل تجيب سيرة التليفون انا تعبت بقا .

_الله وايه ده رساله من هاني الساعه 11 ليه أن شاء الله

..يا بني ده هاني ده ابن عمي يعني زي اخويا وعيل بالنسبالي وبالنسبالك ده 15 سنه يابني 

_ لا مش عيل ويبعتلك رساله ليه وانا ملاحظ أنه هزاركم تقيل اوي مع بعض ويبعتلك رساله بتاع ايه 

..دا رساله فيها ايموجي انا تعبت بقا 

_ولو يبعتلك ليه

اتفه الأسباب بنعمل عليها مشاكل دي مش غيرة دا شك بالنسبالي انا تعبت من الطريقه دي جفا في كل حاجه مابينا مافيش مشاعر مفيش حضن بعد غيابه عني يوم طويل مفيش احساس بالأمان مفيش احساس انه باقي عليا طريقته معايا بتحسسني اني جايه من الشارع أو مش متربيه 

.. اه ابطال الجمهوريه عدوا حدود العالميه عاملين فكره جهنميه

_ايه ده

.. بتشد التليفون مني ليه ده فيديو للشيمي

_وجبتيه منين 

..من علي التيك توك

_مش قلتلك امسحيه انتي قليله الأدب

.. قليله الادب عشان بتفرج علي فيديو

_اشمعني الواد ده بالذات 

..عشان دمه خفيف

_انتي مالكيش تشيلي تليفون من أصله

.. ليه أن شاء الله انا مش بعمل حاجه غلط 

_واللهي الله اعلم بقا

..علي فكره لو بتشك فيا تبقي بتشك في نفسك عشان اللي معندوش ثقه في نفسه ماعندوش ثقه في حد 

_وانا مثقش في نفسي ليه ها طاااخ

..انتي بتضربني بالقلم عشان بتفرج علي فيديو

_لا عشان قليله الادب

..علي فكرة لو بتعيب في تربيتي يبقي بتعيب في تربيه مامتك اللي هيا عمتي يبقي بتعيب في تربيتك من الاساس ولو انا مش محترمه يبقى تربيتي من تربيتها

_صوابعك مش زي بعضها 

في اليوم ده فضلنا نتشاكل للفجر مهداش ومانمش رايخ جاي علي اوضتي اه نسيت اقول انه بينام في اوضه لوحدة حياتنا بقيت جحيم انا حنين اللي بتموت في الضحك النغشه زي ما بيقولوا اللي ضحكتها مابتفرقهاش انا اللي بحب الهزار والضحك اللي اول ماتشوفني تحس انك تعرفني من زمان انطفيت مابقتش زي ما انا بقيت عصبيه بزيادة صوتي علي ما انت اللي بتطلع الوحش اللي جوا حد والحلو بمعاملتك تقدر 

..بقولك ماتحلقش دقنك انا بحبها طويله عليك

_اه وقلتلي الكلمه دي لمين قبل كده

..مش فاهمة يابني قصدك أي

_قصدي علي مثلا أصله مربي دقنه اكيد انتي اللي قولتيله يسيبها

..انت الموضوع معاك مابقاش ليه حل بقي واحدة تقول لجوزها سيب دقنك يقولها قولتي لمين قبل كده قبلتها علي نفسك كراجل تقولها لمراتك انت مش عارف ان احترامي من احترامك وأما بتقلل مني بتقلل من نفسك

_مالهاش علاقه

..ما الطيور علي أشكالها تقع

_قصدك ايه

..قصدي لما انتي شايفني كده وحشه أوي سايبني علي ذمتك ليه 

_يعني عايزة ايه

..عايزة أطلق


في لسه ليه تكمله لو عايزينها تفاعلوا عالبوست


المجد للقصص والحكايات 


ولما انت شايفني وحشه اوي كده سايبني علي ذمتك ليه

_يعني عايزة ايه

..عايزة أطلق

_مش ملاحظه انك بقيتي بتقولي الكلمه دي كتير

..ماهي مابقيتش عيشه يا زين 

_ايه شايفه شوفه تانيه ولا ايه

..هوا مفيش فايدة بجد انا تعبت 

_علي العموم تروح واحدة تيجي عشرة..


يعني ايه مفيش حل انا تعبت اكيد دي مش غيرة دي عدتها بمراحل دا بيشك فيا بطريقه صعبه تروح واحدة تيجي عشرة هوا ده تمسكك بيا هيا دي عيشتي معاك خمس سنين ولسه كده 

..زين لو سمحت فك التكشيرة دي شويه الكل ملاحظ لاحظ أن النهاردة خطوبه اختي يعني

_انا كويس اهو 

..طيب

_بطلي بس انتي شغل الغازيه ده 

..اولا مفيش حد الا اهلي ومبسوطلها 

_اسمعي زي مابقولك

..طيب 

_انت قولتيلي العريس منين

..مش عارفه المكان بالظبط 

_انا عرفت من الناس اللي جايين معاه ولو كان ابوكي قالي علي اسمه كنت عرفتله عنه كل حاجه بس احنا بنعرف زي الغرب

..انت عارف من اول الموضوع خالص انت عارف قبل ما اخواتي يعرفوا

_الموضوع ده بقاله شهرين تلاته ولسه جايين تقوللي امبارح

..اولا بابا قال لأخته اللي هيا امك ومعتمدين أني قلتلك وبرده بابا كلمك عشان يأكد عليك يبقي بنعتبرك غريب ازاي

_سيبك يعني من امتي كان حد عملي اعتبار


لازم يا زين لازم اي لحظه حلوة تبوظها لازم اي مناسبه تطلع بمشاكل انا بخاف لما بلاقيك في مناسبه معايا بخاف اضحك تقول أنا بضحك لحد بخاف اي موقف اعمله تاخده بسوء نيه بقيت بخاف.


_انت فضلتي قاعدة تعملي ايه للساعه 3 عالنت

..لا مش للساعه 3 دا للساعه 8 

_اه اللي هوا ازاي يعني

..نسيت الداتا مفتوحه وطبعا كده هيبقي مفتوح والاشعارات هاتيجي

_واللهي طيب 

..مش عارفه بتبصلي كده ليه هتعمل ايه يعني اقولك خد الباسورد والايميل بتاعي وافتحه عشان ترتاح 

_مش كده انتي لو خايفه علي زعلي تقفلي الفيس من اساسه 

..مش عارفه النت عاملك ايه 

_مش عارف انت متمسكه بيه ليه

..عشان مش هفضل علطول اللي بضحي وبقل من راحتي عشانك 

_واللهي وايه التضحيات اللي عملتيها بقا

..اني اتخلي عن حلمي كان نفسي ادخل جامعه وأكمل تعليمي وانت رفضت وانت عارف أنه كان حلم حياتي اني ابقي حاجه كبيرة 

_وايه كمان

..انك تمنعي من لبس البنطايل مع اني لبسي محترم وجسمي يساعدني علي لبسها وكبرتني باللبس ده مع أن الاحترام عمره ماكان باللبس اختك اللي عندها 40 سنه بتلبسها انا اللي عندي 20 سنه مش بلبسها

_وايه كمان تضحياتك يا ست المضحيه

..اتريق ومن امتي بتاخد كلامي جد حتي الكتابه اللي بتطلعني من اللي انا فيه مع انك عمرك ما قريتلي روايه من اللي بكتبها عايزني أبطلها وبتتضايق لما بكتب

_عشان كلام فاضي 

..الكلام الفاضي ده بيعجب الاف

_عشان فاضيين زيك


نفسي تشاركني اهتماماتي تقعد معايا تشوف رواياتي اللي بتعجب كتير الا انت تعرف فعلا اني كاتبه موهوبه وليا متابعين 


_هندي ليل ونهار

..انت عارف اني بحب الهندي اتفرج بقا دا فيلم تحفه

_اه ما انت بتحبي تتفرجي عشان العضلات وعشان قله الأدب

..العضلات 

_اه 

..عشان الرومانسيه اللي بتطلعنا من الواقع اللي عايشينه ممكن تقولي يا زين امتي اخر مرة خرجتني بلاش دي امتي اخر مرة قولتلي كلمه حلوة بلاش دي كمان امتي اخر مرة بعد الشغل حكيتلي عن يومك 

_مش بحب اشغل دماغك بمشاكل الشغل ...


انا عارفه أن بيبقي في جفا في العلاقه بس مش كده انا اتجوزته وانا عندي 15 سنه كنت عيله بمشي وراه في كل حاجه حكم عليا اني ما اكملش المدرسه كنت طالعه من 3اعدادي واصريت اني اكمل وفعلا كان لسه ايام بسيطه عنها وروحت جبت هدوم المدرسه وقدمت في ثانوي تجاري وكل حاجه تمام لحد ما قبلها بكام يوم....


..يعني ايه مش هروح

_مش هتروحي وخلاص

..يا زين ماتهزرش بجد 

_مش هتروحي

..مش احنا متفقين وجبت الهدوم وكل حاجه ايه اللي حصل بقا

_مش هتروحي روحي منازل

..بس انا سألت لازم اسقط سنه عشان المنازل


جبت بابا وقاله تروح يومين أو تلاته في الاسبوع ومفيش فايدة جبتله كل الناس ومفيش فايدة وطبعا عشان انا الست اللي لازم تسمع الكلام وتضحي ضحيت بسنه من عمري وسقط عشان اروح منازل..


..زين

_نعم

..انت عارف انت وحشتني.

_ماتشوفيش وحش 


زين شخصيه غامضه انا عارفه كويس اوي انه مش بيحبني وانا لحد النهاردة مش عارفه ايه حقيقه مشاعري ناحيته بس لما انا بحب ضحكته اوي بحس أن الدنيا بتضحك لما بيضحك بحب عيونه العسلي ورموشه الطويله بحب شفايفه لما بيحركهم بطريقه عشان يضحكني اه اكيد احنا في لحظات حلوة بس بين كل 10 ايام زعل يوم كويس وبحس أنه عشان يشبع غريزته بس وبعدها برده بنتشاكل 


..زين انا اتعاكست النهاردة 

_كل البنات بتتعاكس 

..دا قالي يا فرس وكلام وحش

_عادي الحلو بيتعاكس والوحش بيتعاكس

..ولا انت عارف كويس اوي وبشهادة الكل أني قمر عيون بني وبيضه وطويله وشفايفي بتعاكس عليها من البنات قبل الرجاله 

_طبعا انا عارف...


انتي عارفه لما تبقي جميله وبتحاولي تبقي اجمل عشان تسمعي كلمه منه انتي زي القمر هتطيري من الفرحه بس لما تحسي انه مش فارق معاه اي حاجه مش بيحاول حتي يديكي ثقه في نفسك مش بيحاول يقولك كلمه حلوة الإنسان اكيد فيه عيوب ومميزات بس لما تبقي عيوبه اكتر من مميزاته يبقي بلاش منه 


السؤال هنا التعامل مع شخصيه زين ازاي ؟؟؟!!هل في حل ؟؟؟!!!

الفصل التالي

تعليقات